စလင်း၊ တညောင်တိုက်နယ်ရဲစခန်းကို တော်လှန်ရေးတပ်ဖွဲ့တွေသိမ်းပိုက်

စလင်း၊ တညောင်တိုက်နယ်ရဲစခန်းကို တော်လှန်ရေးတပ်ဖွဲ့တွေသိမ်းပိုက်

ရန်ကုန် – ၂၀၂၅ ဇူလိုင် ၃၀ (မော်ကွန်း)

မကွေးတိုင်း၊ စလင်းမြို့နယ်က တညောင်တိုက်နယ်ရဲစခန်းကို ဒေသတွင်း တော်လှန်ရေးတပ်တွေက ဒီနေ့မနက်အစောပိုင်းမှာ ဝင်ရောက်စီးနင်းတိုက်ခိုက်ခဲ့ပြီး ရဲစခန်းကိုလည်း မီးရှို့ဖျက်ဆီးခဲ့တယ်လို့ စလင်းမြို့နယ် ပြည်သူ့ကာကွယ်ရေးအဖွဲ့ (ပကဖ) က ထုတ်ပြန်ပါတယ်။

ဒီတိုက်ပွဲမှာ ရဲရှစ်ဦးသေဆုံးခဲ့ပြီး နှစ်ဦးကိုတော့ လက်ရဖမ်းဆီးရမိခဲ့တယ်လို့ဆိုပါတယ်။

တညောင်တိုက်နယ်ရဲစခန်းဟာ မင်းဘူးခရိုင်၊ စလင်းမြို့နယ်၊ ဆင်ဖြူကျွန်း-ဆိပ်ဖြူ-ချောက် ကားလမ်းမှာရှိပြီး ဒီနေ့မနက် ၅ နာရီခန့်မှာ စလင်းမြို့နယ် ဒေသကာကွယ်ရေးတပ်ဖွဲ့တွေက ဝင်ရောက်တိုက်ခိုက်ခဲ့တာပါ။

စစ်ကောင်စီတပ်ဟာ ဂျက်ဖိုက်တာနဲ့ ပစ်ကူသုံးကြိမ်ပေးခဲ့ပေမယ့် တိုက်ပွဲအတွင်း ရဲစခန်းဘန်ကာတွေကို အပြီးသတ်တိုက်ခိုက်နိုင်ခဲ့ပြီး စခန်းတစ်ခုလုံးကို မီးရှို့ဖျက်ဆီးနိုင်ခဲ့တယ်လို့ ဆိုပါတယ်။

တိုက်ပွဲအတွင်း ရဲတပ်ဖွဲ့ဝင်တွေ ကိုင်ဆောင်တဲ့ G-3 ငါးလက်၊ MA-13 တစ်လက်နဲ့ ကျည်တွေကိုလည်း သိမ်းဆည်းနိုင်ခဲ့တယ်လို့ စလင်း ပ.က.ဖ က ဓါတ်ပုံမှတ်တမ်းနဲ့အတူ ထုတ်ပြန်ထားတာပါ။

ဧရာဝတီမြစ်ရဲ့ အနောက်ဘက်ကမ်းဖြစ်ပြီး ရခိုင်ရိုးမ စပ်ဆက်နေတဲ့ မကွေးတိုင်းထဲက စလင်း၊ ဆိပ်ဖြူ၊ ဆင်ဖြူကျွန်း မြို့နယ်တွေမှာ ဒေသတွင်း တော်လှန်ရေးတပ်တွေ ပြီးခဲ့တဲ့နှစ်ပိုင်းတွေထဲက အားကောင်းလာပြီး ဒီလမ်းပိုင်းတွေကို စိုးမိုးလာခဲ့တာပါ။

ဒါ့အပြင် စလင်း-ဆင်ဖြူကျွန်း- ဆိပ်ဖြူ ကားလမ်းကိုလည်း မကြာခဏ တော်လှန်ရေးတပ်တွေက အသွားအလာကန့်သတ်တာတွေရှိခဲ့ပြီး စစ်ကောင်စီစစ်ကြောင်းနဲ့ မကြာခဏတိုက်ပွဲတွေ ဖြစ်နေတာပါ။

ပြီးခဲ့တဲ့လပိုင်းတွေကလည်း ဒီလမ်းပိုင်းကို စစ်ကောင်စီတပ်က သံချပ်ကာနဲ့ တင့်ကားတွေပါဝင်တဲ့ စစ်ကြောင်းတွေ ထိုးလာပြီး တော်လှန်ရေးတပ်တွေနဲ့ တိုက်ပွဲတွေ ဖြစ်နေပါတယ်။

ပုံစာ – ရဲစခန်းကိုသိမ်းပိုက်လိုက်တဲ့ တော်လှန်ရေးတပ်ဖွဲ့ဝင်တချို့

ဓါတ်ပုံ – စလင်း ပကဖ

အမျိုးအစား - သတင်း

"Myanmar Observer Media Group [MOMG] was founded in 2011 with aims to deeply observe challenging issues of Myanmar, to strongly encourage policy change through in-depth and investigative stories, and to vastly improve journalism skills among local journalists through trainings and workshops. The first edition of Mawkun came out in August 2012 after the censorship board was abolished. The magazine is published in Myanmar Language and its normal size is around 120 pages."