ကျွန်ုပ်တို့လူ့အဖွဲ့အစည်းတွင် ဘာသာမတူရုံမျှဖြင့် ရန်မူလိုသောလူအုပ်စုများကိုညီညွတ်စွာ ဝိုင်းဝန်းဆန့်ကျင်ကြရန် ကျွန်ုပ်တို့ မော်ကွန်းကတောင်းဆိုလိုပါသည်။
မြန်မာနိုင်ငံသမိုင်းကိုကြည့်မည်ဆိုလျှင် ဘာသာမတူသည့် အသိုင်းအဝိုင်းများကြားဖြစ်ပွားခဲ့သော သွေးမြေကျပဋိပက္ခ ဖြစ်ရပ်များစွာ ကြုံခဲ့ကြရသည်ကို ဝမ်းနည်းဖွယ်မြင်တွေ့ကြရမည်ဖြစ်သည်။၂၀၁၀ နောက်ပိုင်းဖြစ်ပွားခဲ့သောရခိုင်ပဋိပက္ခ၊ မိတ္ထီလာပဋိပက္ခနှင့် မန္တလေးပဋိပက္ခတို့မှာကမ္ဘာ့နိုင်ငံအသီးသီးက ဝိုင်းဝန်းကဲ့ရဲ့စရာဖြစ်ရအောင်ပင် ဆိုးရွားခဲ့ပြီး လူပေါင်းများစွာ ထိခိုက်သေဆုံးခဲ့ကြရသည်။
မကြာသေးခင်ရက်ပိုင်းကရန်ကုန်မြို့၊ ဒဂုံမြို့သစ်တောင်ပိုင်းတွင် အစ္စလာမ်ဘာသာဝင်များ၏ ဝတ်ပြုဆုတောင်းပွဲကို လူတစ်စုကတားဆီးပိတ်ပင်မှုဖြစ်ပွားခဲ့ရာ အကယ်၍အချိန်မီမထိန်းချုပ်၊ အရေးမယူနိုင်လျှင် နောက်ဆက်တွဲဖြစ်လာမည့် ကိစ္စများမှာ တွေးဝံ့စရာမရှိပါ။ ပြဿနာပေါင်းစုံဖြင့် ရင်ဆိုင်နေရသောယနေ့လိုအချိန်မျိုးတွင် အစုအဖွဲ့တစ်ခုက ရည်ရွယ်ချက်ရှိရှိ မီးမွှေးလိုက်လေသလားဟု သံသယပွားရမလိုပင်ဖြစ်နေပါသည်။
လူနည်းစုဘာသာဝင်များ၏ လွတ်လပ်စွာကိုးကွယ်ခွင့်ကို ကာကွယ်မပေးနိုင်သောကြောင့် ကမ္ဘာပေါ်တွင် ဘာသာရေးလွတ်လပ်ခွင့်ကို အချိုးဖောက်ဆုံး ၁၀ နိုင်ငံစာရင်းတွင် မြန်မာနိုင်ငံ ဆက်လက်ပါဝင်နေရခြင်းဖြစ်သည်။ နိုင်ငံတကာဘာသာရေးလွတ်လပ်ခွင့်ကိုစောင့်ကြည့်နေသည့် အမေရိကန်အဖွဲ့အစည်း (United States Commission on International Religious Freedom – USCIRF) က ယမန်နှစ်နှောင်းပိုင်းကထုတ်ပြန်ခဲ့သည့် အစီရင်ခံစာတစ်စောင်တွင် ယင်းအချက်ကိုဖော်ပြထားခြင်းဖြစ်သည်။
ဖွဲ့စည်းပုံအခြေခံဥပဒေက ဘာသာဝင်တိုင်းကို လွတ်လပ်စွာကိုးကွယ်ယုံကြည်ခွင့်ပေးထားပြီးဖြစ်ရာ ထိုဥပဒေအတိုင်း မည်သည့်ဘာသာဝင်မဆို လွတ်လပ်စွာကိုးကွယ်ခွင့်ရှိရေးကို အစိုးရကထိရောက်စွာအာမခံပေးရမည်ဖြစ်သကဲ့သို့ ပြည်သူများကလည်း လေးစားသမှုပြုကြရမည်ဖြစ်သည်။ ထိုရပိုင်ခွင့်ကို ကျူးလွန်ဖောက်ဖျက်ခဲ့လျှင် မည်သည့်ဘာသာဝင်၊ မည်သည့်ပုဂ္ဂိုလ်ကိုမဆို ဝိုင်းဝန်းကဲ့ရဲ့ပြီးပြင်းထန်စွာအပြစ်ပေးအရေးယူကြရမည်ဖြစ်သည်။
