နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကိုတရုတ်အစိုးရက ကော်ဇောနီခင်းပြီး လှိုက်လှဲစွာကြိုဆိုခဲ့သော ပုံရိပ်သည် မြန်မာ့ဒီမိုကရေစီအရေး လှုပ်ရှားမှုကို လုံးဝထောက်ခံအားပေးခြင်းမရှိခဲ့သော ယခင်ပုံရိပ်ဟောင်းနှင့်အဖြူ၊ အမည်းကဲ့သို့ ဖီလာဆန့်ကျင်နေပါသည်။
ဤအခင်းအကျင်းကိုကြည့်ပြီး တရုတ်အစိုးရသည် မြန်မာနိုင်ငံပြုပြင်ပြောင်းလဲရေးကို ကြိုဆိုအားပေးထောက်ခံသည်ဟ ုရှုမြင်ပါက တက်တက်စင်အောင် လွဲပါလိမ့်မည်။ အကြောင်းမူ တရုတ်အစိုးရသည်နိုင်ငံတကာတွင ်အသစ်တက်လာသော မည်သည့်အစိုးရမျိုးနှင့်မဆိုတည့်အောင်ပေါင်းပြီး ၎င်းတို့၏အကျိုးစီးပွားကိုသာ တစ်စိုက်မတ်မတ ်ရှေးရှုလုပ်ဆောင်တတ်သောကြောင့်ဖြစ်ပါသည်။
ဒေါ်အောင်ဆန်းစုကြည်၏ တရုတ်နိုင်ငံခရီးစဉ်အတွင်း ပြည်တွင်းပြည်ပကစိတ်ဝင်စားမှုအရှိဆုံးကိစ္စမှာ ဦးသိန်းစိန်လက်ထက်ကဆိုင်းငံ့ခဲ့သော မြစ်ဆုံဆည်ကိစ္စဖြစ်ပါသည်။ ၎င်းကိစ္စသည် ဖွံ့ဖြိုးရေးအမြင်မှကြည့်သူများနှင့် သဘာဝပတ်ဝန်းကျင်ထိန်းသိမ်းရေးအမြင်မှ ရှုမြင်သူများကြား အခြေအတင်ငြင်းခုန်စရာ အခြေအနေကိုကျော်လွန်ကာ တရုတ်-မြန်မာဆက်ဆံရေးကိုအကဲခတ်တိုင်းတာနိုင်သည့် အညွန်းကိန်းကဲ့သို့ဖြစ်နေသောကြောင့် စိတ်ဝင်စားကြခြင်းလည်းဖြစ်ပါသည်။
ဦးသိန်းစိန်အစိုးရက ပြီးပြတ်အောင် မရှင်းခဲ့ဘဲနောက်အစိုးရကိုလက်ဆင့်ကမ်းခဲ့သည့် ဆိုးမွေများထဲမှတစ်ခုဖြစ်သည့်မြစ်ဆုံဆည်နှင့်ပတ်သက်ပြီးစိစစ်ရန် ကော်မရှင်ဖွဲ့စည်းထားကြောင်း မြန်မာဘက်မှပြောဆိုထားပါသည်။ အမှန်တကယ်လည်း မြစ်ဆုံဆည်ကိစ္စသည် ပြန်လည်စိစစ်ရမည့်ကိစ္စဖြစ်ပါသည်။
စင်စစ်တွင် မြစ်ဆုံဆည်ပြန်လည်တည်ဆောက်ခွင့်ရရေးသည် တရုတ်အစိုးရအတွက်သိက္ခာဆည်ရမည့်ကိစ္စဖြစ်သော် လည်းတစ်ဘက်ကကြည့်လျှင်ရေရှည်စီးပွားရေးအမြင်နှင့် ပထဝီနိုင်ငံရေးအရ မြစ်ဆုံဆည်ထက်ပိုမိုအရေးကြီးသော အကျိုးစီးပွားများ မြန်မာနိုင်ငံတွင်အများအပြားရှိနေရာ ကျန်အကျိုးစီးပွားများကိုအထိခိုက်ခံလိမ့်မည်မဟုတ်ပါ။ အဆိုပါအကျိုးစီးပွားများထဲတွင် မြန်မာ့ကမ်းရိုးတန်းအား ၎င်းတို့ကမ်းရိုးတန်းသဖွယ် အသုံးချခွင့်ရရေးလည်း ပါဝင်ပါလိမ့်မည်။
မြန်မာနိုင်ငံခြားရေးဝန်ကြီးလည်းဖြစ်သည့် ဒေါ်အောင်ဆန်းစုကြည်၏ ခရီးစဉ်အတွင်း တရုတ်အစိုးရက မြန်မာ့ငြိမ်းချမ်းရေးဆွေးနွေးပွဲကိုပါဝင်ကူညီမည်ဖြစ်ကြောင်းနှင့် မြန်မာနိုင်ငံအတွင်း ရင်းနှီးမြှုပ်နှံမှုများလည်း ထပ်မံပြုလုပ်ဦးမည်ဟုဆိုသော်လည်းတစ်ဘက်တွင် မြန်မာဘက်မှ ပြန်လည်ပေးဆပ်ရမည့် အရာများကိုလည်း ထည့်သွင်းစဉ်းစားထားသင့်ပါသည်။အာဖဂန်နစ္စတန်နိုင်ငံငြိမ်းချမ်းရေးဆွေးနွေးပွဲတွင် တရုတ်ပါဝင်လာခြင်းသည် ၎င်း၏အကျိုးစီးပွားကိုအခြေခံပြီးပါဝင်ခဲ့ခြင်းဖြစ်သကဲ့သို့ မြန်မာ့ငြိမ်းချမ်းရေးဆွေးနွေးပွဲတွင် ပါဝင်လာမှုသည်လည်း ၎င်း၏အကျိုးစီးပွားကိုအခြေခံကာ ပါဝင်လာခြင်းဖြစ်ပါသည်။
စီးပွားရေးရင်းနှီးမြှုပ်နှံမှုများပြုလုပ်သည့်အပိုင်းကို ကြည့်မည်ဆိုလျှင်လည်းတရားဥပဒေစိုးမိုးမှုအားနည်းသော နိုင်ငံများတွင် တရုတ်စီးပွားရေးလုပ်ငန်းရှင်များသည် ဒေသခံများကိုချနင်းသည့်ဖြစ်ရပ်များနှင့် လူ့အခွင့်အရေးချိုးဖောက်သည့်ဖြစ်ရပ်များရှိခဲ့သည်ကို နိုင်ငံတကာတွင်သာမက ပြည်တွင်းမှာပါ မျက်မြင်ကြုံတွေ့ခဲ့ကြရပြီး ဖြစ်သည်။
သို့ဖြစ်ရာ အိမ်နီးချင်းနိုင်ငံနှင့် နွေးထွေးသောဆက်ဆံရေး တည်ဆောက်နိုင်ရေးသည ်လွန်စွာအရေးကြီးသကဲ့သို့ တစ်ဘက်တွင်လည်း လူ့အခွင့်အရေးလေးစားလိုက်နာခြင်းမရှိသော အဆိုပါအင်အားကြီးနိုင်ငံ၏ နိုင်ငံရေး၊ စီးပွားရေးအရ ဝါးမြိုခံရမည့်ဘေးကိုလည်း စဉ်ဆက်မပြတ်စောင့်ကြည့်ကာ ဂရုမူသင့်ပါကြောင်း ကျွန်ုပ်တို့မော်ကွန်းက တိုက်တွန်းအပ်ပါသည်။ ။