(၁)
သူတို့ ဘာကြောင့် ကမ္ဘာကျော်တာလဲ’ဆိုတဲ့ နာမည်နဲ့ ဗန်းမော်သိန်းဖေရေးတဲ့ စာအုပ် ဟာ ရန်ကုန်စာအုပ်အရောင်းဆိုင်တွေရဲ့ အရောင်းရဆုံးစာရင်းထဲမှာ တော်တော် ကြာကြာ ပါပါနေသတဲ့။ Top Ten ထဲမှာ လအချို့ ပါနေတယ်တဲ့။ ၂ဝ၁၅ မှာ ပထမ အကြိမ် ရိုက်ခဲ့ပြီး ၂ဝ၁၆ မှာ ဒုတိယ အကြိမ် ရိုက်ရပြန်သတဲ့လေ။ ဒါဟာ ကောင်းသတင်းပါပဲ။
လူတွေ စာမဖတ်ကြဘူး။ စာ မဖတ်ကြတော့ဘူး။ စာမဖတ် ဖြစ်ကြ ပါဘူး စတဲ့ အသံတွေ သောသောညံနေ ပေမယ့် စာအုပ်ထုတ်ဝေရေး လောကမှာ တော့ စာအုပ်တွေက တရစပ် မနားတမ်းထွက် နေပြန်တယ်။ စာအုပ်အငှားဆိုင်တွေ တစ်စခန်း ရပ် သွားပြီ၊ စာအုပ်လက်လီ အရောင်းဆိုင်တွေ ငုပ်သွားပြီ ဆိုတဲ့ အသံတွေ ပွက်ပွက်ညံနေပေမယ့် စာအုပ်အရောင်းပွဲတော် တွေမှာ တိုးမပေါက်ပြန်ဘူး။ ဒီလို ပဋိပက္ခ အထွေထွေကြားထဲမှာ စာရေးဆရာ၊ ကဗျာဆရာ၊ ကျမ်းပြုဆရာ၊ သုတေသနဆရာ၊ ဝေဖန်ရေးဆရာ၊ အတတ်ပညာ ဆရာတွေကလည်း အပြိုင်း အရိုင်းပါပဲ။ ထုတ်ဝေသူတွေကလည်း အမြောက်အမြားပါပဲ။ ပုံနှိပ်ဆရာတွေ၊ စာအုပ်ချုပ်တဲ့ ပုဂ္ဂိုလ်တွေခမျာများမှာလည်း နားရတယ် မရှိပါဘူး။ ရန်ကုန်မြို့ကြီးမှာတော့ သိမ်ဖြူလမ်းမှာ Yangon Book Street (YBS) တဲ့။ သံဈေးငါးလွှာမှာ ပလာဇာတဲ့။ စာအုပ်လောကရဲ့ မြို့ပြပေါက်ကွဲသံတွေပေါ့။
မီဒီယာလောကကလည်း အရှိန်အဟုန်နဲ့ပဲလေ။ ပုံနှိပ်မီဒီ ယာကတော့ ဆေးစက်ကျရာ အရုပ်ထင်နေတယ်။ သတင်းစာဂျာ နယ်လောကအပြင် အသံနဲ့ အရုပ်ကို ချက်ချင်းတင်ဆက်နေကျ သူတွေကလည်း အလုအယက်ပါပဲ။ ပွဲတော်ကြီးတွေ့နေကြတာ ပေါ့။ သူတို့ဒီဇိုင်းက ဟိတ်နဲ့ ဟန်နဲ့ နတ်ရေကန်ထဲက တက်လာ တာလိုလို၊ မိုးပေါ်က ကျလာတာလိုလို။ အုံနဲ့ ကျင်းနဲ့ အင်အား အပြည့်။
(၂)
