မင်းတပ်-၂၀၂၄ ဧပြီ ၂၆ (မော်ကွန်း)
ချင်းပြည်နယ်၊ မင်းတပ်မြို့နယ်၊ တိုက်နယ်(၂)က ဝမ္မသူးဆေးရုံကို မနေ့ကည ၈ နာရီဝန်းကျင်က စစ်ကောင်စီလေတပ်က တိုက်ပွဲမရှိဘဲ ဗုံးကြဲတိုက်ခိုက်လို့ လူလေးဦးသေဆုံးပြီး အများအပြားထိခိုက်ဒဏ်ရာရခဲ့တယ်လို့ ချင်းကာကွယ်ရေးတပ်ဖွဲ့ CDF မင်းတပ်က တာဝန်ရှိသူတစ်ဦးက ဒီနေ့မနက်ပိုင်းမှာ မော်ကွန်းကိုပြောပါတယ်။
“လေးဦးသေဆုံးတယ်လို့ ကနဦးသိရပါတယ်။ ၁၀ ဦးထက်မနည်း ထိခိုက်ဒဏ်ရာ ရပါတယ်ဗျ။ ဆေးရုံနဲ့ ဝန်ထမ်းအိမ်ရာတွေကတော့ ပြန်အသုံးပြုလို့ မရနိုင်လောက်အောင် ထိခိုက်သွားပါတယ်။ ည ၁၂၊ ၁ နာရီဝန်းကျင်အထိ ပတ်ကြဲနေလို့ ပြည်သူတွေကော ပြေးရတာရှိပါတယ်။ (ဗုံးကြဲမှုကြောင့်) အဆောက်အဦတွေ မီးလောင်ရာကနေ တောမီးပါဆက်လောင်သွားတဲ့ အနေအထားပါ။ နွေရာသီဖြစ်လို့ တောမီးစတွေရှိနေနိုင်ပါသေးတယ်” လို့ သူကပြောပါတယ်။
ဝမ္မသူးဆေးရုံကို ဗုံးကြဲတိုက်ခိုက်ခဲ့တဲ့အပြင် အရပ်သားတွေနေထိုင်တဲ့ အခြားနေရာတွေကိုလည်း လေကြောင်းတိုက်ခိုက်မှုလုပ်ဆောင်ခဲ့တယ်လို့ CDF မင်းတပ်က သတင်းထုတ်ပြန်ထားပါတယ်။
လက်ရှိအချိန်မှာတော့ ဗုံးကြဲခံရလို့ ထိခိုက်ဒဏ်ရာရခဲ့သူတွေကို ဆေးဝန်ထမ်းတွေက ကူညီကုသပေးနေတယ်လို့ သူကဆက်ပြောပါတယ်။
“ တချို့ဆရာမတွေဆို ကိုယ်တိုင်ထိခိုက်ခံရတဲ့ကြားက ကူပေးနေကြတာရှိပါတယ်။ အသေးစိတ်ကိုတော့ မကြာမီ အုပ်ချုပ်ရေးဘက်က သတင်းထုတ်ပြန်သွားပါလိမ့်မယ်” လို့ CDF မင်းတပ် တာဝန်ရှိသူက ပြောပါတယ်။
စစ်ကောင်စီလေတပ်ဟာ ညပိုင်းကလည်း တစ်ညလုံးနီးပါး တိုက်ခိုက်ခဲ့သလို ဒီနေ့လည်း မနက်ပိုင်းကနေ နေ့လယ်ပိုင်းအထိ လေယာဉ်ပျံဝဲတာတွေလုပ်ဆောင်နေလို့ ဒေသခံတွေ ထွက်ပြေးတိမ်းရှောင်နေရတယ်လို့ သူကပြောပါတယ်။
စစ်ကောင်စီလေတပ်ဟာ ဆေးရုံကို ညပိုင်းဗုံးမကြဲမီ ညနေ ၄ နာရီခွဲဝန်းကျင်တုန်းကလည်း မင်းတပ်မြို့နယ်၊ တိုက်နယ် (၂) မှာ ဂျက်ဖိုက်တာနဲ့ နှစ်ကြိမ်တိုက်ခိုက်ခဲ့သလို Y-12 လေယာဉ်နဲ့လည်း ငါးကြိမ်ဗုံးကြဲတိုက်ိခုက်ခဲ့သေးတယ်လို့ CDF မင်းတပ်က သတင်းထုတ်ပြန်ခဲ့ပါသေးတယ်။
အာဏာသိမ်းစစ်ကောင်စီကတော့ လက်ရှိအချိန်ထိ သတင်းတစ်စုံတစ်ရာထုတ်ပြန်တာ မတွေ့ရသေးပါဘူး။
အခုလ ၁ ရက်ကလည်း မင်းတပ်မြို့နယ်၊ တိုက်နယ်(၂)က ချပ်ကျေးရွာကို စစ်ကောင်စီလေတပ်က လေကြောင်းတိုက်ခိုက်မှုလုပ်ခဲ့လို့ အဆောက်အဦလေးလုံး မီးလောင်ပျက်စီးခဲ့ပါသေးတယ်။
ပုံစာ-စစ်ကောင်စီလေတပ် မနေ့ညက ဗုံးကြဲတိုက်ခိုက်ခဲ့တဲ့ မင်းတပ်မြို့နယ်က ဝမ္မသူးဆေးရုံ
ဓာတ်ပုံ-CDF မင်းတပ်
