NCA စာချုပ်ကို ကိုယ်နှစ်သက်ရာအကောင်အထည်ဖော်ပြီး မနှစ်သက်တာတွေကိုဖယ်ထားတာမျိုးမလုပ်ဖို့ ဒေါ်အောင်ဆန်းစုကြည်သတိပေး

ဂေထော၊ ရန်ကုန်။
ဇန်နဝါရီ-၈

တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA) မှာ ကိုယ်နှစ်သက်တဲ့အချက်တွေပဲ အကောင်အထည် ဖော်ကာ မနှစ်သက်တာတွေကိုဖယ်ထားတာမျိုးမလုပ်ကြဖို့ လက်မှတ်ရေးထိုးထားသူတွေကို နိုင်ငံတော် အတိုင်ပင်ခံပုဂ္ဂိုလ်၊ ဒေါ်အောင်ဆန်းစုကြည်က သတိပေးပါတယ်။

တရားဝင်အစည်းအဝေးတွေ ၁၅ လလောက် ရပ်တန့်နေရာကနေ နေပြည်တော်မှာ အစိုးရ၊လွှတ်တော်၊တပ်မတော်နဲ့ NCA လက်မှတ်ရေးထိုးထားတဲ့ တိုင်းရင်းသားလက်နက်ကိုင်(၁၀) ဒီနေ့ တရားဝင် ပြန်လည်ကျင်းပနေတဲ့ ၈ကြိမ်မြောက်၊ တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် အကောင်အထည်ဖော်ရေးညှိနှိုင်းအစည်းအဝေး(JICM) အဖွင့် မိန့်ခွန်းမှာ သူကပြောခဲ့တာပါ။

“ အစုအဖွဲ့တစ်ဖွဲ့က ဒီလိုပုံစံမျိုး လိုချင်တာကိုပဲ ကွက်ပြီးယူမယ်၊ မကြိုက်တာဆိုရင် ရှောင်လွှဲနေမယ်ဆိုရင် ကျန်တဲ့ အစုအဖွဲ့တွေအားလုံးမှာလည်း အခက်အခဲတွေဖြစ်လာစေပြီး ငြိမ်းချမ်းရေးလုပ်ငန်းစဉ်အတွက် အကျပ်အတည်းတွေ ဆက်တိုက်ဖြစ်ပေါ်လာစေနိုင်ပါတယ်” လို့ ဒေါ်အောင်ဆန်းစုကြည်က ပြောတယ်။
“ စာချုပ်ပေါ်မှာ ရေထိုးထားတဲ့ လက်မှတ်တွေဟာ ကတိသစ္စာ တည်ကြည်မှုနဲ့ မှန်ကန်ဖြောင့်မတ်မှုကို ကိုယ်စားပြုပါတယ် ” လို့ သူက သတိပေးတယ်။

သူ့အစိုးရအနေနဲ့ ဒီစာချုပ်မှာ ပါဝင်လက်မှတ်ရေးထိုးထားတာမဟုတ်ပေမယ့် အစိုးရတစ်ခုနဲ့တစ်ခု လွှဲပြောင်းတာဝန် ထမ်း ဆောင်တဲ့အခါ အစိုးရအစဉ်အဆက် တာဝန်ရှိမှု၊ တာဝန်သိမှုကိုပါ လွှဲပြောင်းရယူ ထမ်းဆောင်ရတာကြောင့် ဒီစာချုပ် အပေါ်မှာ ခိုင်ခိုင်မာမာရပ်တည်ဆောင်ရွက်ခဲ့တာလို့လည်း အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန ဥက္ကဌဖြစ်တဲ့ ဒေါ်အောင်ဆန်းစုကြည်က ဆိုပါတယ်။

ဒီနေ့ကျင်းပတဲ့ JICM အစည်းအဝေးကနေ လာမယ့် ၄ ကြိမ်မြောက် ပြည်ထောင်စုငြိမ်းချမ်းရေးညီလာခံမှာ ဆွေးနွေး နိုင်ဖို့ အချက်တွေကို ညှိနှိုင်းအတည်ပြုကြဖို့လည်း ဒေါ်အောင်ဆန်းစုကြည်ကပြောပါတယ်။ ၃ ကြိမ်ကျင်းပပြီးတဲ့ ညီလာခံတွေအတွင်း ပြည်ထောင်စုသဘောတူညီချက် ၅၁ ရရှိထားပေမယ့် “ ကျွန်မတို့အားလုံးမျှော်မှန်းထားတဲ့ ပြည်ထောင်စု အိမ်မက်အတွက် လုံလောက်တဲ့ အခြေခံမူတွေတော့ မဟုတ်သေးပါဘူး” လို့ သူကပြောတယ်။

ဒါအပြင် ၂၀၂၀ အလွန် NCA အကောင်အထည်ဖော်မှုနဲ့ ငြိမ်းချမ်းရေးလုပ်ငန်းစဉ်ကို ဘယ်လိုဖော်ဆောင်ကြမလဲဆိုတာနဲ့ ပတ်သက်လို့ အားလုံးသဘောတူလက်ခံနိုင်ပြီး သေချာရေရာတဲ့ လုပ်ငန်းစဉ်တွေ၊ ဦးစားပေးအစီအစဉ်တွေ ချမှတ်နိုင်ဖို့ လည်း အထူးအရေးကြီးတယ်လို့ ဒေါ်အောင်ဆန်းစုကြည်က သတိပေးပါတယ်။

နေပြည်တော်မှာ ကျင်းပနေတဲ့ ၈ ကြိမ်မြောက် JICM အစည်းဝေးမှာ အစိုးရ၊ လွှတ်တော်၊ တပ်မတော်အပြင် NCA လက်မှတ်ထိုးထားတဲ့ ကရင်အမျိုးသား အစည်းအရုံး(KNU)၊ ရခိုင်လွတ်မြောက်ရေးပါတီ(ALP) ကရင်အမျိုးသားအစည်းအရုံး/ ကရင်အမျိုးသား လွတ်မြောက်ရေး တပ်မတော်- ငြိမ်းချမ်းရေးကောင်စီ (KNU/KNLA-PC)၊ ဒီမိုကရေစီအကျိုးပြုကရင့်တပ်မတော်(DKBA)၊ သျှမ်းပြည်ပြန်လည်ထူထောင်ရေးကောင်စီ(RCSS)၊ ပအိုဝ့်အမျိုးသား လွတ်မြောက်ရေးအဖွဲ့ချုပ်(PNO)၊ လားဟူဒီမိုကရက်တစ်အစည်းအရုံး(LDU)၊ မွန်ပြည်သစ်ပါတီ(NMSP)၊ ချင်းအမျိုးသား တပ်ဦး(CNF)၊ မြန်မာနိုင်ငံလုံးဆိုင်ရာကျောင်းသားများ ဒီမိုကရက်တစ်တပ်ဦး(ABSDF) တို့ ပါဝင်ဆွေးနွေးနေကြတာ ဖြစ်ပါတယ်။

photo by myanmar state counsellor office


#dailynews


 

အမျိုးအစား - သတင်း

"Myanmar Observer Media Group [MOMG] was founded in 2011 with aims to deeply observe challenging issues of Myanmar, to strongly encourage policy change through in-depth and investigative stories, and to vastly improve journalism skills among local journalists through trainings and workshops. The first edition of Mawkun came out in August 2012 after the censorship board was abolished. The magazine is published in Myanmar Language and its normal size is around 120 pages."