ပုဏ္ဏားကျွန်း- ၂၀၂၃ ဇွန် ၁၂ (မော်ကွန်း)
ပြီးခဲ့တဲ့ရက်ပိုင်းအတွင်း ရခိုင်ပြည်နယ်ကို ပြည်တွင်း၊ ပြည်ပ အကူအညီပေးရေးအဖွဲ့တွေသွားလာခွင့် ပိတ်ပင်လိုက်တာကြောင့် ပုဏ္ဏားကျွန်းမြို့နယ်ထဲက ရွာလုံးကျွတ်နီးပါး ဝမ်းပျက်ဝမ်းလျှောဖြစ်နေတဲ့ရွာတွေတွေကို အကူအညီပေးရေးကြန့်ကြာမှုတွေရှိနေတယ်လို့ ပုဏ္ဏားကျွန်းအခြေစိုက် လူမှုကူညီကယ်ဆယ်ရေးအသင်းထံကသိရပါတယ်။
“အဲဒီရွာတွေကိုအကူအညီပေးဖို့ ကျွန်တော်တို့က မြန်မာနိုင်ငံကြက်ခြေနီအသင်းကိုအကူအညီတောင်းထားတာ။ ဒါပေမယ့် စစ်ကောင်စီကပြန်ပြီးတော့ပိတ်လိုက်တယ်။ ပေးမသွားဘူး။ အဲလိုလုပ်ပြီးတော့မှအခုပြန်ဖွင့်ပေးတယ်။ ပြီးတော့အဲ့ရွာတွေကို ကုန်းလမ်းကောရေလမ်းကနေပါသွားရတာ။ ဖုန်းလိုင်းကလည်းမမိဘူး။ အချိန်တွေ ကြန့်ကြာကုန်တာပေါ့။” လို့ ပုဏ္ဏားကျွန်းအခြေစိုက်လူမှုကူညီကယ်ဆယ်ရေးအသင်းတာဝန်ရှိသူ က ပြောပါတယ်။
ပုဏ္ဏားကျွန်းမြို့ရဲ့ မြောက်ဘက်ခြမ်းမှာရှိတဲ့ အောင်မကျော်ရွာနဲ့ဥယျာဉ်သာဆိုတဲ့ရွာတွေမှာ သောက်သုံးရေမသန့် တာကြောင့် ဝမ်းပျက်ဝမ်းလျှောရောဂါတွေ တစ်ရွာလုံးဖြစ်နေတာလို့ လူမှုကူညီကယ်ဆယ်ရေးအသင်းတွေထံမှ သိရပါတယ်။ အဲဒီရွာတွေမှာ မြို၊ခမီ စတဲ့လူနည်းစု တိုင်းရင်းသားတွေနေထိုင်ကြပြီး သွားလာရေးလည်းခက်ခဲတဲ့နေရာတွေလို့ဆိုပါတယ်။
စစ်ကောင်စီဟာ ပြီးခဲ့တဲ့ ဇွန် ၇ ရက်က ရခိုင်ပြည်နယ်အတွင်းခရီးသွားလာခွင့်ရပ်ဆိုင်းကြောင်း စစ်ကောင်စီရဲ့ ရခိုင်ပြည်နယ်အစိုးရအဖွဲ့ရုံးကကြေညာခဲ့တာပါ။ ဒီလိုရပ်ဆိုင်းပြီးနောက် မြန်မာနိုင်ငံကြက်ခြေနီအသင်း အပါအဝင် NGO အဖွဲ့အစည်းရှစ်ဖွဲ့ကို ယခင်ခွင့်ပြုထားတဲ့အတိုင်း ဒေသဖွံ့ဖြိုးရေးလုပ်ငန်းတွေ ပြန်လုပ်နိုင်တယ်ဆိုပြီး ရခိုင်ပြည်နယ်အစိုးရအဖွဲ့ရုံးက ယမန်နေ့ကထုတ်ပြန်ပါတယ်။
ဒါပေမယ့်လည်း မုန်တိုင်းဒဏ်သင့်ရခိုင်ပြည်နယ်အတွင်း ကုလသမဂ္ဂအဖွဲ့အစည်းတွေအပါအဝင် ပြည်တွင်း/ပြည်ပ အရပ်ဖက်ကူညီရေးအဖွဲ့တွေရဲ့သွားလာခွင့်ကို ရခိုင်ပြည်နယ်အစိုးရအဖွဲ့ရုံးနဲ့ ပေါင်းစပ်ညှိနှိုင်းရေးလုပ်ငန်းကော်မတီကခွင့်ပြုပေးနေတာပါ။
ပြီးခဲ့တဲ့ မေ ၁၄ ရက်က ရခိုင်ပြည်နယ်ကို ဝင်ရောက်တိုက်ခတ်ခဲ့တဲ့ မိုခါဆိုက်ကလုန်းမုန်တိုင်းကြောင့် ကွမ်းအများဆုံးစိုက်ကြတဲ့ ပုဏ္ဏားကျွန်းမြို့နယ်မှာ ကွမ်းခင်းတွေအားလုံးနီးပါးပျက်စီးခဲ့သလို ဒေသခံတွေဟာ စားနပ်ရိက္ခာ၊ ဆေးဝါးနဲ့ အမိုးအကာတွေ အရေးတကြီးလိုအပ်နေတယ်လို့ လူမှုကူညီရေးအသင်းတွေထံ မှ သိရပါတယ်။
ပုံစာ- ရခိုင်ပြည်နယ်၊ စစ်တွေမြို့မှာ မိုခါမုန်တိုင်းကြောင့် အပျက်အစီး၊ အမှိုက်သရိုက်တွေကိုရှင်းလင်းနေသည့်မြင်ကွင်း
Photo – UNDP Myanmar
#Dailynews