ဗန်းမော်သိန်းဖေရဲ့ စာအုပ်ကို ပဉ္စဂံတိုက်က ထုတ်တယ်။ ၁ဝ ချိုး၊ ၁၄၈ မျက်နှာ၊ ဒုတိယအကြိမ်၊ အုပ်ရေ ၅ဝဝ၊ ကာဗာ ပန်း ချီတင်ထွဏ်း၊ CIP 892.7 ။ စာအုပ်ထဲမှာ ကမ္ဘာကျော်ပုဂ္ဂိုလ် အယောက် ၃ဝ ရဲ့ ဘဝ တစေ့ တစောင်းကို ဆိုင်ရာဆိုင်ရာ ဓာတ်ပုံတွေနဲ့ တင်ပြထားတယ်။ ခေတ်ကာလနဲ့ မျက်ခြည်မပြတ် ရှိနေကြသူတွေအတွက် ယဉ်ပါး ပြီးသား ပုဂ္ဂိုလ်တွေ ဖြစ်ကောင်းဖြစ်နိုင် ပေမယ့် ဘာသိဘာသာ နေနေကျသူတွေအတွက်တော့ မျက်စိကျယ်စေမယ့်၊ နားကား စေမယ့် ‘ကမ္ဘာကျော်သူတွေ’ပါပဲ။
ကဲ၊ အဲဒီ ကမ္ဘာကျော်ကြသူတွေရဲ့ အမည်စာရင်းလေး ကြည့်လိုက်ကြဦးစို့ရဲ့။ ကာရိုလီတကက်စ်၊ မစ်ချဲ၊ မတ်ခ်ဇူကာ ဘတ်၊ ဂျက်ဗား၊ ဆိုချီယိုဟွန်ဒါ၊ လီကာရှင်း၊ နစ်ဘွိုင်းရစ်ချစ်၊ ဘရုစ်လီ၊ စီရော်နယ်ဒို၊ အော်ဒီမာဖီ၊ ဘီလ်ဂိတ်၊ ဆီဗက်စတာ စတားလုံး၊ အာနိုး၊ ဗစ်တာဖရင်ကဲလ်၊ မာသာထရီဇာ၊ အော် ပရာဝင်းဖရေး၊ မဟတ္တမဂန္ဒီ၊ စတိဗ်ဂျော့၊ သောမတ်စ်အယ်ဒီဆင်၊ မာလာလာ၊ အေဗရာဟယ်လင်ကွန်း၊ လိုင်ယွန်နယ်မက်ဆီ၊ မန်နီ ပါကွီယားနိုး၊ မိုက်ကယ်ဖဲလ်စ်၊ နယ်လ်ဆင်မန်ဒဲလား၊ ကာနယ် ဆင်းဒါး၊ ရှောင်ကွန်နရီ၊ မတ်ခပိုးလော့၊ ဦးသန့်နဲ့ ဂျက်စီကာ ကော့စ်။ အဲဒီစာရင်းထဲမှာ မာသာထရီဇာ၊ မာလာလာ၊ အော်ပရာ ဝင်းဖရေးနဲ့ ဂျက်စီကာကော့စ်တို့က လွဲရင် ကျန်သူတွေက အမျိုး သားတွေပေါ့။
ဒီပုဂ္ဂိုလ် ၃ဝ ဟာ နယ်ပယ်အသီးသီးက ဘဝအသီးသီးနဲ့ ဖြစ်တည်လာကြရာမှာ ဘာကိုမှ အရှုံးမပေး၊ အလျှော့မပေးဘဲနဲ့ ဗေဒါပျံ အံကိုခဲ ပန်းပန်လျက်ပဲဆိုသလို ကျော်ကြားထင်ရှားတဲ့ အနေအထားကို ဇွဲနဲ့ ဝီရိယနဲ့ ပညာနဲ့ လုံ့လနဲ့ ဖြတ်သန်းရောက်ရှိ ခဲ့ကြသူတွေပါပဲ။ ဒုက္ခိတတွေ ပါသလို လောကငရဲထဲက ထွက် လာသူတွေလည်း ပါတယ်။ အားကစားသမားတွေ၊ အနုပညာရှင် တွေ၊ သိပ္ပံပညာရှင်တွေ၊ နိုင်ငံ့ခေါင်းဆောင်တွေ၊ အိုင်တီပညာရှင် တွေ၊ ကုမ္ပဏီပိုင်ရှင်ကြီးတွေ၊ စွန့်ဦးတီထွင်သူတွေ၊ အဲဒီလူတွေရဲ့ က္ဘာကျော်ရာကျော်ကြောင်း အနေအထားတွေကို ဗန်းမော် သိန်းဖေက အနှစ်ချုပ် ထုတ်နုတ်တင်ဆက်ထားတာဟာ ဖတ်မိ သူတိုင်းအတွက် အားကျစရာ၊ အားရစရာ၊ အားတက်စရာ၊ မှတ် ယူစရာတွေ အမြောက်အမြား ရနိုင်တာကြောင့် ဒီစာအုပ်ဟာ ရောင်းအကောင်းဆုံးစာရင်းထဲမှာ ပါနေတာလို့ သဘောပေါက်ရ ပါတယ်။ အထူးသဖြင့် လူငယ်လူရွယ်တွေအတွက် ခွန်အားဖြစ်စေ တဲ့ စာတစ်အုပ်လို့ ဆိုနိုင်တယ်။
လူတကာထက် ခေါင်းတစ်လုံးပိုမြင့်လို့သာ ကျော်ကြား ထင်ရှားကြရတာဆိုတော့ ကိုယ့်ဘာသာ ပင်ကိုသဘာဝအတိုင်း ကံ၊ ဉာဏ်၊ ဝီရိယ၊ ဇွဲသတ္တိနဲ့ ကြံ့ကြံ့ခိုင်လို့ ထင်ပေါ်ကျော်ကြား အောင်မြင်ပေါ်လွင်ပြီး ထိပ်ဆုံးကို ရောက်လာကြတာမျိုး ရှိသလို သူတစ်ထူးရဲ့ ဘဝလမ်းကြောင်းကို၊ နည်းလမ်းတွေကို အတုယူ လိုက်နာကျင့်သုံး အားထုတ်ခြင်းဖြင့်လည်း အောင်မြင်ထင်ရှားမှု၊ ကျော်ကြားမှုတို့ကို ရနိုင်တဲ့ သာဓကတွေလည်း ရှိတယ်။ စုတုပြု သဘောပါပဲ။ အခြေခံအုတ်မြစ်တွေ တည်ဆောက်ရာမှာ စနစ် တကျ ချဉ်းကပ်ရတဲ့ သဘောပါပဲ။ တစ်ဆင့်ပြီး တစ်ဆင့် လေ့ကျင့် ကြရတဲ့ သဘောပါပဲ။ အောင်မြင်ဖို့၊ ထင်ရှားဖို့၊ ကျော်ကြားဖို့ နည်းလမ်းတွေဟာ စင်စစ်တော့ မြန်မာတွေအတွက် ဗုဒ္ဓက ချ မှတ်ပေးထားပြီးသားပါ။ နီးလွန်းလို့ မမြင်တာလည်း ဖြစ်နိုင်ပါ တယ်။ ဥပမာ-လောကီသမ္ပဒါ တရားလေးပါးတို့၊ မင်္ဂလာတရား ၃၈ ပါးတို့လိုပေါ့။
(၃)
ဗန်းမော်သိန်းဖေက ဒီစာအုပ်ကို သူ ဘယ်လို ဖန်တီးခဲ့ သလဲဆိုတာ အမှာစာနဲ့ ဖော်ပြထားတယ်။ ဘာသာပြန်ထားတာ ဖြစ်ပေမယ့် စာအုပ်တစ်အုပ်ထဲက ထုတ်နုတ်ပြန်ဆိုတာ မဟုတ် ဘဲ စာအုပ်တွေထဲက လိုအပ်တာတွေ ရှာဖွေထားတာ၊ ပြီးတော့ အင်တာနက်ထဲက စိတ်ဝင်စားစရာ အချက်အလက်တွေကို ရှာ ဖွေစုဆောင်းထားတာလို့ ဆိုပါတယ်။
