ရခိုင်အရေး ပွင့်လင်းမြင်သာမှုရှိကြောင်း ပြသပါ

ရခိုင်ပြည်နယ်မြောက်ပိုင်းတွင် ဖြစ်ပွားနေသောပဋိပက္ခကို လူမျိုးစုရှင်းလင်းရေးလုပ်ဆောင်မှု (Ethnic Cleansing) ဖြစ်စဉ်အဖြစ် အမေရိကန်နိုင်ငံခြားရေးဝန်ကြီး ရက်စ်တစ်လာဆန်က နိုဝင်ဘာ ၂၂ ရက်တွင် ထုတ်ဖော်ပြောဆိုလိုက်ပြီ ဖြစ်သည်။ ကုလသမဂ္ဂနှင့်အနောက်နိုင်ငံအများစုက ထိုစကားလုံးကို သုံးပြီး ဝေဖန်နေသည်မှာ ကာလအတန်ကြာပြီ ဖြစ်သော်လည်း အမေရိကန်အစိုးရက ယခုမှ ထိုသို့သုံးစွဲခြင်းဖြစ်သည်။

၎င်းတို့အနေနှင့် ရရှိထားသော အချက်အလက်များကို သေချာစွာစစ်ဆေးပြီးမှ ထိုသို့ သတ်မှတ်လိုက်ခြင်းဖြစ်ကြောင်း အမေရိကန်နိုင်ငံခြားရေးဌာနက ထုတ်ပြန်ချက်တွင် ထည့်သွင်းဖော်ပြခဲ့သည်။ မြန်မာနိုင်ငံကို သွားရောက်လည်ပတ်ပြီး တစ်ပတ်အကြာတွင် ထုတ်ပြန်သော နိုင်ငံခြားရေးဝန်ကြီးတစ်လာဆန်၏ သဘောထားကြေညာချက်ကို အမေရိကန်နိုင်ငံရေးအသိုင်းအဝိုင်းနှင့် လူ့အခွင့်အရေးအဖွဲ့များက ကြိုဆိုထောက်ခံခဲ့ကြသည်။

လူသားမျိုးနွယ်အပေါ် ပြစ်မှုကျူးလွန်မှုအဖြစ် နိုင်ငံတကာတွင် သတ်မှတ်ထားသည့် လူမျိုးစုလိုက်ရှင်းလင်းရေး လုပ်ဆောင်မှုတွင် ပါဝင်ပတ်သက်သူများကို အမေရိကန်အစိုးရက အရေးယူမည်ဖြစ်သလို သီးခြားလွတ်လပ်သည့် စုံစမ်းစစ်ဆေးရေး လုပ်ဆောင်ရန်လည်း ထောက်ပံ့ပေးသွားမည်ဟု နိုင်ငံခြားရေးဝန်ကြီး၏ ပြောရေးဆိုခွင့်ရှိသူက သတင်းစာရှင်းလင်းပွဲတွင် ပြောဆိုခဲ့သည်။ သို့သော်နိုင်ငံရေးပြုပြင်ပြောင်းလဲရေး လုပ်ဆောင်နေသော မြန်မာအစိုးရကိုတော့ အရေးယူမည်မဟုတ်ဟု ပြောဆိုခဲ့သည်။

အမေရိကန်အစိုးရ၏ ထိုသို့ထုတ်ပြန်ချက်သည် သမိုင်းကြောင်းနှင့် ချီကာ ရှုပ်ထွေးနက်နဲသော ရခိုင်ပဋိပက္ခကို ကိုင်တွယ်နေရသည့် ဒေါ်အောင်ဆန်းစုကြည်ဦးဆောင်သော အရပ်သားအစိုးရနှင့် မြေပြင်တွင် စစ်ရေးအရ ရှင်းလင်းမှုများ လုပ်နေသော တပ်မတော်ကို ကူညီရာ မရောက်သည့်အပြင် အိမ်နီးချင်း အင်အားကြီး တရုတ်နိုင်ငံနှင့် ပိုမိုနီးကပ်အောင် လုပ်ဆောင်သလို ဖြစ်နေသည်ဟု လေ့လာသူအချို့ကသုံးသပ်သည်။

