ရန်ကုန်- ၂၀၂၃၊ အောက်တိုဘာ ၁၆ (မော်ကွန်း)
ရန်ကုန်မြို့၊ ဒဂုံမြို့သစ် (အရှေ့ပိုင်း) မြို့နယ်က ရပ်ကွက် ကိုးခုမှာ ရေလွှမ်းနေရတာကြောင့် အကူအညီတွေလိုအပ်နေတယ်လို့ ဒဂုံမြို့သစ်(အရှေ့ပိုင်း) က လူမှုကူညီရေးအသင်းတာဝန်ခံကပြောပါတယ်။
“လှည်းကူးဘက်ကရေတွေကျလာပြီး ဒီမှာရေကြီးတာပါ။ ရေကရေသေလိုဖြစ်နေတယ်။ ပြန်မကျဘူး။ ပဲခူးတို့၊ လှည်းကူးတို့လို အလုံးအရင်းနဲ့ အိမ်တွေရေမြုပ်ကုန်တဲ့အထိတော့မဟုတ်ပါဘူး။ အနိမ့်ပိုင်းတွေမှာရေက ပေါင်လောက်ထိတက်တယ်။ အစားအစာနဲ့ ဆေးဝါးအကူအညီတွေလိုတယ်ဆိုလို့ ကျွန်တော်တို့တွေ ထမင်းထုပ်တွေလိုက်ဝေနေပါတယ်။” လို့ သူကပြောပါတယ်။
လက်ရှိဒဂုံမြို့သစ် (အရှေ့ပိုင်း) က ၁၁၈၊ ၁၁၉၊ ၁၃၀၊ ၁၃၁၊ ၁၃၂၊ ၁၃၆၊ ၁၃၈၊ ၁၅၅ နဲ့ ၁၅၆ စတဲ့ ရပ်ကွက်တွေ ရေလွှမ်းခံနေရတယ်လို့ လူမှုကူညီရေးအသင်းတွေကပြောပါတယ်။
ဒဂုံမြို့သစ်(အရှေ့ပိုင်း) မြို့နယ် ရေတက်လာတာနဲ့ ပတ်သက်ပြီး မိုးလေဝသနှင့်ဇလဗေဒညွှန်ကြားမှုဦးစီးဌာနရဲ့ညွှန်ကြားရေးမှူး ဦးလှထွန်းက “ ရန်ကုန်မြစ်တို့ ငမိုးရိပ်ချောင်းတို့ကို ရေအမှတ်တိုင်းတာတဲ့စနစ်တော့မရှိပါဘူး။ ဒါပေမယ့် ပြီးခဲ့တဲ့ ရက်ပိုင်းကရေကြီးခဲ့တဲ့ လှည်းကူးမြို့နယ်ကရေတွေဟာ ငမိုးရိပ်ချောင်းအတိုင်းစီးဆင်းလာပြီး ဒဂုံအရှေ့ပိုင်းမှာ ရေကြီးတာဖြစ်နိုင်တယ်” လို့သုံးသပ်ပါတယ်။
ဒဂုံအရှေ့ပိုင်းမြို့နယ် အပါအဝင် ရန်ကုန်မြို့က လူမှုကူညီရေးအသင်းတစ်ချို့ကလည်း ကူညီကယ်ဆယ်ရေး လုပ်ဖို့ ဒဂုံမြို့သစ်(အရှေ့ပိုင်း) ရပ်ကွက်တွေဆီသွားနေကြပြီလို့ပြောပါတယ်။
နှစ် ၆၀ အတွင်း စံချိန်တင်မိုးရွာသွန်းခဲ့တဲ့ ပဲခူးတိုင်းဒေသကြီးနဲ့ ရန်ကုန်တိုင်းဒေသကြီး လှည်းကူးမြို့နယ်တို့မှာ အခုလ ၇ ရက်က မိုးများပြီး ရေတက်လာတာကြောင့် လူဦးရေ ၁၂၀,၀၀၀ ကျော်ရေဘေးသင့်ခဲ့တယ်လို့ ကုလသမဂ္ဂအဖွဲ့အစည်း ရဲ့ မြန်မာနိုင်ငံသတင်းအချက်အလက်စီမံခန့်ခွဲမှုယူနစ်က ထုတ်ပြန်ထားပါတယ်။
ပုံစာ- ဒဂုံမြို့သစ်(အရှေ့ပိုင်း) ရေလွှမ်းမှုမြင်ကွင်း။
ဓာတ်ပုံ – Shwe Lei

