ALP ကအရာရှိတွေပစ်ခတ်ခံရပြီးနောက် စစ်တွေမှာလုံခြုံရေးပိုမိုတင်းကျပ်၊ မုန်တိုင်းသင့်ပြည်သူတွေကိုအကူညီပေးရေး ပိုခက်ခဲလာ

ALP ကအရာရှိတွေပစ်ခတ်ခံရပြီးနောက် စစ်တွေမှာလုံခြုံရေးပိုမိုတင်းကျပ်၊ မုန်တိုင်းသင့်ပြည်သူတွေကိုအကူညီပေးရေး ပိုခက်ခဲလာ

စစ်တွေ – ၂၀၂၃ ဇူလိုင် ၅ (မော်ကွန်း)

အခုလ ၁ ရက်က ရခိုင်ပြည်လွတ်မြောက်ရေးပါတီ ALP မှ ဒုဥက္ကဌ ခိုင်နီရောင်အပါအဝင် တပ်ဖွဲ့ဝင်အရာရှိသုံးဦးပစ်ခတ်ခံရပြီးနောက် စစ်တွေမြို့အဝင်အထွက်တွေမှာ လုံခြုံရေးပိုမိုတင်းကျပ်လာနေတယ်လို့ မုန်တိုင်းသင့်ရခိုင်ပြည်သူတွေကို အကူအညီပေးနေတဲ့ ဒေသအခြေစိုက်အရပ်ဖက်အဖွဲ့အစည်းတွေကပြောပါတယ်။

ဝံလတ်ဖောင်ဒေးရှင်းတာဝန်ရှိသူ ဦးခိုင်ကောင်းစံက”ဒီရက်ပိုင်းလမ်းမှာစစ်ဆေးမှုတွေများတယ်။ အဲဒါကတော့ စစ်တွေတက္ကသိုလ်ပစ်ခတ်မှုကြောင့်ပါ။ စစ်တွေအထွက်ဂိတ်မှာ လူငယ်တွေ၊ ဆိုက်ကယ်တွေ၊ ကားတွေကို ရှာဖွေစစ်ဆေးမေးမြန်းတာတွေလုပ်နေပါတယ်။ ပြီးခဲ့တဲ့ ရက်ပိုင်းကပစ်ခတ်မှုပြီးတော့ပိုပြီးလုံခြုံရေးတင်းကျပ်လာတဲ့သဘောပါ” လို့ ပြောပါတယ်။

အခုလိုလုံခြုံရေးပိုမိုတင်းကျပ်လာတာကြောင့် အကူအညီပေးရေးလုပ်ငန်းတွေမှာ ကြန့်ကြာမှုတွေရှိနေတယ်လို့ အရပ်ဖက်အဖွဲ့အစည်းတွေကပြောပါတယ်။

ပေါက်တောမြို့နယ်မှာကူညီကယ်ဆယ်ရေးလုပ်နေသူတစ်ဦးကလည်း “စစ်တွေက ကူညီကယ်ဆယ်ရေးလုပ်နေတဲ့အသိတစ်ယောက်နဲ့ အဆက်အသွယ်ရတယ်၊ စစ်ကောင်စီက ကူညီကယ်ဆယ်ရေးလုပ်ငန်းတွေကို အစကပြန်ခွင့်ပြုပေးတယ်၊ အခုတော့သွားလို့မရဘူး” လို့ပြောပါတယ်။

ALP အရာရှိတွေပစ်ခတ်ခံရမှုနဲ့ပတ်သတ်ပြီး ALP က ရက္ခိုင့်တပ်တော် AA ကိုစွပ်စွဲထားပြီး AA ပြောရေးဆိုခွင့်ရှိသူ ဦးခိုင်သုခကတော့ ရက္ခိုင့်တပ်တော်ရဲလက်ချက်မဟုတ်ကြောင်း ဒေသအခြေစိုက်သတင်းဌာနတွေကို ဖြေကြားထားပါတယ်။

