၂ဝ၁၈ သြဂုတ်လထုတ် မော်ကွန်းမဂ္ဂဇင်း အမှတ်(၅၇) မှ သတင်းဆောင်းပါးဖြစ်ပါသည်။
စာသင်ခန်းအတွင်းက စိန်ခေါ်မှု
၂ဝ၁၅ မသန်စွမ်းသူများ၏ အခွင့်အရေး ဥပဒေဆိုင်ရာ ပုဒ်မ ၂ဝ အရ မသန်စွမ်းသူတိုင်းဟာ အခြားသန်စွမ်းသူများ နည်းတူ ပညာသင်ယူခွင့်ရှိသလို အစိုးရပိုင်၊ အများပိုင်၊ ပုဂ္ဂလိက ပိုင်နဲ့ အဖွဲ့အစည်းပိုင်ကျောင်းများ၊ သင်တန်းများ၊ အသက်မွေး ဝမ်းကျောင်းများ၊ သိပ္ပံများ၊ ကောလိပ်နဲ့ တက္ကသိုလ်များတွင် လည်း ပညာသင်ယူခွင့်ရှိတယ်လို့ ဖော်ပြထားပါတယ်။
ဒါပေမဲ့ ကျောင်းစာသင်ခန်းထဲ ရောက်လာတဲ့ မသန်စွမ်း ကျောင်းသားတွေကို ဘယ်လိုသင်ကြားပေးရမလဲဆိုတဲ့ တတ် ကျွမ်းနားလည်တဲ့ ဆရာတွေက ကျောင်းတိုင်းမှာ မရှိသေးသလို သင်ထောက်ကူပစ္စည်းတွေလည်း မရှိသေးဘူးလို့ မသန်စွမ်းသူ များ ပညာရေးဆိုင်ရာ ဆောင်ရွက်သူတွေက ဆိုကြပါတယ်။
အနောက်ပိုင်းတက္ကသိုလ်မှာ ဒဿနိကဗေဒဘာသာရပ်နဲ့ နောက်ဆုံးနှစ်တက်နေတဲ့ အမြင်အာရုံမသန်စွမ်းသူ ကိုသန်း ထွဋ်ဝင်းအတွက်တော့ တက္ကသိုလ်က ထုတ်ပေးထားတဲ့ ပုံနှိပ် စာအုပ်က ဘာမှ အသုံးမဝင်ဘူးလို့ ဆိုပါတယ်။ သူ့အတွက် လို အပ်တာဟာ ကျောင်းပုံနှိပ်စာအုပ်တွေကို အမြင်အာရုံ မသန်စွမ်း သူတွေ ဖတ်နိုင်အောင်လုပ်ပေးထားတဲ့ ဘရေး (Braille) စာပဲ ဖြစ်ပါတယ်။
ဘရေးစာဆိုတာကတော့ စာရွက်ပေါ်မှာ အစက်ကလေး တွေ ဖောက်ထားတာဖြစ်ပြီး အဲဒီအစက်တွေကို လက်ထိပ်နဲ့ စမ်း သပ်ပြီး ဖတ်ရတာဖြစ်ပါတယ်။ စာရေးသားဖို့ဆိုရင် ဆူးတစ် ချောင်းရယ်၊ အစက်ကလေးတွေ ချနိုင်အောင် အကွက်ဖော်ထား တဲ့ စာရေးပေါင်နဲ့ စာရွက်သားထူထူရယ် လိုအပ်တာဖြစ်ပါတယ်။
ယခင်နှစ်တွေတုန်းကတော့ ကျောင်းက ထုတ်ပေးတဲ့ ပုံနှိပ် စာအုပ်ကို ခဝဲခြံ မျက်မမြင်သင်တန်းကျောင်းမှာ ဘရေးစာ အဖြစ် ပြန်လည်ထုတ်လုပ်ပေးပါတယ်။ ဒီနှစ်မှာတော့ တခြား ဦးစားပေးဘာသာရပ်ဆိုင်ရာ စာအုပ်တွေ များနေတာကြောင့် သူ့အတွက် ဘရေးစာအုပ်တွေ မရသေးလို့ ဒီနှစ်အတွက် စာ တစ်လုံးမှ မရသေးဘူးလို့ ဆိုပါတယ်။
ကျောင်းမှာတော့ ဆရာမတွေက ရှင်းပြတာကို ဖုန်းနဲ့ အသံသွင်းထားပြီး အိမ်မှာ ပြန်နားထောင်ဖြစ်တယ်လို့ သူက ဆို ပါတယ်။
သူ့စိတ်ဆန္ဒကတော့ ကျောင်းတိုင်းမှာ ဘရေးပုံနှိပ်စာအုပ် တွေ ထုတ်ပေးစေချင်သလို စာမေးပွဲ ဖြေတဲ့အခါမှာလည်း တခြားလူကို တစ်ဆင့်ပြန်ရေးခိုင်းတာထက် ဘရေးစာနဲ့ပဲ ဖြေ ဆိုချင်တယ်လို့ ဆိုပါတယ်။
အကြောင်းကတော့ တက္ကသိုလ်ဝင်တန်းမှာဖြစ်ဖြစ်၊ တက္ကသိုလ်မှာဖြစ်ဖြစ် ဘာသာရပ်တိုင်းကို အင်္ဂလိပ်လို သင်တာ ဖြစ်လို့ တစ်ဆင့် စာပြန်ရေးပေးတဲ့ စာမေးပွဲအကူက စာလုံး ပေါင်းမသိရင် ပေါင်းပြရတာ၊ မေးခွန်းနားမလည်ရင် ပြန်ဖတ်ရ တာတွေဟာ စာမေးပွဲအချိန် သက်သက်ကုန်စေတာကြောင့်ဖြစ် တယ်လို့ သူက ဆိုပါတယ်။
ဒါကြောင့် ကျောင်းတွေမှာ ဘရေးစာကို နားလည်တဲ့သူ တွေကို ခန့်အပ်ထားပြီး စာမေးပွဲစနစ်ကို ဖြေရှင်းပေးစေချင် တယ်လို့ သူက ဆိုပါတယ်။
