ရှမ်းမြောက် မြို့ငါးမြို့က ရွေ့ပြောင်းလုပ်သားတွေ မိသားစုဝင်တွေနဲ့အဆက်သွယ်ပြတ်နေ

ရှမ်းမြောက် မြို့ငါးမြို့က ရွေ့ပြောင်းလုပ်သားတွေ မိသားစုဝင်တွေနဲ့အဆက်သွယ်ပြတ်နေ

ရှမ်းမြောက် – ၂၀၂၃ နိုဝင်ဘာ ၄ (မော်ကွန်း)

ရှမ်းပြည်နယ်မြောက်ပိုင်းမှာ မြောက်ပိုင်းမဟာမိတ်ပူးပေါင်းတပ်တွေ အာဏာသိမ်းစစ်တပ်ကို ထိုးစစ်ဆင်တိုက်ခိုက်နေတာ သီတင်းတစ်ပတ်ကျော်ကြာပြီးနောက် မြို့ငါးမြို့မှာ ဖုန်းလိုင်းတွေပြတ်တောက်နေတာကြောင့် ရွေ့ပြောင်းလုပ်သားတွေရဲ့မိသားစုဝင်တွေနဲ့အဆက်အသွယ် ပြတ်နေတယ်လို့ဒေသခံတွေဆီကသိရပါတယ်။

မူဆယ်၊ ကွတ်ခိုင်၊ သိန္နီ၊ ကွမ်းလုံမြို့တွေမှာ မနေ့ကစတင်ပြီး ဆက်သွယ်ရေးဖုန်းလိုင်းတွေပြတ်တောက်နေပြီး လောက်ကိုင်မှာတော့ ဖုန်းလိုင်းပြတ်တောက်နေတာ ငါးရက်ခန့်ရှိပြီလို့ ဒေသခံတစ်ဦးကပြောပါတယ်။

ဆက်သွယ်ရေးဖုန်းလိုင်းပြတ်တောက်နေတာကြောင့် မူဆယ်နဲ့လောက်ကိုင်မြို့တွေကို လာရောက်အလုပ်လုပ်ကိုင်နေတဲ့ ရပ်ဝေးကအလုပ်သမားတွေဟာ မိသားစုဝင်တွေနဲ့ အဆက်သွယ်ပြတ်နေပါတယ်။

“အိမ်ပြန်မလာတာ သုံးနှစ်ရှိပြီ၊ မူဆယ်ကဟိုတယ်မှာလုပ်နေတာ၊ ဒီနှစ်သီတင်းကျွတ်ပြန်လာမယ်ဆိုပြီးခွင့်မရလို့မလာရဘူး၊ အခုတော့တိုက်ပွဲတွေဖြစ်ကုန်ပြီ၊ လစာလည်းတစ်လစာမရသေးဘူးပြောတယ်၊ ခုအဆက်သွယ်ပါပြတ်သွားပြီ၊ ဘယ်လိုဖြစ်မလဲမသိတော့ဘူး”လို့ မိုးကုတ်မြို့ကနေ မူဆယ်မြို့ကို သွားရောက် အလုပ်လုပ်ကိုင်နေသူတစ်ဦးရဲ့မိခင်ကပြောပါတယ်။

သမီးဖြစ်သူနဲ့ အဆက်သွယ် ပြတ်တောက်သွားတာကြောင့် စိတ်ပူနေပြီး အဆက်သွယ်ပြန်ရဖို့စောင့်နေတယ်လို့ အဆိုပါမိခင်က ပြောပါတယ်။

“တစ်ချက်တစ်ချက်တော့ Ooredoo က မက်ဆေ့ချ်ပို့ရတယ်ပြောတယ်၊ ကိုယ်လည်းအဲ့မှာအသိရှိတယ်၊ဆက်သွယ်လို့မရဘူ၊ လားရှိုးကတော့ ရသေးတယ်၊ ဒါပေမယ့်ဘယ်အချိန်ပြတ်မလဲမသိဘူး”လို့ လားရှိုးမြို့ဒေသခံတစ်ဦးကပြောပါတယ်။

