သဇင်လတ်
ရန်ကုန် – သြဂုတ် ၁၁(မော်ကွန်း)
လာမည့် ၂၀၂၀ ရွေးကောက်ပွဲတွင် လူ့ဘောင်သစ်ဒီမိုကရက်တစ်ပါတီ(DPNS)မှ ကိုယ်စားလှယ်လောင်း ၁၆ ဦး ၀င်ရောက်ယှဉ်ပြိုင်မည်ဖြစ်ပြီး အမျိုးသမီးကိုယ်စားလှယ် ၅၀ ရာခိုင်နှုန်းပါဝင်သည်ဟု ပါတီဌာချုပ်မှ ထုတ်ပြန်သည်။
သတ်မှတ်ထားသည့် ကိုယ်စားလှယ်လောင်းအရည်အချင်းတူနေလျင် လူငယ်၊ အမျိုးသမီး ၊ တိုင်းရင်းသား၊ တက်ကြွလှုပ်ရှားသူများနှင့် လူနည်းစု/လူမျိုးစုကိုယ်စားလှယ်လောင်းများကို ဦးစားပေးရွေးချယ်ခြင်းဖြစ်သဖြင့် အမျိုးသမီးကိုယ်စားလှယ်လောင်း ငါးဆယ်ရာခိုင်နှုန်းဖြစ်ရခြင်းဖြစ်သည်ဟု လူ့ဘောင်သစ်ဒီမိုကရက်တစ်ပါတီ၏ တွဲဖက် အထွေထွေအတွင်းရေးမှူး (၁) ကပြောသည်။
“ပါတီ၀င်ဖြစ်ရမယ်၊ ပါတီရဲ့မူ၀ါဒတွေလုပ်ငန်းစဉ်တွေ မဟာမိတ်ဆက်ဆံတဲ့လူတွေကိုအာမခံနိုင်ရမယ်၊ ပြည်သူကိုအလုပ်အကျွေးပြုနိုင်ရမယ်၊ ဒေသဆိုင်ရာပြည်သူလူထုရဲ့တစ်စုံတရာယုံကြည်ကိုးစားခြင်းခံရတဲ့ သူတွေဖြစ်ရမယ်၊ နိုင်ငံရေးစီးပွားလူမှုရေးနယ်ပယ်တွေမှာကျွမ်းကျင်နှံ့စံ့တဲ့တစ်စုံတရာရှိရမယ် ဆိုပြီးတော့ကိုယ်စားလှယ်လောင်းအရည်အချင်းသတ်မှတ်ထားတယ်”ဟု ၎င်းကရှင်းပြသည်။
ကိုယ်စားလှယ်လောင်းအဖြစ်၀င်ရောက်ယှဉ်ပြိုင်ရန်လျှောက်ထားသူ ၅၀ ဦးခန့်ရှိခဲ့ပြီး ပါတီကသတ်မှတ်ထားသည့်အရည်အချင်းနှင့်ပြည့်စုံသူ ၁၆ ဦးသာရွေးချယ်ခဲ့ပြီး အမျိုးသမီးကိုယ်စားလှယ် လောင်းရှစ်ဦး၊ လူငယ်ကိုယ်စားလှယ်လောင်း သုံးဦးနှင့် လူနည်းစု/လူမျိုးစုကိုယ်စားလှယ်လောင်းငါးဦး ပါ၀င်သည်။
လူ့ဘောင်သစ်ဒီမိုကရက်တစ်ပါတီသည် ၂၀၁၅ ခုနှစ်အထွေထွေရွေးကောက်ပွဲတွင်လည်း ကိုယ်စားလှယ်လောင်း ၂၁ ဦး၀င်ရောက်ယှဉ်ပြိုင်ခဲ့သော်လည်း ရွေးချယ်ခံရသူမရှိခဲ့ပေ။
၂၀၂၀ ရွေးကောက်ပွဲတွင်တော့ ပြည်သူ့လွှတ်တော်ကိုယ်စားလှယ်လောင်းနေရာ ခြောက်ဦးနှင့် တိုင်းဒေသကြီးလွှတ်တော်ကိုယ်စားလှယ်လောင်းနေရာ အတွက် ၁၀ ဦးတို့က ရန်ကုန်၊ မန္တလေးနှင့် ဧရာ၀တီတိုင်းဒေသကြီးတို့တွင်၀င်ရောက်ယှဉ်ပြိုင်မည်ဖြစ်သည်။
လူ့ဘောင်သစ်ဒီမိုကရက်တစ်ပါတီကို ၁၉၈၈ တွင်ကျောင်းသားသမဂ္ဂများခေါင်းဆောင်များကဖွဲ့စည်း၍ ပေါ်ပေါက်လာသောပါတီတစ်ခုဖြစ်ပြီး ၁၉၉၁ တွင်မတရားအသင်းအဖြစ်ကြေညာခြင်းခံရကာ ပါတီဖျက်သိမ်းခဲ့ရပြီးနောက် ၂၀၁၄ တွင်ပါတီမှတ်ပုံတင်ခွင့်ပြန်လည်ရရှိခဲ့သည်။
Photo by လူ့ဘောင်သစ်ဒီမိုကရက်တစ်ပါတီ
#Dailynews
