ရခိုင်ပြည်နယ်မှာ ရေလွှမ်းမိုးမှုကြောင့် မိုးစပါး ဧကခုနစ်သောင်းကျော်ပျက်စီး

ရခိုင်ပြည်နယ်မှာ ရေလွှမ်းမိုးမှုကြောင့် မိုးစပါး ဧကခုနစ်သောင်းကျော်ပျက်စီး

ရန်ကုန်-၂၀၂၃၊ ဩဂုတ် ၁၆ (မော်ကွန်း)

ရခိုင်ပြည်နယ်မှာ ဒီလဆန်းပိုင်းကမိုးအဆက်မပြတ်ရွာပြီး ရေလွှမ်းမှုကြောင့် မိုးစပါးဧကခုနှစ်သောင်းကျော်ပျက်စီးသွားခဲ့တယ်လို့ ရက္ခိုင်အမျိုးသားအဖွဲ့ချုပ် ULA က ဩဂုတ် ၁၄ မှာထုတ်ပြန်ပါတယ်။

ရက်ဆက်ရေကြီးမှုနဲ့ တောင်ကျရေစီးဆင်းမှုတို့ကြောင့် မိုးစပါးစိုက်ခင်းတွေရေမြုပ်ကာပျက်ကုန်ကြတာလို့ ရခိုင်ကတောင်သူတွေကပြောပါတယ်။

ရေကြီးမှုကြောင့်ရခိုင်ပြည်နယ်၊ ကျောက်တော်မြို့နယ်မှာ မိုးစပါးဧက ၁၂,၀၀၀ ကျော်ပျက်စီးသွားခဲ့ပြီး ဧကအများဆုံးပျက်ဆီးခဲ့တဲ့မြို့နယ်တစ်ခုဖြစ်ပါတယ်။

“ကျွန်တော်ကဧက၂၀၀စိုက်တာ၊ တစ်လစိုက်တာလည်းရှိတယ်၊ ၁၅ရက်စိုက်တာလည်းရှိတယ်။အခုတစ်လစိုက်ထားရတဲ့မိုးစပါးဧကတစ်ရာလောက်ပျက်သွားပြီ။ အသက်တူမျိုးတွေကိုရှာပြီးစိုက်ရတော့မှာ။
နောက်ထပ်တစ်လ၊ နှစ်လလောက်အချိန်ယူရတော့မှာ”လို့ ကျောက်တောင်မြို့နယ်ကတောင်သူ ဦးတင်ထွေးကပြောပါတယ်။

မေ ၁၄ ရက်ကဝင်ရောက်ခဲ့တဲ့မိုခါမုန်တိုင်းကြောင့် ဦးတင်ထွေးရဲ့နွေစပါးဧက ၁၀၀ လောက်ပျက်စီးသွားခဲ့ပါသေးတယ်။ အခုရေကြီးမှုမှာလည်းသူ့ရဲ့လယ်ဧက ၁၀၀ ထပ်မံပျက်စီးသွားခဲ့တာပါ။

မိုးစပါးတွေပြန်စိုက်ဖို့ဆိုတာကလည်း ရာသီဥတုအခြေအနေ၊ သွင်းအားစုတွေကိုဈေးသက်သက်သာသာရဖို့နဲ့ အလှူရှင်တွေရဲ့အကူအညီတွေလည်းအများကြီးလိုအပ်တယ်လို့သူကပြောပါတယ်။

မင်းပြားမြို့နယ်ကတောင်သူတစ်ဦးကလည်း “ဒီနှစ်တော့သီးထွက်နှုန်းလျော့နိုင်တယ်။ သွင်းအာစုနဲ့ရာသီဥတုအခြေအနေပေါ်လည်း မူတည်တယ်။ အခုကအချိန်နောက်ကျသွားတော့ အထွက်နှုန်းကောင်းအောင် သွင်းအားစုများများထည့်ရမှာ။ သွင်းအားစုလည်းမထည့်နိုင်ဘူး၊ ရာသီဥတုလည်းမကောင်ဘူးဆိုရင်တော့ အထွက်နှုန်းတော်တော်ကိုကျသွားမှာ”လို့ပြောပါတယ်။

ရခိုင်ပြည်နယ်မှာနွေစပါးကိုစိုက်ဧက ၁,၀၀၀ ခန့်သာ စိုက်ပျိုးလေ့ရှိပြီး မိုးစပါးကိုတော့ဧကသိန်းနဲ့ချီကာ အဓိကထားစိုက်ပျိုးကြပါတယ်။

ရခိုင်ပြည်နယ်တစ်ခုလုံးမှာမိုးစပါးစိုက်ဧကပေါင်း ၁၀ သိန်းကျော်ရှိပြီး ပြီးခဲ့တဲ့နှစ်ကလည်း ဧကကိုးသိန်းခန့်စိုက်ပျိုးခဲ့ပေမယ့်ရာသီဥတုဖောက်ပြန်မှုတွေကြောင့် ဧကတစ်သိန်းခန့်ပျက်စီးခဲ့ရတယ်လို့ ရခိုင်ပြည်နယ်တောင်သူလယ်သမားသမဂ္ဂအသင်းထံမှသိရပါတယ်။

လေဘေးနဲ့ရေဘေးဒဏ်ကို ထပ်ဆင့်ကြုံခဲ့ရတဲ့ရခိုင်ပြည်နယ်ကတောင်သူတွေကတော့ စပါးစိုက်ဖို့ကိုစိုးရိမ်နေကြပြီလို့ ပြောကြပါတယ်။

ပုံစာ- ဩဂုတ် ၈ ရက်၊ ရခိုင်ပြည်နယ်၊ မင်းပြားမြို့နယ်၊ မင်းဖူးကျေးရွာရေကြီးမှုမြင်ကွင်း။
ဓါတ်ပုံ- Cyclone MOCHA ERRCA


#Dailynews

အမျိုးအစား - သတင်း

"Myanmar Observer Media Group [MOMG] was founded in 2011 with aims to deeply observe challenging issues of Myanmar, to strongly encourage policy change through in-depth and investigative stories, and to vastly improve journalism skills among local journalists through trainings and workshops. The first edition of Mawkun came out in August 2012 after the censorship board was abolished. The magazine is published in Myanmar Language and its normal size is around 120 pages."