Home သုံးသပ်ချက် ၆၆ (ဃ)ကို လက်နက်သဖွယ် အသုံးပြုနေခြင်းအား ချက်ချင်းရပ်

၆၆ (ဃ)ကို လက်နက်သဖွယ် အသုံးပြုနေခြင်းအား ချက်ချင်းရပ်

200
0
Advertise Here

စစ်အုပ်ချုပ်ရေးကာလတစ်လျှောက်လုံး အာဏာရှင်အစိုးရကို အာခံကာ ဒီမိုကရေစီရရှိရေး အတိုက်အခံလုပ်လာခဲ့သည့် အမျိုးသားဒီမိုကရေစီအဖွဲ့ချုပ် အစိုးရဖြစ်လာချိန်တွင် အများပြည်သူနည်းတူ သတင်းမီဒီယာသမားများလည်း လွတ်လပ်စွာရေးသားခွင့် ပိုမိုရရှိလာလိမ့်မည်ဟု မျှော်လင့်စောင့်စားခဲ့ကြသည်။

နိုဗယ်လ်ငြိမ်းချမ်းရေးဆုရှင်ခေါင်းဆောင်သည့် အစိုးရတက်လာသည်မှာ တစ်နှစ်ကျော်လာပြီဖြစ်သော်လည်း သတင်းမီဒီယာသမားများ မျှော်လင့်ခဲ့သော အဆိုပါလွတ်လပ်စွာပြောဆိုရေးသားခွင့်မှာထူးထူးခြားခြားတိုးတက်ကောင်းမွန်လာခြင်း မရှိပါ။ တစ်ခါတစ်ရံ ဆုတ်ယုတ်သည့်အခြေအနေကိုပင် ရောက်သွားလေမည်လားဟု ရင်တမမ၊ စိုးရိမ်တကြီး ဖြစ်ကြရလျက်ရှိပါသည်။

ပုဂ္ဂလိကသတင်းစာ၊ ဂျာနယ်တို့သည်လည်း အခြေအနေ ကောင်းလာသည်မရှိဘဲ စောင်ရေထိုးကျကာ ရပ်မသွားရအောင်ပင်ကြိုးစားရုန်းကန်နေကြရပါသည်။ ပုဂ္ဂလိကသတင်းမီဒီယာများ ရှင်သန်အားကောင်းလာရေးအတွက် အစိုးရသတင်းမီဒီယာများ မရှိသင့်ဟု တစ်ချိန်က ယုံယုံကြည်ကြည် ပြောဆိုခဲ့သော၊ သူကိုယ်တိုင်လည်း စာရေးဆရာ၊ ဘာသာပြန်ဆရာ၊ သတင်းဂျာနယ် ထုတ်ဝေခဲ့ဖူးသူပြန်ကြားရေးဝန်ကြီး ဒေါက်တာဖေမြင့်သည်လည်း ယခုအခါ အတိတ်မေ့သွားပြီဖြစ်သည်။

Advertise Here

ဤအခြေအနေတွင် ပုဂ္ဂလိကသတင်းမီဒီယာတို့၏ ဝေဖန်ထောက်ပြမှုအချို့ကို မကြိုက်သည့်အခါ အာဏာရ အရပ်သားအစိုးရနှင့်တပ်မတော်တို့က ဆက်သွယ်ရေးဥပဒေပုဒ်မ ၆၆(ဃ)ဖြင့် ဖိအားပေး နှိပ်ကွပ်အရေးယူနေကြသည်မှာ ပြည်သူတို့၏ ပြောဆိုပိုင်ခွင့်၊ သိရှိပိုင်ခွင့်၊ မြင်ကြားပိုင်ခွင့်တို့ကို တိုက်ရိုက်ချိုးဖောက်လိုက်သလိုဖြစ်နေပါသည်။ သတင်းမီဒီယာကို ရန်သူသဖွယ် ပစ်မှတ်ထား တိုက်ခိုက်ခြင်းသည် ၄င်းတို့ကိုယ်စားပြုနေသော ပြည်သူကို တိုက်ခိုက်ရာလည်းကျပါသည်။

