လွတ်လပ်စွာ ကိုးကွယ်ခွင့်ကို စောင့်ရှောက်ကြ

မြန်မာနိုင်ငံတွင် လွတ်လပ်စွာ ကိုးကွယ်ယုံကြည်ခွင့်ကို ဖွဲ့စည်းပုံအခြေခံဥပဒေက အာမခံပေးထားသော်လည်း အင်အားနည်းသော ဘာသာဝင်များ၏ အဆိုပါအခွင့်အရေးမှာ အနည်းနှင့် အများဆိုသလို ခြိမ်းခြောက်ခံနေရသည်။

ကမ္ဘာပေါ်တွင် လွတ်လပ်စွာ ကိုးကွယ်ခွင့်ကို အဆိုးရွားဆုံးချိုးဖောက်သည့် နိုင်ငံ ၁၀ နိုင်ငံစာရင်း၌ တရုတ်၊ အီရန်၊ ဆော်ဒီအာရေးဗီးယားတို့နှင့် အတူ မြန်မာနိုင်ငံ ပါဝင်နေလျက်ရှိသည်ဟု အပြည်ပြည်ဆိုင်ရာ ဘာသာရေး လွတ်လပ်ခွင့် – အမေရိကန်ပြည်ထောင်စုကော်မရှင်(USCIRF)၏ ၂၀၁၇ခုနှစ် အစီရင်ခံစာက ဖော်ပြထားသည်။

မကြာသေးခင်က ရန်ကုန်တိုင်းဒေသကြီး၊သာကေတမြို့နယ်ရှိ အစ္စလာမ်ဘာသာဝင်များ၏ ဘာသာရေးကျောင်း နှစ်ကျောင်းကို ရဟန်းအချို့ပါဝင်သည့် အမျိုးသားရေးလှုပ်သူတစ်စုက ဖိအားပေးပိတ်ခိုင်းခြင်းသည် အင်အားနည်းသော ဘာသာဝင်များကို အနိုင်ကျင့်သည့် လုပ်ရပ်အဖြစ် ဝေဖန်ကဲ့ရဲ့စရာ ဖြစ်နေပါသည်။

ထိုကဲ့သို့ ခြိမ်းခြောက်ဖိအားပေးပိတ်ခိုင်းသူများကို အရေးမယူသည့်အပြင် ပြဿ နာကြီးထွား မလာစေရေးအတွက် ဟုဆိုကာ အဆိုပါဘာသာရေးကျောင်းနှစ်ကျောင်းကို အာဏာပိုင်များက ချိတ်ပိတ်လိုက်ခြင်းသည် ပို၍ပင် အကျည်းတန်ရုပ်ဆိုးသွားစေပါသည်။ ကရင်ပြည်နယ်ရှိ ခရစ်ယာန်ဘုရားကျောင်းဝင်းအတွင်း ဘုရားသွားတည်သည့်ဖြစ်ရပ်မျိုးလည်း ရှေ့တွင်ဖြစ်ပွားခဲ့ဖူးပါသည်။

အမျိုးဘာသာ ထိန်းသိမ်းအရေး၊ သာသနာပြန့်ပွားရေးကို အကြောင်းပြကာ အင်းအားသုံးအကြမ်းဖက် ပြုကျင့်နေမှုများကို သက်ဆိုင်ရာအာဏာပိုင်များက ဥပဒေနှင့်အညီ ထိန်းသိမ်းအရေးမယူနိုင်ပါက လွတ်လပ်စွာ ကိုးကွယ်ခွင့်ကို အဆိုးရွားဆုံးချိုးဖောက်သည့် နိုင်ငံများစာရင်းထဲတွင် မြန်မာနိုင်ငံ ဆက်လက်ပါဝင်နေပေလိမ့်မည်။

ကျွနု်ပ်တို့အနေနှင့် အထူးသတိပြုရမည့်အချက်မှာ မြန်မာနိုင်ငံသည် ဘာသာရေးအကြောင်းပြ၊ သွေးမြေကျဖြစ်ရပ်များနှင့် ဆိုးဆိုးရွားရွားကြုံခဲ့ရသည့် နိုင်ငံတစ်နိုင်ငံ ဖြစ်နေသည့် အချက်ပင်ဖြစ်သည်။ အကယ်၍ ကြိုတင်ဟန့်တားရမည့် အရာများကို မဟန့်တားနိုင်ပါက ကျွနု်ပ်တို့နိုင်ငံ၌ ထိုသို့သောပဋိပက္ခမျိုး အချိန်မရွေး ဖြစ်ပွားနိုင်သည့် အနေအထားတွင် ရှိနေပါသည်။

နောက်တစ်ချက် သတိထားရမည့်အချက်မှာ မိမိတို့၏လုပ်ရပ်များက အစ္စလာမ်အစွန်းရောက် အကြမ်းဖက်သမားများကို လက်ယက်ခေါ်သလို မဖြစ်စေရန် အလွန်ပင် အရေးကြီးပါသည်။

ထိုသို့သော ပြဿ နာများမဖြစ်ပွားစေရန် သက်ဆိုင်ရာဘာသာရေးခေါင်းဆောင်များအနေနှင့် မိမိတို့နောက်လိုက်များကို စည်းရုံးသွန်သင်သည့်နေရာတွင် ယုံကြည်မှုမတူသူများအား မုန်းတီးစေမည့် ပြောဟောမှုများကို မပြုလုပ်ဘဲ ၎င်းတို့အပေါ်နားလည်သည်းခံတတ်စေရေး လမ်းပြပေးကြပါရန် ကျွနု်ပ်တို့က တိုက်တွန်းလိုပါသည်။

အချုပ်ဆိုရလျှင် နိုင်ငံသားတိုင်း မိမိတို့ယုံကြည်ရာကို ကိုးကွယ်ခွင့်အပြည့်အဝရရှိစေရန် လွတ်လပ်စွာ ကိုးကွယ်ခွင့်ကိုထိပါးနေသည့်၊ အခြားဘာသာဝင်များအား အမုန်းပွားလာအောင် မီးထိုးပေးနေသည့် မည်သည့် ဘာသာရေးခေါင်းဆောင်ကိုမဆို ထိထိရောက်ရောက် အရေးယူပေးရန် သက်ဆိုင်ရာကို ကျွနု်ပ်တို့မော်ကွန်းက တိုက်တွန်းအပ်ပါသည် ။ ။

၂၀၁၇-မေလထုတ်၊ မော်ကွန်းမဂ္ဂဇင်း အမှတ်(၄၆)မှ အယ်ဒီတာအာဘော် ဖြစ်ပါသည်။

မော်ကွန်းအယ်ဒီတာအဖွဲ့