မိုးကုတ် – ၂၀၂၄ ဇူလိုင် ၁၃ (မော်ကွန်း)
မန္တလေးတိုင်း၊ မိုးကုတ်မြို့အရှေ့ပိုင်း၊ ပန်းမထိပ်ရွာမှာ ဒီနေ့ မွန်းလွဲ ၁၂ :၃၀ မိနစ်လောက်ကစတင်ပြီး အာဏာသိမ်းစစ်တပ် နဲ့ TNLA တပ်တို့ နှစ်ဘက်တိုက်ပွဲ ပြင်းထန်နေကာ စစ်တပ်ပစ်ကူတဲ့လက်နက်ကြီးတွေဟာ လူနေရပ်ကွက်နဲ့အိမ်တွေပေါ်ကိုကျနေတယ်လို့ မြို့ခံတွေကပြောပါတယ်။
“သေနတ်တွေနဲ့ဆက်တိုက်ပစ်နေကြတယ်၊ အရမ်းကြမ်းနေတယ်၊ ပစ်သံတွေကဆက်တိုက်ကြားနေရတယ်၊ အိမ်တချို့လည်းထိထားတယ်”လို့ အရှေ့ရွာရပ်ကွက်နေထိုင်သူအမျိုးသမီးတစ်ဦးကပြောပါတယ်။
မိုးကုတ်မြို့အရှေ့ပိုင်း၊ ပန်းမထိပ်ရွာရှိ အာဏာသိမ်းစစ်တပ်စစ်ဆေးရေးဂိတ်အနီးမှာ ပစ်ခတ်မှုဖြစ်ပေါ်ပြီးနောက် မြို့တွင်းမှာရှိတဲ့ ပတ္တမြားစေတီနဲ့ ရပ်တော်မူဘုရားတွေမှာ တပ်စွဲထားတဲ့ စစ်တပ်၊ စခန်းတွေကနေ လက်နက်ကြီးပစ်ကူပေးနေတာလို့ မြို့ခံတွေကပြောပါတယ်။
မိုးကုတ်မြို့ ပတ္တမြားစေတီအရှေ့၊ ကန်ဘောင်အနီးက နေအိမ်တချို့လည်း လက်နက်ကြီးထိမှန်ထားတယ်လို့ ပြောပါတယ်။
မိုးကုတ်မြို့မှာ မနေ့ညပိုင်းကလည်း စစ်တပ်ဘက်ကလက်နက်ကြီး ပစ်ခတ်တာကြောင့် ဒီးဒုတ်လျိုရပ်ကွက်နေ အမျိုးသားတစ်ဦး လက်နက်ကြီးအစထိမှန်သေဆုံးခဲ့တယ်လို့ ထင်းရှူးခြံရပ်ကွက်နေထိုင်သူတွေကပြောပါတယ်။
လဆန်းလောက်ကတည်းက မိုးကုတ်မြို့တွင်းမှာ ပစ်ခတ်မှုတွေငြိမ်သက်နေပြီး မြို့ပြင်ဘက်တွေမှာ တိုက်ပွဲတွေဖြစ်နေခဲ့တာလို့ ဒေသခံကပြောပါတယ်။
အခုတော့ ပစ်ခတ်မှုတွေဟာ မြို့တွင်းဘက်တွေမှာပါ ဖြစ်လာပြီး အရပ်သားထိခိုက်မှုတွေပါရှိလာနေတာပါ။
ရုပ်သံဖိုင် – ဗုံးခိုကျင်းထဲမှ ရိုက်ကူးထားသည့် ယနေ့ မိုးကုတ်မြို့တိုက်ပွဲအခြေအနေ
ရိုက်ကူး – Mawkun Magazine