မူဆယ်မြို့မှာ အင်တာနက် Wifi တွေသာရနေပြီး ဖုန်းဆက်သွယ်ရေးလိုင်းတွေအားလုံးပြတ်တောက်နေတာလို့ မူဆယ်မြို့မှာရောက်ရှိနေတဲ့ ဒေသခံအမျိုးသမီးတစ်ဦးကပြောပါတယ်။

လောက်ကိုင်မြို့မှာတော့ အရင်ကတည်းက Telenor အော်ပရေတာတစ်ခုသာ ဆက်သွယ်လို့ရတာဖြစ်ပြီး ဆက်သွယ်လို့မရတာ ငါးရက်ခန့်ရှိပြီဖြစ်တာကြောင့် တရုတ်လိုင်းတွေကိုသာအဓိကသုံးနေရတယ်လို့လောက်ကိုင်မြို့ဒေသခံတစ်ဦးကပြောပါတယ်။

“ဒီဘက်မှာတရုတ်လိုင်းကအမြဲပူးနေတော့ Mytel နဲ့ Telenor ပဲသုံးကြတာ၊ တိုက်ပွဲ စဖြစ်ပြီးသုံးရက်လောက်မှာ Telenor လိုင်းပြတ်သွားတယ်၊ တနေ့က Mytel ပြတ်သွားတယ်၊ မရတော့ဘူး”လို့ သူကပြောပါတယ်။

တရုတ်လိုင်း Wifi တွေက ခြောက်လစာ တရုတ်ငွေ ၆၀,၀၀၀ ကျပ်ပေးရပြီး Facebook ၊Telegram၊ Viber စတဲ့ လူမှုကွန်ရက်အက်ပလီကေးရှင်းတွေသုံးလို့ မရတဲ့အပြင် VPN တွေကိုလည်းစျေး​ကြီးပေးဝယ်ရတယ်လို့ ပြောပါတယ်။

” အိမ်ကလူတွေနဲ့အဆက်သွယ်ပြတ်နေတာ၊လောက်ကိုင်မှာဆိုတော့ တိုက်ပွဲသတင်းတော့နားထောင်နေရတယ်၊စိတ်ပူတယ်၊ ပြန်လာလို့ရရင်ချက်ချင်းပြန်လာစေချင်ပြီ၊ အဲ့ဘက်ကတိုက်ပွဲ ဖြစ်နေတော့အစစအရာရာလည်းစျေးတက်နေတယ်၊ အဆက်သွယ်မရတော့ပိုစိတ်ပူနေရတယ် “လို့ လောက်ကိုင်မြို့ ဂိမ်းရုံတစ်ခုမှအလုပ်လုပ်နေသူတစ်ဦးရဲ့မိသားစုဝင်တစ်ဦးကပြောပါတယ်။

ရှမ်းပြည်နယ်မြောက်ပိုင်းမှာ မြောက်ပိုင်းမဟာမိတ်ပူးပေါင်းတပ်ဖွဲ့တွေဟာ အောက်တိုဘာ ၂၇ရက်နေ့ကစတင်ပြီး အာဏာသိမ်းစစ်တပ်ရဲ့ တပ်စခန်းတွေကို “၁၀၂၇ စစ်ဆင်ရေး”အနေနဲ့ ထိုးစစ်ဆင် တိုက်ခိုက်နေတာဖြစ်ပါတယ်။

အမျိုးအစား - သတင်း

"Myanmar Observer Media Group [MOMG] was founded in 2011 with aims to deeply observe challenging issues of Myanmar, to strongly encourage policy change through in-depth and investigative stories, and to vastly improve journalism skills among local journalists through trainings and workshops. The first edition of Mawkun came out in August 2012 after the censorship board was abolished. The magazine is published in Myanmar Language and its normal size is around 120 pages."