ရန်ကုန်-၂၀၂၃၊ ဩဂုတ် ၁၆ (မော်ကွန်း)
ပဲခူးတိုင်းဒေသကြီး၊ တောင်ငူခရိုင်၊ ကျောက်ကြီးမြို့နယ်မှာရေကြီးရေလျှံနေလို့ လူဦးရေနှစ်ထောင်နီးပါး အရေးပေါ်အကူအညီတွေလိုအပ်နေတယ်လို့ ကရင်အရေးပေါ်ကူညီကယ်ဆယ်ရေးကော်မတီကပြီးခဲ့တဲ့နာရီပိုင်းကထုတ်ပြန်ပါတယ်။
စိုးရိမ်ရေအမှတ်ကျော်လွန်နေတဲ့ စစ်တောင်းမြစ်အနီးမှာရှိတဲ့ ကျောက်ကြီးမြို့နယ်က ရွာရှစ်ရွာ၊ နဲ့ အိမ်ခြေ ၆၀၀ ကျော်၊ လူဦးရေနှစ်ထောင်နီးပါး ဟာ အရေးပေါ်ကျန်းမာရေးနဲ့စားနပ်ရိက္ခာအကူအညီတွေလိုအပ်နေပါတယ်။
ဒါ့အပြင်ကျောင်းသား ၃၀၀ ကျော်ရှိတဲ့ စာသင်ကျောင်းသုံးကျောင်းဟာလည်း ရေကြီးမှုကြောင့် ကျောင်းပိတ်ထားရတယ်လို့ဖော်ပြပါတယ်။
တစ်ဖက်မှာလည်း ကျောက်ကြီးမြို့နယ်မှာစစ်ကောင်စီတပ်နဲ့ ကရင်အမျိုးသားလွတ်မြောက်ရေးတပ်မတော် KNLA၊ ပြည်သူ့ကာကွယ်ရေးတပ် PDF ပူးပေါင်းတပ်ဖွဲ့တွေနဲ့ ဇူလိုင် ၂၅ ရက်ကစလို့ တိုက်ပွဲတွေဖြစ်ပွါးနေတာပါ။
စစ်ကောင်စီဟာ မေလကဩဂုတ်လအထိ လေးလအတွင်း လက်နက်ကြီးနဲ့လေကြောင်းတိုက်ခိုက်မှုကြောင့်အရပ်သား ၁၁ ဦးသေဆုံးခဲ့တယ်လို့ကရင်အရေးပေါ်ကူညီကယ်ဆယ်ရေးကော်မတီက ထုတ်ပြန်ချက်မှာဖော်ပြထားပါတယ်။
စစ်ကောင်စီဟာလေးလအတွင်းလေကြောင်းတိုက်ခိုက်မှု ၃၃ ကြိမ်၊ လက်နက်ကြီး ၃၇ လုံးပစ်ခတ်မှုကြောင့် နေအိမ် အလုံး ၂၀ ပျက်စီးကာ အရပ်သား ၁၃ ဦးပြင်းထန်စွာထိခိုက်ဒဏ်ရာရခဲ့တယ်လို့ဖော်ပြပါတယ်။
ဒါ့အပြင်ကျောက်ကြီးမြို့နယ်မှာ စစ်ကောင်စီရဲ့ မီးရှို့သတ်ဖြတ်ခံရသူသုံးဦး၊ ဖမ်းဆီးသတ်ဖြတ်ခဲ့ရသူနှစ်ဦးနဲ့ ကျေးရွာ ၁၀ ရွာကဒေသခံ ၈,၀၀၀ ဟာထွက်ပြေးတိမ်းရှောင်နေရတယ်လို့ဆိုပါတယ်။
လက်ရှိကျောက်ကြီးမြို့နယ်ကဒေသခံတွေဟာစားဝတ်နေရေးအတွက် ကူးလူးဆက်ဆံသွားလာရာမှာ စစ်ကောင်စီကအကြောင်းမဲ့ဖမ်းဆီးတာ၊ စားသောက်ကုန်တွေမတရားသိမ်းယူတာ၊ ဒေသခံတွေဟာလူသားဒိုင်းအဖြစ်အသုံးပြုခံနေရတယ်လို့ဖော်ပြပါတယ်။
စစ်ကောင်စီကစစ်ရာဇဝတ်မှုနဲ့လူ့အခွင့်အရေးတွေချိုးဖောက်နေတဲ့ ကျောက်ကြီးမြို့နယ်ကို ပြည်တွင်းပြည်ပလူပုဂ္ဂိုလ်၊ အဖွဲ့အစည်းတွေအနေနဲ့ လူသားချင်းစာနာထောက်ထားမှုဆိုင်ရာအရေးပေါ်အကူအညီတွေပေးကြဖို့ ကရင်အရေးပေါ်ကူညီကယ်ဆယ်ရေးကော်မတီကတောင်းဆိုထားပါတယ်။
#Dailynews

