ရန်ကုန် – ၂၀၂၄ ဖေဖော်ဝါရီ ၈ (မော်ကွန်း)
တိုက်ပွဲတွေ တဖြည်းဖြည်းနဲ့ ပိုမိုပြင်းထန်လာတဲ့ ရခိုင်ပြည်နယ်က ဒေသခံတွေဟာ အခုရက်ပိုင်းအတွင်း အများအပြားပြောင်းရွှေ့နေကြတာကြောင့် လေယာဉ်လက်မှတ်ဈေးနှုန်းတွေ ငါးဆနီးပါးမြင့်တက်နေတယ်လို့ ရွှေ့ပြောင်းလာသူတွေနဲ့ ဒေသခံတွေကပြောပါတယ်။
လေဆိပ်ရှိရာစစ်တွေမြို့မှာ ရန်ကုန်ကိုသွားလိုသူတွေများနေပြီး လေယာဉ်လက်မှတ်ရရှိဖို့လည်း ခက်ခက်ခဲခဲ မှာယူနေရတယ်လို့ စစ်တွေမြို့ခံတွေက ပြောပါတယ်။
“လေယာဉ်လက်မှတ်ရဖို့ အတော်မလွယ်ဘူး။ ကြိုပြီးဝယ်ထားကြတာ နှစ်ပတ်သုံးပတ်လောက် ကြိုမှာထားရတယ်။ အရင်တိုက်ပွဲမဖြစ်ခင်က ပုံမှန်ဆို စစ်တွေကနေရန်ကုန်ကို လေယာဉ်ခက ငါးသောင်းလောက်ပဲရှိတာ အခုက သုံးသိန်းခွဲ၊ လေးသိန်းနီးပါး၊ မကြားဖူးတဲ့ဈေးတွေဖြစ်နေတယ်” လို့ စစ်တွေမြို့ခံတစ်ဦးကပြောပါတယ်။
အခုရက်ပိုင်း ပြောင်းရွှေ့နေကြတာဟာ စစ်တွေမြို့ခံတွေတင်မကဘဲ ရခိုင်ပြည်နယ်မှာ တိုက်ပွဲတွေဖြစ်နေတဲ့ မြောက်ဦး၊ ရသေ့တောင်၊ ပုဏ္ဏားကျွန်း အစရှိတဲ့မြို့နယ်တွေက ဒေသခံတွေပါ ပါဝင်နေပြီး ပြောင်းရွှေ့သူများပြားတာကြောင့် စစ်တွေ-ရန်ကုန် လေယာဉ်လက်မှတ်တွေ ဝယ်ယူဖို့ အခက်အခဲတွေဖြစ်နေတာပါ။
ရခိုင်ပြည်နယ်က စစ်ကောင်စီ တပ်စခန်းတွေကို ထိုးစစ်ဆင်တိုက်ခိုက်နေတဲ့ ရက္ခိုင့်တပ်တော် (AA) ဟာ ပလက်ဝ၊ ကျောက်တော်၊ မြောက်ဦး၊ မင်းပြားနဲ့ ပေါက်တောမြို့တွေကို ထိန်းချုပ်သိမ်းပိုက်လိုက်ပြီး ပြည်နယ်ရဲ့ မြို့တော်ဖြစ်တဲ့ စစ်တွေမြို့ကိုပါ ဝိုင်းပတ်ပိတ်ဆို့လာပါတယ်။
စစ်တွေမြို့က ဒေသခံတစ်ဦးကတော့ AA ရဲ့ ထိုးစစ်ဟာ ရခိုင်မြောက်ပိုင်းကနေ တောင်ပိုင်းကို ဆင်းလာနေပြီး စစ်တွေမြို့ကို ပိတ်ဆို့ထားတာကြောင့် စစ်တွေမှာပါ တိုက်ပွဲတွေဖြစ်လာနိုင်တယ်လို့ ပြောပါတယ်။
“အခုက စစ်တွေကိုလာတဲ့ ရေလမ်း၊ ကုန်းလမ်းတွေကို AA က ထိန်းချုပ်လိုက်ပြီပြောလို့ရတယ်။ မြစ်ကြောင်းက Navy တွေနဲ့ပဲ သွားလို့ ရတော့တယ်။ စစ်တွေအပေါ်ပိုင်းက ပေါက်တောကို သိမ်းပြီးပြီ၊ ဒီဘက်က ပုဏ္ဏားကျွန်းတို့ ရသေ့တောင်တို့မှာလည်း တိုက်ပွဲတွေဖြစ်နေတော့ တဖြည်းဖြည်းနဲ့ စစ်တွေကို ဝိုင်းလာပြီပြောလို့ ရတယ်” လို့ စစ်တွေမြို့ခံတစ်ဦးက ပြောပါတယ်။
စစ်တွေမှာ ညမထွက်ရအမိန့်ကိုလည်း ယခုလဆန်းပိုင်းမှာ စစ်ကောင်စီက ထုတ်ပြန်ထားပြီး အခြေခံစားသောက်ကုန်ဈေးနှုန်းတွေနဲ့ စက်သုံးဆီဈေးနှုန်းတွေဟာလည်း မြင့်တက်နေတယ်လို့ ဒေသခံတွေက ပြောပါတယ်။
