စစ်ကောင်စီတပ်သားနှစ်ဦး KNU ထံလက်နက်ချအလင်းဝင်၊ တစ်ဦးကို ကျပ်သိန်း ၄၀ စီထောက်ပံ့

စစ်ကောင်စီတပ်သားနှစ်ဦး KNU ထံလက်နက်ချအလင်းဝင်၊ တစ်ဦးကို ကျပ်သိန်း ၄၀ စီထောက်ပံ့

ရန်ကုန်-၂၀၂၃ စက်တင်ဘာ ၁၄ (မော်ကွန်း)

ကရင်ပြည်နယ်၊ ဆောထိမြို့နယ်အတွင်း သံဆိပ်စခန်းမှာနေတဲ့ စစ်ကောင်စီတပ် ခမရ-၃၅၀ က တပ်သားနှစ်ဦးဟာ ကရင်အမျိုးသားလွတ်မြောက်ရေးတပ်မတော် KNLA တပ်မဟာ ၃ ဆီ အခုလ ၁၁ ရက် မနက်ပိုင်းက လက်နက်တွေနဲ့အတူ အလင်းဝင်ခဲ့တယ်လို့ KNU က ဒီနေ့သတင်းထုတ်ပြန်ပါတယ်။

လက်နက်ချအလင်းဝင်လာတဲ့ စစ်ကောင်စီတပ်သားနှစ်ဦးဟာ အသက် ၂၅ နှစ်အရွယ် တပ်သား မောင်ဒဿနဲ့ ၂၁ နှစ်အရွယ် တပ်သားမောင်ဖြိုးကိုကိုတို့ဖြစ်ပြီး သူတို့နဲ့အတူ MA 1 တစ်လက်၊ MA 2 တစ်လက်နဲ့ ကျည် ၂၃၇ တောင့်တို့ကိုပါ ယူဆောင်ခဲ့တယ်လို့ ဆိုပါတယ်။

အဲဒီစစ်ကောင်စီတပ်သားနှစ်ဦးကို ခလယ်လွီထူခရိုင် တာဝန်ရှိသူတွေက တစ်ဦးကို ထောက်ပံ့ငွေ ကျပ်သိန်း ၄၀ စီ ပေးအပ်ခဲ့တယ်လို့ KNU က သတင်းထုတ်ပြန်ပါတယ်။

စစ်ကောင်စီတပ်သားတွေ အလင်းဝင်တာနဲ့ပက်သက်ပြီး အသေးစိတ်သိရဖို့ KNU ဗဟိုအလုပ်အမှုဆောင်ကော်မတီက တာဝန်ရှိသူကို မော်ကွန်းသတင်းဌာနအနေနဲ့ ဖုန်းနဲ့ဆက်သွယ်ထားပေမယ့် ဆက်သွယ်လို့ မရသေးပါဘူး။

အခုလ ၄ ရက်ကလည်း ဒူးပလာယာခရိုင် ကြာအင်းဆိပ်ကြီးမြို့နယ်အခြေစိုက် စစ်ကောင်စီလက်အောက်ခံတပ် ခလရ-၃၂ တပ်ရင်းက တပ်သား စိုင်းဖြိုးအောင်ဆိုသူတစ်ဦးလည်း KNLA တပ်ရင်း ၁၇၊ တပ်ခွဲ ၂ ကို လက်နက်နဲ့အတူ လာရောက်ပူးပေါင်းခဲ့တာကြောင့် ကျပ်သိန်း ၅၀ ထောက်ပံ့ငွေပေးအပ်ခဲ့ပါသေးတယ်။

အာဏာသိမ်းစစ်ကောင်စီလက်အောက်ခံတပ်တွေက ဘယ်စစ်သားမဆို တပ်ကိုစွန့်ခွာပြီး KNU နဲ့ ပြည်သူလူထုဆီ လက်နက်ခဲယမ်းနဲ့အတူ လာရောက်ပူးပေါင်းတဲ့ စစ်သားတွေကို နွေးထွေးစွာ ကြိုဆိုနေပြီး ရှေ့ဆက်ဘဝရပ်တည်ရေးအတွက်လည်း ကူညီထောက်ပံ့ပေးသွားမယ်လို့ KNUက ပြောထားပါတယ်။

အာဏာသိမ်းစစ်ကောင်စီဘက်ကတော့ စစ်ကောင်စီတပ်သားတွေ လက်နက်ချ အလင်းဝင်သွားတာတွေနဲ့ပတ်သက်ပြီး သတင်းတစ်စုံတစ်ရာထုတ်ပြန်ပြောဆိုတာမျိုး မတွေ့ရသေးပါဘူး။

ပုံစာ-အာဏာသိမ်းစစ်ကောင်စီတပ်ဆီကနေ KNUထံ အလင်းဝင်လာတဲ့ စစ်ကောင်စီတပ်သားနှစ်ဦး
ဓာတ်ပုံ-KNU


#Dailynews

အမျိုးအစား - သတင်း

"Myanmar Observer Media Group [MOMG] was founded in 2011 with aims to deeply observe challenging issues of Myanmar, to strongly encourage policy change through in-depth and investigative stories, and to vastly improve journalism skills among local journalists through trainings and workshops. The first edition of Mawkun came out in August 2012 after the censorship board was abolished. The magazine is published in Myanmar Language and its normal size is around 120 pages."