ရခိုင်ပြည်လွတ်မြောက်ရေးပါတီ ALP ရဲ့ ဒုဥက္ကဌ ခိုင်နီရောင်အပါအဝင် အရာရှိတပ်ဖွဲ့ဝင်သုံးဦးဟာ စစ်တွေတက္ကသိုလ်ကျောင်းရှေ့မှာ ပစ်ခတ်ခံရပြီးသေဆုံးသွားခဲ့တယ်လို့ ဇူလိုင် ၂ ရက် မှာ ALP က ထုတ်ပြန်ပါတယ်။

ALP ဥက္ကဌ ဒေါ်စောမြရာဇာလင်းဟာစစ်ကောင်စီကကျင်းပတဲ့ ငြိမ်းချမ်းရေးဆွေးနွေးပွဲတွေတက်ရောက်လေ့ရှိပြီး စစ်ကောင်စီက ALP ကို နယ်ခြားစောင့်တပ် BGF အဖြစ်ထားရှိဖို့သတင်းတွေထွက်ပေါ်နေပါတယ်။

စစ်ကောင်စီကလုံခြုံရေးပိုမိုတင်းကြပ်လာတဲ့အပြင် ALP နဲ့ AA တို့နှစ်ဖွဲ့အကြားတင်းမာမှုတွေကြောင့် မိုခါမုန်တိုင်းဒဏ်သင့်ရခိုင်ပြည်သူတွေဟာ စစ်ရေးပိုမိုတင်းမာလာကြမှာကိုစိုးရိမ်နေကြတယ်လို့ဆိုပါတယ်။
စစ်ကောင်စီဟာ ဇွန် ၈ ရက်ကတည်းက ရခိုင်ပြည်နယ်အတွင်း ခရီးသွားလာခွင့်ရပ်ဆိုင်းလိုက်တာပါ။ ဒေသအခြေစိုက်အရပ်ဖက်အဖွဲ့အစည်းတစ်ချို့ကို ပြန်လည်ခွင့်ပြုပေးခဲ့ပေမယ့် နိုင်ငံတကာအကူအညီပေးရေးအဖွဲ့အစည်းတွေကိုတော့သွားရေးလားရေးကန့်သတ်ထားဆဲလို့သိရပါတယ်။

စစ်ကောင်စီက ရခိုင်ပြည်နယ်နဲ့ ချင်းပြည်နယ်ပလက်ဝကို လူသားချင်းစာနာမှုဆိုင်ရာ ကူညီထောက်ပံ့ရေးလုပ်ငန်းတွေကို ပိတ်ပင်တားမြစ်လိုက်တာဟာ စစ်ရာဇဝတ်မှုကျူးလွန်နေတာလို့ ကုလသမဂ္ဂလူအခွင့်အရေးဆိုင်ရာမဟာမင်းကြီးရုံးက ဇွန် ၃၀ ကထုတ်ပြန်တဲ့ အစီရင်ခံစာမှာဖော်ပြပါတယ်။

မိုခါမုန်တိုင်းဒဏ်ကြောင့် ရခိုင်ပြည်နယ်ရဲ့လူဦးရေ ၇၀ ရာခိုင်နှုန်းခန့်ဟာ အရေးပေါ်အမိုးအကာ နဲ့စားနပ်ရိက္ခာလိုအပ်နေတယ်လို့ ရက္ခိုင်အမျိုးသားအဖွဲ့ချုပ် ULA/AA ကထုတ်ပြန်ထားပါတယ်။

ပုံစာ- မုန်တိုင်းသင့်ရခိုင်ပြည်သူတွေကို WFP က အစားအစာအထောက်အပံ့ပေးအပ်သည့်မြင်ကွင်း
Photo – WFP


#Dailynews

အမျိုးအစား - သတင်း

"Myanmar Observer Media Group [MOMG] was founded in 2011 with aims to deeply observe challenging issues of Myanmar, to strongly encourage policy change through in-depth and investigative stories, and to vastly improve journalism skills among local journalists through trainings and workshops. The first edition of Mawkun came out in August 2012 after the censorship board was abolished. The magazine is published in Myanmar Language and its normal size is around 120 pages."