စင်စစ်တွင် အငြင်းပွားဖွယ်ရာ ထိုပုဒ်မသည် သတင်းမီဒီယာသမား မဟုတ်သူများကိုလည်း ခြိမ်းခြောက်လျက်ရှိပါသည်။ မိမိတို့၏ထင်မြင်ယူဆချက်ကို လွတ်လပ်စွာ မပြောဆိုဝံ့အောင်ပင် ထိုဥပဒေက ခြောက်လှန့်နေသည်။ ဦးသိန်းစိန်အစိုးရလက်ထက်က ထိုပုဒ်မဖြင့်တရားစွဲခံရသည့်အမှုပေါင်း ခုနစ်မှုသာ ရှိခဲ့သော်လည်း NLD အစိုးရလက်ထက်တွင် ၆၁ မှု ရှိလာသည်ဟု ဆက်သွယ်ရေးဥပဒေဆိုင်ရာသုတေသနအဖွဲ့က ဖော်ပြသည်။ လတ်တလော ကြုံတွေ့နေရသည့်အမှုကတော့ သရော်စာဖော်ပြမှုဖြင့် The Voice သတင်းစာမှ အယ်ဒီတာချုပ်နှင့် သရော်စာရေးသူတို့ကို တပ်မတော်က တရားစွဲဆိုထားသည့်ကိစ္စ ဖြစ်သည်။

သတင်းစာ၊ ဂျာနယ်များတွင် ရေးသားဖော်ပြမှုနှင့်ပတ်သက်ပြီး ပြဿနာတစ်စုံတစ်ရာဖြစ်လာလျှင် ကြားဝင်ဖြေရှင်းပေးသောမြန်မာနိုင်ငံ သတင်းမီဒီယာကောင်စီ ရှိနေသည့်တိုင် ယင်းကိုကျော်လွန်ကာ အစိုးရနှင့် တပ်မတော်တို့က ၆၆(ဃ)ဖြင့် သတင်းမီဒီယာတို့ကို တရားစွဲဆိုကြခြင်းမှာ အင်မတန်မှ ရုပ်ဆိုးအကျည်းတန်သည့်ကိစ္စ ဖြစ်ပါသည်။

ထိုဥပဒေကို ပြင်ဆင်ခြင်း၊ သို့မဟုတ် ဖျက်သိမ်းခြင်းမပြုဘဲ ဆက်လက်ထားရှိမည်ဆိုပါက အုပ်ချုပ်ရေးမဏ္ဍိုင်၊ ဥပဒေပြုရေးမဏ္ဍိုင်နှင့် တရားစီရင်ရေးမဏ္ဍိုင်တို့ကို စောင့်ကြည့်သည့် စတုတ္ထမဏ္ဍိုင်ခေါ် သတင်းမီဒီယာဒေါက်တိုင်သည် ယိုင်နဲ့ရာမှ ပြိုလဲမည့် အခြေအနေသို့ ရောက်သွားနိုင်ပါသည်။

နိုင်ငံတကာကို ကြည့်မည်ဆိုလျှင် မီဒီယာကို အဖိနှိပ်ဆုံးအစိုးရများသည် အာဏာရှင်များ၊ သို့မဟုတ် အာဏာရှင်ဆန်ဆန် အုပ်ချုပ်သောအစိုးရများဖြစ်နေတတ်သည်။ ယခုအစိုးရသည် ထိုသို့သော အစိုးရမဟုတ်ဘဲ ပြည်သူတို့ကို ပြောပိုင်ခွင့်၊ မြင်ပိုင်ခွင့်၊ ကြားပိုင်ခွင့်ပေးသော အစိုးရတစ်ရပ်ဖြစ်သည်ဆိုလျှင် ယခင်အစိုးရ ရေးဆွဲပြဋ္ဌာန်းခဲ့သော အငြင်းပွားဖွယ် ထိုဥပဒေကို ပြင်ဆင်ခြင်း၊ သို့မဟုတ်ဖျက်သိမ်းခြင်းကို အမြန်ဆုံးလုပ်ဆောင်ရန် ကျွန်ုပ်တို့မော်ကွန်းက တိုက်တွန်းပါသည်။      ။

၂၀၁၇-ဇွန်လထုတ်၊ မော်ကွန်းမဂ္ဂဇင်း အမှတ်(၄၇)မှ အယ်ဒီတာအာဘော် ဖြစ်ပါသည်။

 

မော်ကွန်းအယ်ဒီတာအဖွဲ့

 

Advertise Here

LEAVE A REPLY

Please enter your comment!
Please enter your name here