AA ဟာ တောင်ကုတ်-စစ်တွေ ကားလမ်းပေါ်က မြို့တွေဖြစ်တဲ့ မင်းပြား၊ ကျောက်တော်နဲ့ မြောက်ဦးမြို့တွေကို ရခိုင်ပြည်နယ်မှာ ၁၀၂၇ စစ်ဆင်ရေး စတင်ခဲ့တဲ့ ပြီးခဲ့တဲ့ နိုဝင်ဘာလတည်းက AA က ပိတ်ဆို့တိုက်ခိုက်ခဲ့ပြီး အခုရက်ပိုင်းမှာ အပြီးသတ်သိမ်းယူနိုင်ခဲ့တာပါ။
မင်းပြားမြို့က စစ်ကောင်စီတပ်ရင်းဖြစ်တဲ့ ခမရ – ၃၇၉ ကို ယခုလ ၅ ရက်က AA က သိမ်းယူခဲ့ပြီး မြောက်ဦးမြို့က ခမရ- ၃၇၇ နဲ့ ကျောက်တော်မြို့က စကခ -၉ နဲ့ ခမရ ၃၇၅ တို့ကိုလည်း မနေ့ကညနေပိုင်းမှာ AA က အပြီးသတ်သိမ်းပိုက်ခဲ့ပါတယ်။
AA ဟာ ပလက်ဝအခြေစိုက် တပ်ရင်းတွေဖြစ်တဲ့ ခလရ (၂၈၉)၊ စကခ (၁၉) တို့ကိုလည်း ပြီးခဲ့တဲ့လ ၁၄ ရက်က အပြီးသတ်သိမ်းပိုက်ပြီး ပလက်ဝမြို့ကို ထိန်းချုပ်သိမ်းပိုက်ထားပါတယ်။
ပြီးခဲ့တဲ့လ ၁၉ ရက်မှာ ပေါက်တောမြို့ကိုလည်း သိမ်းယူခဲ့ပြီး AA အနေနဲ့ ရခိုင်ပြည်နယ်အတွင်း မြို့ပေါင်း ငါးမြို့ထိ ထိန်းချုပ်ထားနိုင်တာပါ။
ရခိုင်ပြည်နယ်မှာ ပြီးခဲ့တဲ့ နိုဝင်ဘာလမှာ စစ်ကောင်စီနဲ့ AA တို့ တစ်ကျော့ပြန်တိုက်ပွဲတွေ ပြန်ဖြစ်လာပြီးနောက် ဒေသတွင်းက ကုန်းလမ်းနဲ့ ရေကြောင်းသွားလာမှုအားလုံးကို စစ်ကောင်စီက ဖြတ်တောက်ထားတာပါ။
ပြီးခဲ့တဲ့လ ၁၆ ရက်က ရခိုင်ပြည်နယ်က မြို့နယ်အားလုံးကို အင်တာနက်လိုင်းနဲ့ ဖုန်းလိုင်းတွေပါ ဖြတ်တောက်လိုက်ပြီး ရခိုင်ဒေသကို သတင်းအမှောင်ချထားလိုက်ပါတယ်။
လက်ရှိ ရခိုင်ပြည်နယ်အတွင်း MPT၊ Ooredoo၊ ATOM စတဲ့ ဖုန်းလိုင်းနဲ့ အင်တာနက်လိုင်းတွေ အသုံးပြုလို့မရတော့ဘဲ စစ်တပ်ပိုင် Mytel ဖုန်းလိုင်းတစ်ခုပဲ ရရှိနေတယ်လို့ ဒေသခံတွေက ပြောပါတယ်။
AA ဟာ ရခိုင်ပြည်နယ်မြောက်ပိုင်း၊ ဘင်္ဂလားဒေ့ရှ်နယ်စပ်အနီးက တောင်ပြို(လက်ဝဲ)နဲ့ တောင်ပြို(လက်ယာ) ဒေသတွေကိုလည်း ပြီးခဲ့တဲ့ ရက်ပိုင်းက သိမ်းပိုက်ပြီး ထိန်းချုပ်ထားပါတယ်။
နယ်စပ်မှာဖြစ်ပွားခဲ့တဲ့ တိုက်ပွဲတွေမှာ စစ်ကောင်စီတပ်က နယ်ခြားစောင့်တပ်ဖွဲ့ဝင် ၃၀၀ ကျော်ထိ ဘင်္ဂလားဒေ့ရှ်နိုင်ငံထဲ ဝင်ရောက် ထွက်ပြေးခိုလှုံခဲ့ရတယ်လို့ ဘင်္ဂလားဒေ့ရှ်သတင်းဌာန Dhaka Tribune က မနေ့က သတင်းဖော်ပြထားပါတယ်။
လက်ရှိမှာ စစ်ကောင်စီတပ်နဲ့ AA တို့ဟာ ရခိုင်ပြည်နယ်က ရသေ့တောင်၊ မောင်တော၊ ဘူးသီးတောင်၊ ပုဏ္ဏားကျွန်း၊ ရမ်းဗြဲနဲ့ ကျောက်ဖြူမြို့နယ်တို့မှာလည်း တိုက်ပွဲတွေ ဆက်လက်ပြင်းထန်လျက်ရှိပါတယ်။
ပုံစာ – မြောက်ဦးမြို့နယ်က စစ်ကောင်စီစခန်းသိမ်းပွဲမှ သိမ်းယူထားတဲ့ လက်နက်ခဲယမ်းတွေကို AA ပြသ
ဓာတ်ပုံ – AA Desk Info