မြန်မာမှာသာမက ကမ္ဘာကိုကြည့်မည်ဆိုလျှင်လည်းမိမိနှင့် ကိုးကွယ်ရာမတူသူများကို ရန်သူလိုသဘောထားကာ ထိုးနှက်တိုက်ခိုက်သူများမှာ ဘာသာတိုင်းတွင် ရှိနေသည်ကိုတွေ့မြင်ကြရမည်ဖြစ်ပြီး ဘာသာရေးခေါင်းဆောင် အချို့ကလည်း နည်းမျိုးစုံဖြင့် သွေးထိုးလှုံ့ဆော်လျက်ရှိကြသည်။ ၎င်းတို့ အားလုံးသည် ‘မျိုးချစ်စိတ်ရှိသူ’၊ ‘နိုင်ငံချစ်စိတ်ရှိသူ’၊ ‘ဘုရားသခင်၏ စစ်သည်တော်’၊ ‘ကိုယ့်ဘာသာအတွက် အသက်ပေးမည့်သူ’ အစရှိသည့် ခြုံလွှာမျိုးစုံကို ဝတ်ရုံထားကြသော်လည်း စင်စစ်တွင် ၎င်းတို့အားလုံးသည် ‘သွေးဆာနေကြသူ’ များသာဖြစ်ပြီး ၎င်းတို့၏ သက်ဆိုင်ရာဘုရားများကို ‘ဘီလူး၊ သရဲ’အဖြစ်သို့ အဆင့်လိုက်လျှော့နေကြသူများဖြစ်ပါသည်။
သို့ဖြစ်ရာ ထိုသို့သောဘာသာမတူရန်လိုသူများ ကျွနု်ပ်တို့လူ့အဖွဲ့အစည်းတွင် ခြေကုပ်ယူခွင့်မရစေရန် နည်းပေါင်းစုံ ကြိုးစားကြရမည်ဖြစ်သည်။ ထိုသို့လုပ်ဆောင်ရာတွင် ပညာပေးအလင်းပြခြင်းများကိုလုပ်ဆောင်သင့်သကဲ့သို့ အစွန်းရောက်အယူအဆကို ဆက်လက်ဆုပ်ကိုင်ထားသော ဘာသာမတူရန်လိုသူများကို ဝိုင်းဝန်းကဲ့ရဲ့ရှုတ်ချခြင်း၊ သက်ဆိုင်ရာအာဏာပိုင်များက အချိန်မီထိန်းချုပ် အရေးယူနိုင်အောင် အကြောင်းကြားပေးကြခြင်းတို့ကိုလည်း လုပ်ဆောင်သင့်ပါသည်။
ထိုသို့မဟုတ်ပါက သွေးဆာသူလူတစ်စု၏ပရောဂကြောင့် ငြိမ်းချမ်းစွာနေလိုသူများ ဒုက္ခပင်လယ်ဝေကာ သွေးမြေကျရမည့်အဖြစ်ဆိုးမျိုးနှင့် တစ်ချိန်မဟုတ်တစ်ချိန် ကြုံကြရဖို့ရှိပါသည်။ သို့ဖြစ်ရာ ထိုအခြေနေထိအရောက်မခံဘဲ သွေးဆာနေသော ဘာသာမတူရန်လိုသူများကို အစိုးရနှင့်ပြည်သူများက ထိထိရောက်ရောက် ထိန်းချုပ်ဟန့်တားကြပါရန် ကျွန်ုပ်တို့ မော်ကွန်းကတိုက်တွန်းအပ်ပါသည်။
အယ်ဒီတာ့အာဘော်
