အောင်ပိုင်
ရန်ကုန် – မတ် ၃၀၊ ၂၀၂၀ (မော်ကွန်း)
မြန်မာနိုင်ငံအား COVID – 19 စစ်ဆေးသည့် Test Kits ငါးထောင်ထောက်ပံ့ ရန် ကုလသမဂ္ဂက ဝယ်ယူလျက်ရှိသည်ဟု မြန်မာနိုင်ငံဆိုင်ရာ ကုလသမဂ္ဂရုံးက ယနေ့သတင်းထုတ်ပြန်သည်။
“ဘယ်နိုင်ငံကမှာတဲ့ Test Kits တွေလည်းဆိုတာတော့ ကျွန်တော်လည်သေချာမသိသေးဘူး။ ထုတ်ပြန်ချက်မှာပါတဲ့အတိုင်းပဲ UNOPS ၊ UNICEF ၊ WFP နဲ့ UNHRC တို့က စုပေါင်းပြီး ဝယ်ယူထောက်ပံ့တာပါ။ နောင်လည်း PEE တွေ၊ လိုအပ်တဲ့ ကိရိယာပစ္စည်းတွေ ထောက်ပံ့ပေးသွားဦးမှာပါ” ဟု မြန်မာနိုင်ငံရှိကုလသမဂ္ဂရုံးမှ ပြန်ကြားရေးအရာရှိ ဦးအေးဝင်းက ပြောသည်။
ကမ္ဘာ့ကျန်းမာရေးအဖွဲ့ WHO က နိုင်ငံများအားလုံး COVID – 19 ရောဂါ စစ်ဆေးခြင်းများကို အလျင်မြန်ဆုံးတိုးချဲ့ဆောင်ရွက်ရန်လည်း တိုက်တွန်းထားသည်။
ယင်းထုတ်ပြန်ချက်အရ WHO နှင့် မိတ်ဖက်အဖွဲ့အစည်းများသည် ယခင်က အမျိုးသားကျန်းမာရေး ဓာတ်ခွဲဌာနသို့ Test Kits သုံးထောင် ထောက်ပံ့ခဲ့ပြီးဖြစ်ရာ ယခုထောက်ပံ့မည့် Test Kits များမှာ ထပ်တိုးမှာယူခြင်းဖြစ်သည်။
မတ်လ ၁၈ ရက်ကလည်း တရုတ်အစိုးက မြန်မာနိုင်ငံသို့ လူ ၂,၀၀၀ ကျော်အတွက် COVID – 19 ဓာတ်ခွဲစစ်ဆေးကိရိယာများကို ထောက်ပံ့ပေးခဲ့ပြီးဖြစ်ရာ အမျိုးသားကျန်းမာရေးဌာနခွဲတွင် ထားရှိစစ်ဆေးသွားမည်ဟု ဗဟိုကူးစက်ရောဂါတိုက်ဖျက်ရေးဌာနခွဲ ညွှန်ကြားရေးမှူး ဒေါက်တာခင်ခင်ကြီးက ပြောသည်။
#Dailynews
