ဗမာအမျိုးသားတော်လှန်ရေးတပ်မတော် BNRA ထံ လေးလအတွင်း အလင်းဝင်လာသူ ၁၀ ဦးရှိ

ဗမာအမျိုးသားတော်လှန်ရေးတပ်မတော် BNRA ထံ လေးလအတွင်း အလင်းဝင်လာသူ ၁၀ ဦးရှိ

ပုလဲ – ၂၀၂၅ မတ် ၁၄ (မော်ကွန်း)

ဗမာအမျိုးသားတော်လှန်ရေးတပ်မတော် BNRA ထံ ပြီးခဲ့တဲ့နှစ် ဒီဇင်ဘာကနေ ဒီနှစ်မတ်လအထိ

မကွေးတိုင်း၊ ပုလဲမြို့ခံတပ်နဲ့ စစ်ကိုင်းတိုင်း တပ်မ ၃၃ က စစ်ကောင်စီတပ်စစ်သား ၁၀ဦးအလင်းဝင်လာခဲ့တယ်လို့ BNRA ဗဟိုသတင်းနဲ့ ပြန်ကြားရေးက တာဝန်ရှိသူတစ်ဦးကပြောပါတယ်။

အလင်းဝင်လာသူတွေထဲမှာ အတင်းအဓမ္မ စစ်သားစုဆောင်းခံထားရတဲ့ ပြည်သူ့စစ်တွေပါဝင်ပြီး စစ်ကောင်စီယန္တရားအောက်မှာမလွဲသာမရှောင်သာ ရောက်ရှိခဲ့ရပေမယ့် အခါခွင့်သင့်တဲ့အခါ ချိတ်ဆက်ပြီး လွတ်မြောက်အောင်ကြိုးစားခဲ့ကြတယ်လို့ သူကပြောပြပါတယ်။

“ အလင်းဝင်လာသူတွေကို ကျွန်တော်တို့အနေနဲ့ သူတို့သွားလိုတဲ့နေရာကိုပို့ပေးခဲ့ပါတယ်၊ တချို့ကျ သွားမယ့်နေရာက ဘေးကင်းလုံခြုံရာနေရာဖြစ်လို့ ပို့ပေးခဲ့ပါတယ်၊ တချို့ကျတော့ သီးသန့် တပ်ကနေ တဆင့် ဘေးကင်းလုံခြုံတဲ့နေရာတွေကို ပို့ပေးရပါတယ်” လို့ ဗဟိုသတင်းနဲ့ ပြန်ကြားရေးက တာဝန်ရှိသူတစ်ဦးကပြောပါတယ်

ပုလဲမြို့ခံတပ်ကနေ မတ်လ ၆ ရက်မှာ လက်နက်နဲ့အတူ အလင်းဝင်လာတဲ့ တပ်သား နှစ်ဦး ကို ငွေကျပ်သိန်း ၂၀ စီ ဆုချီးမြှင့်ခဲ့တယ်လို့ BNRAဗဟိုသတင်းနဲ့ ပြန်ကြားရေးက သတင်းထုတ်ပြန်ပါတယ်။

ပြည်သူ့ပန်းတိုင်အဖွဲ့က ကိုနောင်ရိုးကတော့ စစ််မှုထမ်းဥပဒေထွက်ခါပြီးနောက် မြေပြင်မှာ တပ်သားသစ်တွေများလာသလို အလင်းဝင်တဲ့အထဲမှာလည်း တပ်သားသစ်တွေများတယ်လို့ မော်ကွန်းကိုပြောပါတယ်။

“ စစ်မှုထမ်းဥပဒေ မထွက်လာခင် နဲ့ဥပဒေ ထွက်လာပြီးနောက်ပိုင်း စစ်မှုထမ်းသင်တန်းခေါ်ပြီးနောက် အလင်းဝင်မှုအခြေနေအများကြီးကွာခြားသွားတယ်၊ ဒီ နှစ်ဆန်းကစပြီး တော့ အလင်းဝင်ပူးပေါင်းလာသူထဲမှာ စစ်မှုထမ်းဆင်းတပ်သားသစ်တွေအများစုပါလာတယ်” လို့ ပြည်သူ့ပန်းတိုင်အဖွဲ့ က ကိုနောင်ရိုးကပြောပါတယ်၊

ပြီးခဲ့တဲ့ နှစ် နှစ်လယ်လောက်ထိ ပြည်သူ့ဘက် ပူးပေါင်းလာတဲ့ စစ်ကောင်စီတပ်စစ်သားနဲ့ရဲ လစဥ် တစ်လကို ၄၀ နဲ့ ၅၀ ကြားရှိပေမယ့် ပြီးခဲ့တဲ့ နှစ် ၁၀ လပိုင်းကစပြီး တစ်လကို ရာဂဏန်းနီးပါး အလင်းဝင်လာကြပြီး အများစုက စစ်မှုထမ်းဆင်းတပ်သားသစ်တွေဖြစ်တယ်လို့ကိုနောင်ရိုးကပြောပါတယ်။

ဗိုလ်နဂါးဦးဆောင်တဲ့ ပုလဲမြို့နယ်အခြေစိုက် BNRA အဖွဲ့ဟာ ပြီးခဲ့တဲ့နှစ်ထဲမှာ ပုလဲမြို့သိမ်းတိုက်ပွဲ ဖော်ဆောင်ဖူးပြီးမအောင်မြင်ဘဲ ဆုတ်ခွာခဲ့ရကာ ပုလဲကျေးလက်ဒေသကို ထိန်းချုပ်ထားတဲ့အဖွဲ့ ဖြစ်ပါတယ်။

ပုံစာ – BNRA ထံ အလင်းဝင်လာသည့်စစ်ကောင်စီတပ်သားများ

ဓာတ်ပုံ – BNRA

အမျိုးအစား - သတင်း

"Myanmar Observer Media Group [MOMG] was founded in 2011 with aims to deeply observe challenging issues of Myanmar, to strongly encourage policy change through in-depth and investigative stories, and to vastly improve journalism skills among local journalists through trainings and workshops. The first edition of Mawkun came out in August 2012 after the censorship board was abolished. The magazine is published in Myanmar Language and its normal size is around 120 pages."