စစ်ကိုင်း – ၂၀၂၃ ဇူလိုင် ၇ (မော်ကွန်း)
စစ်ကိုင်းတိုင်း၊ မုံရွာမြို့နယ် တောပုရွာကို လက်နက်ခဲယမ်းတွေသွားပို့တဲ့ စစ်ကောင်စီတပ်သား ၂၀ ကျော် မနေ့ကညနေပိုင်းမှာမိုင်းဆွဲခံရပြီး နှစ်ဦးပွဲချင်းပြီးသေတယ်လို့ တိုက်ခိုက်ရာမှာပါဝင်ခဲ့တဲ့ Brave Heart Army (BHA) က တာဝန်ရှိသူတစ်ဦးက မော်ကွန်းကိုပြောပါတယ်။
မိုင်းဆွဲခံရတဲ့စစ်ကောင်စီတပ်သား ၂၁ ဦးဟာ မုံရွာမြို့အထွက် မုံရွာ-မန္တလေးကားလမ်းမပေါ်က စွမ်းရည်ထက်ဆီဆိုင်အနီး စစ်ဆေးရေးဂိတ်ကနေ တောပုပျူစောထီးရွာကို သွားခဲ့တာဖြစ်ပါတယ်။
“စစ်ခွေးတွေ အလာတုန်းကတော့ မိုင်းကွင်းပေါ်ကမသွားလို့ ကျွန်တော်တို့မခွဲလိုက်ရဘူး။ လာတော့ မိန်းလမ်းအတိုင်းလာတာဗျ။ အပြန်မှာသတင်းအတိအကျရပြီး ကျွန်တော်တို့မိုင်းကွင်းပေါ်ရောက်တော့ မိုင်းဆွဲနိုင်လိုက်တယ်။ မိုင်းဆွဲတဲ့နေရာမှာ ပဒေသာငါးလုံးတွဲ တစ်ပွိုင့်ဆွဲလိုက်တယ်။ စစ်ခွေးနှစ်ကောင်က အဲဒီမိုင်းကွင်းပေါ်မှာပဲ ပွဲချင်းပြီးတယ်။ ဒဏ်ရာအပြင်းအထန်ရတဲ့ကောင်တွေလည်းရှိသေးတယ်ဗျ” လို့ BHA က တာဝန်ရှိသူက ပြောပါတယ်။
စစ်ကောင်စီတပ်တွေဟာ မိုင်းဆွဲခံရပြီး အနီးနားကရွာတွေကို စီးနင်းတာ၊ သေနတ်နဲ့ပြန်ပစ်တာမျိုးတော့မရှိခဲ့ဘူးလို့ သူကပြောပါတယ်။ မိုင်းဆွဲခဲ့တဲ့ ပူးပေါင်းအဖွဲ့တွေလည်း အထိခိုက်မရှိ ပြန်လည်ဆုတ်ခွာနိုင်ခဲ့တယ်လို့ ဆိုပါတယ်။
အဲဒီမိုင်းဆွဲတိုက်ခိုက်ရာမှုကို Brave Heart Army, Special Force-11 (PDF), Monywa Dynamite, Myaung Revolution Army, Peace Takers Task Force-PTTF, God of Monywa စတဲ့အဖွဲ့ ခြောက်ဖွဲ့ ပူးပေါင်းလုပ်ဆောင်ခဲ့တာဖြစ်ပါတယ်။
ပုံစာ-စစ်ကောင်စီတပ်သားများ မိုင်းကွင်းထဲတွင် မိုင်းဆွဲခံရစဉ်
Video-Brave Heart Army
#Dailynews

