(၂၀၁၅၊ဇူလိုင်လထုတ်၊မော်ကွန်း မဂ္ဂဇင်း အမှတ်(၂၅) မှ အယ်ဒီတာအာဘော်ဖြစ်ပါသည်။)
ဖွဲ့စည်းပုံအခြေခံဥပဒေတွင်အရေးပါသောအချက်များအား ပြင်ဆင်ရေးမဲခွဲဆုံးဖြတ်မှုကိုဇွန်၂၅ ရက်က ပြည်ထောင်စုလွှတ် တော်တွင်မဲခွဲဆုံးဖြတ်ရာ၌ပုဒ်မ၅၉(ဃ)မှ စာစုတစ်ခုတည်းသာ ပြင်ဆင်ရန်လုံလောက်သော ထောက်ခံမဲ (၇၅ ရာခိုင်နှုန်း အထက်) ရရှိပြီး ကျန်အဆိုငါးခုမှာ ရှုံးနိမ့်ခဲ့ရသည်။
ထိုသို့ ရှုံးနိမ့်ခဲ့ရသည့်ပုဒ်မများအနက်အရေးကြီးဆုံးနှစ်ခုဖြစ်သည့် ပုဒ်မ၄၃၆(က) နှင့်(ခ)တို့လည်း ပါဝင်သည်။ ပုဒ်မ ၄၃၆(က) ၏လိုရင်းမှာ အခြေခံဥပဒေပါ အရေးကြီးပုဒ်မများကို ပြင်လိုလျှင် ပြည်ထောင်စုလွှတ်တော်ကိုယ်စားလှယ် အားလုံး၏ ၇၅ ရာခိုင်နှုန်းကျော်က သဘောတူလက်ခံပြီးနောက် ပြည်လုံးကျွတ်ဆန္ဒခံယူပွဲတွင်လည်း မဲပေးခွင့်ရှိသူအားလုံး၏ ထက်ဝက်ကျော်မဲဖြင့်သာ ပြင်ရမည်ဟုဆိုသည်။ ၄၃၆ (ခ)အရ ကျန်ပုဒ်မများကို ပြင်ဆင်ရာတွင်လည်း ပြည်ထောင်စုလွှတ် တော်ကိုယ် စားလှယ်အားလုံး၏ ၇၅ ရာခိုင်နှုန်းကျော်ထောက်ခံမဲဖြင့်သာ ပြင်ရမည်ဟုဆိုသည်။
အခြေခံဥပဒေပြင်ဆင်ရေးတွင် အရေးကြီးဆုံး ခေါင်ချုပ်အချက်များအား ပြင်ဆင်ရေးတွင် ရှုံးနိမ့်သွားခြင်းသည် လွှတ်တော်အတွင်း ရွေးကောက်ခံမဟုတ်ဘဲ လွှတ်တော်ထိုင်ခုံ ၂၅ရာခိုင်နှုန်းကို အလိုလျှောက်ရယူထားသော တပ်မတော် သားများက မထောက်ခံလျှင် မည်သည့်အရာမှ ပြောင်းလဲ၍မရဆိုသည့်အချက်ကို ဘွင်းဘွင်းရှင်းရှင်းကြီး ပေါ်လာခြင်းပင် ဖြစ်သည်။ တစ်နည်းအားဖြင့် မြန်မာနိုင်ငံ၏အနာဂတ်ကို ဆုံးဖြတ်ထုဆစ်မည့်သူမှာ တပ်မတော်သာဖြစ်ကြောင်းကို ကြောင် လက်သည်းထုတ်ပြလိုက်သည့် သဘောပင်ဖြစ်သည်။
သို့ဖြစ်ရာ တပ်မတော်သည် ၎င်းတို့၏ ဆန္ဒအလျောက် စစ်တန်းလျားကို ပြန်သွားလိမ့်မည်မဟုတ်ဘဲ တိုင်းပြည်ကို ဆက်လက်ချုပ်ကိုင်မောင်ပိုင်စီးကြလိမ့်ဦးမည်ဟူသော လူထု၏ သံသယကို ခိုင်မာသည်ထက် ခိုင်မာသွားစေသည်။ အကျိုးဆက်အဖြစ် တပ်မတော်နှင့် ပြည်သူကြား ရင်ကြားစေ့ရေးမှာ ခက်သည်ထက်ခက်ဖို့ရန်သာ ရှိလေတော့သည်။
ထို့အပြင် အခြေခံဥပဒေပြင်ဆင်ရန် လွှတ်တော်ထဲရောက်လာခြင်းဖြစ်သည်ဟုကြွေးကြော်ထားသည့်အမတ်များ နှင့် တပ်မတော်ကြားတွင်လည်း တင်းမာမှုပိုမိုဖြစ်ပွားနိုင်သည့်အလားအလာများရှိနေပါသည်။ ဤအတိုင်းသာ ဆက်သွားနေလျှင် ရွေးကောက်ပွဲအလွန် မြန်မာ့နိုင်ငံရေးအခင်းအကျင်းသည်လည်း ထွေထွေထူးထူးပြောင်းလာနိုင်စရာမရှိပါ။ ထို့အပြင် လက်ရှိ ရင်ဆိုင်ကြုံတွေ့နေရသော လက်နက်ကိုင်တိုင်းရင်းသားအဖွဲ့များနှင့် ငြိမ်းချမ်းရေးရယူရေးကိစ္စ အပါအဝင် အမျိုးမျိုး သောနိုင်ငံရေး အကျပ်အတည်းများမှာလည်း ပြေလည်နိုင်စရာမရှိဘဲ ကမ္ဘာ့အလယ်တွင် နိုင်ငံ့ဂုဏ်ဆက်လက်ကျဆင်းဖို့ သာရှိလေသည်။
အချုပ်အားဖြင့်ဆိုရလျှင် လွှတ်တော်ကိုယ်စားလှယ် ၂၅ရာခိုင်နှုန်းသဘောမတူလျှင် ဘာမှပြောင်းလဲမရသည့် အခြေအနေကို တိုက်ဖျက်ပစ်နိုင်မည့်နည်းလမ်းကိုမဖြစ်မနေရှာဖွေရတော့မည်ဖြစ်ပြီးထိုနည်းလမ်းရှာမရသေးသမျှ ဒီမိုကရေစီ ပြုပြင်ပြောင်းလဲရေး အမည်တပ်လုပ်ဆောင်သမျှတို့သည် သဲထဲရေသွန် အဟောသိကံသာဖြစ်ရတော့မည့် အခြေ အနေပင်ဖြစ်နေတော့သည်။ ထိုကဲ့သို့ လူများစုကံကြမ္မာကို လူနည်းစုဆုံးဖြတ်နေသည့်အခြေအနေအား အားလုံးပူးပေါင်း၍ အမြန်ဆုံး အဆုံးသတ်ရန် လိုအပ်နေပြီဖြစ်ကြောင်း ကျွနု်ပ်တို့မော်ကွန်းက တိုက်တွန်းအပ်ပါသည်။
မော်ကွန်းအယ်ဒီတာအဖွဲ့
(editors@mawkun.com)