စစ်တွေ- ၂၀၂၃ နိုဝင်ဘာ ၁၄ (မော်ကွန်း)
စစ်ဆင်ရေးပထမနေ့မှာ ရဲအယောက်သုံးဆယ်နီးပါး လက်နက်နဲ့အတူအလင်းဝင်သလို စစ်ကောင်စီတပ်သား ၁၁ ဦးကို သုံ့ပန်းအဖြစ် ဖမ်းဆီးနိုင်ခဲ့ပေမယ့် သူတို့ရဲဘော်ခြောက်ဦးကျဆုံးခဲ့ရတယ်လို့ ရက္ခိုင့်တပ်တော်(AA )က ဒီနေ့ သတင်းထုတ်ပြန်ပါတယ်။
မနေ့ကစတင်တဲ့ တိုက်ပွဲအတွင်း စစ်တွေ-မောင်းတော-ဘင်္ဂလားဒေ့ရှ် ကုန်သွယ်ရေးလမ်းပေါ်က ဒုံးပိုက်နယ်ခြားစောင့် တပ်စခန်းကို AA တပ်တွေက သိမ်းခဲ့နိုင်သလို ဒီမနက်မှာ ချိန်ခါလီနယ်ခြားစောင့်တပ်စခန်းကို ထပ်မံသိမ်းပိုက်ခဲ့ပြီလို့ ထုတ်ပြန်ချက်မှာ ဖော်ပြတယ်။
ရသေ့တောင်၊ မောင်တောနဲ့ မင်းပြားမြို့နယ်တွေထဲက နေရာငါးခုမှာ စစ်ကောင်စီတပ်နဲ့ AA တို့ မနေ့က တိုက်ပွဲတွေဖြစ်ခဲ့ရာမှာ စစ်ကောင်စီဘက်က အနည်းဆုံး ၂၀ ကျော်ကျဆုံးတာကို မျက်မြင်တွေ့ရသလို ဒဏ်ရာရသူတွေလည်း ရှိတယ်လို့ AA က ထုတ်ပြန်ပါတယ်။
မင်းပြားမြို့နယ်က တိုက်ပွဲနှစ်ခုအတွင်း စစ်တွေအခြေစိုက်၊ ခမရ(၃၄၄) တပ်ရင်းက ကြည်း-၄၁၅၉၇ ဗိုလ်မှူး သန့်ဇင်ထွန်း (ဒု-ရင်းမှူး) ၊ ကြည်း-၅၀၇၃၂ ဗိုလ်ကြီး ဖြိုးဇေယျာလှိုင် (တပ်စုမှူး) အပါအဝင် ၁၀ ဦးကို စစ်သုံ့ပန်းအဖြစ် ဖမ်းမိခဲ့ပြီး ထိုတိုက်ပွ တွေအတွင်း ၁၀ ဦးကျော် သေတာကို မျက်မြင်တွေ့ရတယ်လို့ ဖော်ပြတယ်။
ဒါ့အပြင် မောင်တောမြို့နယ်၊ သင်္ဘောလှရွာအနီး စစ်ကောင်စီတပ်၊ ခလရ(၂၃၂)တပ်ရင်းနဲ့ မနေ့တုန်းကတိုက်ပွဲမှာ သုံ့ပန်းတစ်ဦးဖမ်းမိခဲ့သလို ဒု-စစ်ကြောင်းမှူး ကျော်သက်နိုင်အပါအဝင် ၁၄ ယောက်သေတာကို တွေ့ရတယ်လို့ ထုတ်ပြန်ပါတယ်။
ကျောက်တော်မြို့နယ်၊ အပေါက်ဝရဲစခန်းက ရဲ ၂၂ ယောက်နဲ့ အခြားနေရာတွေက ရဲခြောက်ယောက်ဟာ သူတို့ထံကို မနေ့တုန်းက အလင်းဝင်လာတယ်လို့ ဓါတ်ပုံမှတ်တမ်းတွေနဲ့တကွ AA က ထုတ်ပြန်ပါတယ်။
မနေ့ကတစ်ရက်ထဲမှာ နယ်ခြားစောင့်တပ်စခန်းနဲ့ ရဲစခန်းပေါင်း (၄၀) နီးပါးကို စစ်ကောင်စီဘက်က စွန့်လွှတ်ထားခဲ့တယ်လို့ AA ရဲ့ ထုတ်ပြန်ချက်မှာ ဖော်ပြပါတယ်။
ရခိုင်တိုက်ပွဲတွေနဲ့ ပတ်သက်ပြီး စစ်ကောင်စီပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းကတော့ နယ်ခြားစောင့်ရဲကင်းစခန်းငယ်ဖြစ်တဲ့ ဒုံးပိုက်စခန်းကို AAက စီးနင်းတိုက်ခိုက်ခဲ့ပြီး စစ်ကောင်စီအနေနဲ့ ကြည်း၊ ရေပူးပေါင်းစစ်ဆင်ချေမှုန်းနေတယ်လို့ မနေ့က စစ်ကောင်စီဝါဒဖြန့်မီဒီယာတွေမှာ ဖြေကြားထားပါတယ်။
ပုံစာ- ဒီမနက် ၇ နာရီ ဝန်းကျင်က သိမ်းပိုက်ခဲ့တဲ့ ရသေ့တောင်မြို့နယ်၊ ချိန်ခါလီရွာက စစ်ကောင်စီနယ်ခြားစောင့်တပ်စခန်းဆိုင်းဘုတ်ကို AA တပ်ဖွဲ့ဝင်တစ်ဦးက ဖြုတ်ချနေစဉ်
ဓါတ်ပုံ- AA သတင်းပြန်ကြားရေး။