ဒီအကြောင်းအရာတွေဟာ စိတ်ကူးယဉ်တွေမဟုတ်ဘဲ တကယ့်ဖြစ်ရပ်မှန်တွေပေါ့။ ဒီမှာ တူညီတဲ့ အချက်တစ်ခုကတော့ အဲဒီပုဂ္ဂိုလ်တွေဟာ ငယ်ဘဝမှာ အလွန်အမင်း ဆင်းရဲဒုက္ခရောက် ခဲ့ကြသူတွေ၊ ကိုယ်လက်အင်္ဂါ မစုံလင်ခဲ့ကြသူတွေ၊ ဘဝမှာ ဆုံးရှုံး မှုအကြိမ်ကြိမ် ကြုံခဲ့ကြရသူတွေ၊ လူသားတွေကို ကူညီဖေးမဖို့ ကိုယ့်ဘဝတစ်ခုလုံးကို ပေးဆပ်ခဲ့ရသူတွေသာ ဖြစ်တယ်။
‘… ဒီစာအုပ်ကို မြန်မာလူငယ်တွေ ဖတ်ပြီး သူတို့ကို အား ကျစိတ် ပေါ်လာအောင်ရယ်၊ စိတ်ဓာတ်ခွန်အားတိုးတက်ပြီး ဘဝ ကို အညံ့မခံ၊ အရှုံးမပေးတတ်တဲ့ စိတ်တွေ ပေါ်ပေါက်စေချင်လို့ ရေးတာပါ’လို့ ဆရာဗန်းမော်သိန်းဖေက ဆိုပါတယ်။ ခုဆို သူ မျှော်လင့်တဲ့အရာက အတိုင်းအတာတစ်ခုအထိ ပြည့်ဝတယ်လို့ ယူဆနိုင်တယ်။ ဒီစာအုပ်ဟာ လူငယ်တွေ လက်ထဲရောက်ပြီး သူ တို့အချင်းချင်း ညွှန်းဆိုဖတ်ရှုကြ၊ လက်ဆောင်ပေးကြနဲ့ အကြိုက် တွေ့နေကြတာကို စာအုပ်အရောင်းဆိုင်တွေက တစ်ဆင့် သိရ တယ်။ စတိဗ်ဂျော့၊ မတ်ခ်ဇူကာဘတ်၊ ဂျက်မား၊ မာလာလာ၊ ဘီလ်ဂိတ်၊ စီရော်နယ်ဒို၊ အော်ပရာဝင်းဖရေး အစရှိသူတွေဟာ လူငယ်တွေအတွက် သူရဲကောင်းတွေအဖြစ် ကမ္ဘာကျော်သလို ဆိုချီယိုဟွန်ဒါ၊ မာသာထရီဇာ၊ မဟတ္တမဂန္ဒီ၊ သောမတ်စ်အယ်ဒီ ဆင်၊ အေဗရာဟယ်လင်ကွန်း၊ နယ်လ်ဆင်မန်ဒဲလား၊ ရှောင်ကွန် နရီနဲ့ ဦးသန့်တို့ဟာလည်း လူကြီးတွေအတွက် သူရဲကောင်းအဖြစ် ကမ္ဘာကျော်သူတွေပဲပေါ့။
ကမ္ဘာကျော်သူတွေဟာ တော်လို့ ကျော်ကြတာမို့ မြန်မာ တွေလည်း ကျော်ရအောင် တော်ကြပါစို့လို့ ဒီစာအုပ်က လှုံ့ဆော် ပေးနေတယ်လို့ပဲ သုံးသပ်မိတယ်။ ကျော်ကြစို့။ ။
၂၀၁၇-ဧပြီလထုတ်၊ မော်ကွန်းမဂ္ဂဇင်း အမှတ်(၄၅)မှ စာအုပ်အညွှန်း ဖြစ်ပါသည်။
သင့်နော် ရေးသည်။
