ဂေထော
ရန်ကုန်၊ ၂၀၂၀ ဩဂုတ် ၂၈ (မော်ကွန်း)
ရခိုင်ပြည်နယ်ရှိ မြေပုံနှင့် ဘူးသီးတောင်မြို့နယ်မှ စစ်ရှောင်စခန်းများတွင် စားနပ်ရိက္ခာနှင့် COVID-19 ကာကွယ်ရေးပစ္စည်းများဖြစ်သည့် နှာခေါင်းစည်း၊ဆပ်ပြာနှင့် လက်သန့်စင်ဆေးရည်များ လုံလောက်မှုမရှိဟု ယင်းစခန်းတာဝန်ခံများက မော်ကွန်းသို့ပြောသည်။
“စားနပ်ရိက္ခာကတော့ ပြတ်လပ်တော့မယ့်အနေထားဖြစ်နေပြီ။ Mask ဆိုမလုံလောက်ဘူး။ လက်သန့်ဆေးတို့ဘာတို့မရှိဘူး။ဆပ်ပြာဆိုလည်း ဒီအတိုင်းပဲ သိပ်ပြီးတော့ လုံလောက်တဲ့အနေအထားမရှိဘူး ”ဟု မြေပုံမြို့နယ်ရှိ ရက်ချောင်းစစ်ရှောင်စခန်းတာဝန်ခံ မြတန်ဆောင်းဆရာတော်က မိန့်သည်။
ရခိုင်ပြည်နယ်တွင် ဩဂုတ် ၁၆ ရက်မှစပြီး COVID-19 ရောဂါကူးစက်မှုမြင့်မားနေသည့်အတွက် မြို့နယ်အားလုံးကို Stay at Home အစီစဉ်တွင် အကျုံးဝင်ကြောင်း ဩဂုတ် ၂၆ ရက်က အစိုးရကထုတ်ပြန်ထားသည်။
စစ်ရှောင်ဦးရေ ၃၇၀ ကျော်ရှိသည့် ဘူးသီးတောင်မြို့နယ်၊မြောင်းနားစစ်ရှောင်စခန်းသည်လည်း အဝင်အထွက်အသွားလာကန့်သတ်ထားပြီး “စားနပ်ရိက္ခာကတော့တစ်ပတ်စာလောက်ရှိသေးတယ်။ အခုလောဆယ်တော့ နှာခေါင်းစည်းတို့၊လက်သန့်စင်ဆေးတို့ မလာသေးဘူး။ အင်တာနက်လိုင်းမကောင်းဘူးဆိုတော့ Facebook လည်းကြည့်လို့မရဘူး။အဲတော့ အစိုးရထုတ်ပြန်တဲ့သတင်းတွေကို နားထောင်(ရေဒီယို)နေရတယ်”ဟု စခန်း၏ဒုတိယတာဝန်ခံတစ်ဦးက မော်ကွန်းသို့ပြောပြသည်။
နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်ကလည်း ရခိုင်ပြည်နယ်အတွက် ငွေကြေးနှင့် စားနပ်ရိက္ခာ အလုံလောက်ပံ့ပိုးပေးမည်ဟု COVID-19 ကာကွယ်၊ထိန်းချုပ်၊ကုသရေးနှင့် စစ်လျဥ်း၍ ရခိုင်ပြည်နယ်အစိုးရအဖွဲ့နှင့် ကုသရေးနှင့် ပြည်သူ့ကျန်းမာရေးဦးစီးဌာနတို့ ယနေ့ပြုလုပ်သည့် Video Conference တွင် ပြောဆိုခဲ့ခြင်းဖြစ်သည်။
“ရိက္ခာကိစ္စပြောရရင်တော့ ကျွန်မ ပြည်ထောင်စုအစိုးရကိုယ်စား ကျွန်မရဲရဲကြီးပြောရဲပါတယ်။ ရိက္ခာမပြတ်စေရပါဘူး။ရခိုင်ပြည်နယ်မှာ ရိက္ခာမပြတ်စေရဘူး။ရတဲ့နည်းနဲ့ ဖြစ်အောင် ပို့ပေးပါမယ်”ဟု ဒေါ်အောင်ဆန်းစုကြည်က ဆိုသည်။
မြေပုံမြို့နယ်၊ ပြည်သူ့လွှတ်တော်ကိုယ်စားလှယ် ဦးဖေသန်းကတော့ “စစ်ဘေးရှောင်စခန်းတွေကို သူတို့ကအလုံလောက်ထုတ်ပေးမှာလား။အခုပြည်သူတွေက ကွာရန်တင်းနေရတယ်။အချို့ပြည်သူတွေက လော့ဒေါင်းချထားတယ်။ရှာဖွေစားသောက်လို့မရဘူး။အပြင်ထွက်အလုပ်လုပ်လို့မရဘူး။လက်လုပ်လက်စားအခြေခံလူတန်းစားတွေကိုလုံလုံလောက်လောက်ထုတ်ပေးမှာလားဆိုတာ သူ့စကားကျွန်တော်ကတော့ တိတိကျကျအဓိပ္ပာယ်ဖော်ဖို့ခက်ခဲပါတယ်”ဟု သူက ပြောသည်။
တပ်မတော်နှင့် AA တို့၏တိုက်ပွဲများကြောင့် စစ်ဘေးရှောင် ဦးရေ နှစ်သိန်းကျော်ရှိနေပြီး စစ်ရှောင်စခန်း ၁၅၈ ခုရှိကြောင်း စစ်ရှောင်များကို ကူညီဆောင်ရွက်ပေးနေသော Rakhine Ethnics Congress (REC)အဖွဲ့မှ သိရသည်။
ကျန်းမာရေးနှင့် အားကစားဝန်ကြီးဌာန၏ထုတ်ပြန်ချက်များအရ ဩဂုတ် ၁၆ ရက်မှ ယနေ့ မနက် ၈ နာရီအထိ ရခိုင်ပြည်နယ်တွင် COVID-19 ရောဂါအတည်ပြုလူနာ ၂၁၈ ဦးအထိရှိပြီး တစ်နိုင်ငံလုံးတွင် အတည်ပြုလူနာ ၆၂၈ ဦးရှိသည်။
ပုံစာ – ရခိုင်ရှိစစ်ရှောင်စခန်းတစ်ခု
Photo – REC
#Dailynews