ပဋိပက္ခစဖြစ်ကတည်းက တစ်ရှိန်ထိုးမြင့်တက်လာခဲ့သည့် နိုင်ငံတကာဖိအားများ၏ အဓိကအကြောင်းရင်းခံများထဲမှ အချက်နှစ်ချက်မှာ ကုလသမဂ္ဂအချက်အလက်ရှာဖွေရေးအဖွဲ့ကို ဝင်ခွင့်မပေးခြင်းနှင့် ပြည်တွင်းပြည်ပ သတင်းမီဒီယာများကို လွတ်လပ်စွာ သတင်းယူခွင့်မပေးခြင်းတို့ ပါဝင်သည်။

မိမိတို့ဘက်မှ လူမျိုးစုအလိုက် ရှင်းလင်းမှုလုပ်ဆောင်ခြင်း မရှိရိုးမှန်လျှင် နိုင်ငံတကာက ယုံကြည်လက်ခံလာအောင် ပွင့်လင်းမြင်သာစွာ ချပြရမည်ဖြစ်သော်လည်း ထိုသို့လုပ်ဆောင်ရန် ပျက်ကွက်ခဲ့သည့်အပြင် လွတ်လပ်စွာ သတင်းယူမှုကို ကန့်သတ်ထားသောကြောင့် မီဒီယာများက အစိုးရထုတ်ပြန်သည့် အချက်အလက်များကိုသာ ကိုးကားနေကြရရာ သံသယဖြစ်မည် ဆိုလျှင်လည်း ဖြစ်ချင်စရာ အခြေအနေမျိုးပင်ဖြစ်သည်။

ယခုအခါ ထွက်ပြေးသွားသော ဒုက္ခသည်များကို ပြန်လည်လက်ခံရေးအတွက် မြန်မာအစိုးရနှင့် ဘင်္ဂလားဒေ့ရှ်အစိုးရတို့ သဘောတူညီမှုရရှိပြီ ဖြစ်သောကြောင့် မြန်မာအစိုးရအနေနှင့် ပဋိပက္ခပြေလည်ရေးကို အမှန်တကယ်လုပ်ဆောင်နေကြောင်း နိုင်ငံတကာသို့ချပြနိုင်သော်လည်း ခေတ်အဆက်ဆက်ကျင့်သုံးခဲ့သော နည်းလမ်းဟောင်းများကြောင့် နိုင်ငံ့ပုံရိပ်ညစ်ထေးနေမှုကို ပြန်လည်လျှော်ဖွပ်ရန်နှင့် ထပ်ဆင့်ကြုံတွေ့ရဖွယ်ရှိသော နိုင်ငံတကာဖိအားများ၊ အရေးယူမှုများကို ကာကွယ်ရန် ပွင့်လင်းမြင်သာမှု အပြည့်ရှိကြောင်း မဖြစ်မနေ ပြသရတော့မည်ဖြစ်သည်။

ထို့အတွက် နိုင်ငံတကာက လက်ခံယုံကြည်နိုင်လောက်သည့် အချက်အလက်ရှာဖွေရေးအဖွဲ့များ ဝင်ခွင့်ပြုရေး၊ သို့မဟုတ် ဖွဲ့စည်းရေးနှင့် ပြည်တွင်းပြည်ပသတင်းမီဒီယာများကို လွတ်လပ်စွာ သတင်းယူခွင့်ရရေးကို ဖော်ဆောင်ပေးရန် လိုအပ်ကြောင်း ကျွနု်ပ်တို့ မော်ကွန်းမဂ္ဂဇင်းက တိုက်တွန်းပါသည်။

၂၀၁၇-ဒီဇင်ဘာလထုတ်၊ မော်ကွန်း မဂ္ဂဇင်း အမှတ်(၅၂) မှ အယ်ဒီတာအာဘော် ဖြစ်ပါသည်။

အမျိုးအစား - သုံးသပ်ချက်

"Myanmar Observer Media Group [MOMG] was founded in 2011 with aims to deeply observe challenging issues of Myanmar, to strongly encourage policy change through in-depth and investigative stories, and to vastly improve journalism skills among local journalists through trainings and workshops. The first edition of Mawkun came out in August 2012 after the censorship board was abolished. The magazine is published in Myanmar Language and its normal size is around 120 pages."