(၂၀၁၅၊နိူဝင်ဘာလထုတ်၊ေမာ်ကွန်း မဂ္ဂဇင်း အမှတ်(၁၈) မှ အယ်ဒီတာအာဘော်ဖြစ်ပါသည်။)
တပ်မတော်အစိုးရမှ အရပ်သားအစိုးရသို့ ကူးပြောင်းလာချိန်တွင် အုပ်ချုပ်ရေးကဏ္ဍနှင့် ဥပဒေပြုရေး ကဏ္ဍတို့၌ ပြုပြင်ပြောင်းလဲမှုများကို အထိုက်အလျောက်တွေ့လာရသော်လည်း တရားစီရင်ရေးကဏ္ဍတွင်မူ သိသာထင်ရှားသော ပြုပြင်ပြောင်းလဲမှုဟူ၍ မတွေ့ရသေးပေ။
ဤသို့ဖြစ်နေရခြင်းမှာ ဆယ်စုနှစ်အတန်ကြာ လွှမ်းမိုးခြယ်လှယ်ချုပ်ကိုင်ခဲ့သော အုပ်ချုပ်ရေးယန္တရားကပဲ ၎င်း၏ အာဏာစက်အောက်မှ တရားစီရင်ရေးကဏ္ဍကိုလွှတ်မပေးသေး၍လား၊ သို့တည်းမဟုတ်အုပ်ချုပ်ရေးမဏ္ဍိုင်၏ လောင်းရိပ်အောက်တွင် ဆက်လက်မှေးစက်နေရင်းဖြင့်ရရှိလာနိုင်မည့် အကျိုးလာဘ်လာဘများကို မျှော်ကိုးနေ၍လား ဆိုသည်မှာ မေးခွန်းထုတ်စရာဖြစ်နေပါသည်။
ဥပဒေရေးရာကျွမ်းကျင်သူများ၏ ပြောဆိုမှုများကို ဆန်းစစ်ကြည့်မည်ဆိုလျှင်တော့ အုပ်ချုပ်ရေးမဏ္ဍိုင်က ယနေ့ထက် တိုင်တရားစီရင်ရေးကို သူ့တောင်ပံအောက်မှ လွှတ်မပေးချင်သေးသည့်အနေအထားကို တွေ့ရသည်။ သူတို့၏ အကျိုးစီးပွားကို ကာကွယ်နိုင်ရေးအတွက် တရားစီရင်ရေးယ္တရားကို ဆက်လက်အသုံးချ လျက်ရှိပါသည်။ အထူးသဖြင့် တပ်မတော်ပိုင်းနှင့် ပတ်သက်လာလျှင် ထိုအချက်မှာ ပို၍ပေါ်လွင်တတ်သည်ဟု ဥပဒေပညာရှင် အတော်များများက မှတ်ချက်ပြုသည်။
မကြာသေးခင်က ဖြစ်ပွားခဲ့သော ကိုပါကြီး(ခ)ကိုအောင်ကျော်နိုင် အသတ်ခံရမှုနှင့်ပတ်သက်ပြီး မည်သို့ စုံစမ်းစစ်ဆေးပြီး မည်မျှပွင့်လင်းကာတရားမျှတမှုရှိမလဲဟူသည်မှာလည်း လူအများစုစိတ်ဝင်စားသည့် ကိစ္စတစ်ခု ဖြစ်နေပါသည်။
တစ်ဖက်တွင်လည်း တရားစီရင်ရေးမဏ္ဍိုင်သည် လာဘ်စားမှုများ၊ အဂတိလိုက်စားမှုများရှိနေသည်ဟူ၍လည်း ဥပဒေပြုလွှတ်တော်တွင် ထောက်ပြမှုများရှိနေသည်။ စီးပွားရေးကျပ်တည်းမှုကိုအကြောင်းပြကာ ခြစားချင်တိုင်း ခြစား၍ရသည့် အရင်းအမြစ်ကြီးအဖြစ် တရားစီရင်ရေးကဏ္ဍကို သဘောထားနေသူများ ရှိနေသမျှ လူထုအမြင်တွင် တရားစီရင်ရေးမဏ္ဍိုင်သည် ခြတောင်ပို့သဖွယ် ဖြစ်နေဦးမည်ဖြစ်သည်။
နှစ်ပေါင်းများစွာ ငှက်သိုက်ကြီးတစ်ခုကဲ့သို့ ရှုပ်ထွေးလှသော တရားစီရင်ရေးကို ပွင့်လင်းမြင်သာမှု ရှိရေးနှင့် သမာသမတ်ကျကာ ဘက်လိုက်မှုကင်းသည့်အခြေအနေသို့ရောက်အောင် စွမ်းဆောင်ရန်မှာ လွယ်ကူသည့် ကိစ္စမဟုတ်ဘဲ ကာလအတန်ကြာ အချိန်ယူရလိမ့်မည်ဟု ပညာရှင်များက ခန့်မှန်းထားကြပါသည်။
ဒီမိုကရေစီနိုင်ငံတော်သို့သွားမည်ဆိုလျှင် တရားဥပဒေစိုးမိုးရေးရှိရန် အရေးကြီးပါသည်။ တရားဥပဒေ စိုးမိုးမှုရှိရန် ဖြောင့်မတ်မှန်ကန်သည့် တရားစီရင်ရေးစနစ်ရှိရန်လွန်စွာမှအရေးကြီးလှပါသည်။ တရားစီရင်ရေး စနစ်မှန်ကန်စေရန် အုပ်ချုပ်ရေးယ္တရားအနေဖြင့် တရားစီရင်ရေးစနစ်အပေါ် ချုပ်ကိုင်ထားမှုများကို ရုပ်သိမ်း ပေးရန် အချိန်တန်ပြီဖြစ်ကြောင်း ကျွနု်ပ်တို့ မော်ကွန်းမှ တိုက်တွန်းလိုက်ရပါသည်။
မော်ကွန်းအယ်ဒီတာအဖွဲ့
(editors@mawkun.com)

