ပြည်သူ့ပါတီသည် ယမန်နှစ်ရွေးကောက်ပွဲတွင် သောင်ပြိုကမ်းပြို ရှုံးနိမ့်သဖြင့် အတိုက်အခံပါတီ ဘဝသို့ ရောက်ရှိနေသည်။ ပြည်သူ့ပါတီဟု ခေါ်ရ ခြင်းမှာ ပြည်သူပိုင်အဆောက်အအုံ၊ ဘဏ္ဍာငွေ တို့ကို အသုံး ပြု ပြီး တည်ထောင်ခဲ့သည့်ပါတီဖြစ် သောကြောင့်ပင်။
ပြိုင်ဘက် ပေါ်ပြူလာပါတီကို အာဏာလွဲှ ပေးလိုက်ရသဖြင့် အိမ်နိမ့်စံဘဝ ရောက်သွား သော ပြည်သူ့ပါတီသည် မကြာသေးမီက ပါတီ ညီလာခံပြုလုပ်ပြီး ရွေးကောက်ပွဲ အရှုံးအကြောင်း ကို အလေးအနက် သုံးသပ်ကြသည်။
ပါတီကို လူကြိုက်နည်းသောကြောင့် ခွက်ခွက်လှန် ရှုံးနိမ့် ခြင်းဖြစ်သည်ဟု တစ်ယောက်က တင်ပြရာ အပြင်းအထန် ကန့် ကွက်ကြလေသည်။ ”ပြည်သူက ငါတို့ကို ချစ်တယ်၊ လူကြိုက် နည်းစရာအကြောင်း လုံးဝမရှိဘူး”ဟု အများအပြားက ဝိုင်း ပြောသဖြင့် အဆိုပါဆွေးနွေးသူမှာ ညီလာခံကာလတစ်လျှောက် လုံး ပါးစပ်ထပ်မဟရဲတော့ချေ။
လာမည့်ရွေးကောက်ပွဲတွင် ရှုံးကြွေးဆပ်နိုင်ရေးအတွက် မည်သို့ လုပ်ကိုင်ကြမည်၊ ဗျူဟာခင်းကြမည်ဆိုသည်ကို ပြည်သူ့ ပါတီညီလာခံတစ်လျှောက်လုံး တိုင်ပင်ကြသည်။
‘ပါတီကို နာမည်ပြောင်းလိုက်မယ်ဆိုရင် မဲဆန္ဒရှင်တွေ မျက်စိလည်ပြီး ကျွန်တော်တို့ကို မဲပေးလာနိုင်ပါတယ်။ ဒါကြောင့် ဒီနည်းလမ်းကိုလည်း စဉ်းစားသင့်ပါတယ်’ ဟု အကြံပြုသူလည်း ရှိ၏။
သူ၏ အကြံပြုချက်မှာလည်း အပြင်းအထန် ကန့်ကွက်ခံရ လေသည်။ သူ့ကို ကန့်ကွက်ရာတွင် ဦးဆောင်ဦးရွက်ပြုကြသူတို့ မှာ ‘ရေဘူးပေါက်တာ မသိချင်ဘူး၊ ရေပါတာပဲ လိုချင်တယ်’ဟူ သော မူဝါဒကို ကိုင်စွဲထားသူများတည်း။
ပြိုင်ဘက်ပါတီကို အကောက်ကြံခြင်း၊ ရွေးကောက်ပွဲကော် မရှင်ကို အိတ်ထဲထည့်ရန် ကြိုးစားခြင်း၊ မဲလိမ်၊ မဲခိုး၊ မဲဝယ်ခြင်း အစရှိသည့် ရှေးဟောင်းနည်းနာများမှအစ အမတ်လောင်းများ ရွေးချယ်ရာတွင် ဗေဒင်ဆရာတို့၏အကြံပြုချက်ကို အလေးထား ခြင်းဟူသောနည်းလမ်းအထိ အကြံပြုသူများရှိရာအကြံပြုချက် စုစုပေါင်းသုံးရာကျော်ခန့် ပေါ်ထွက်လာသည်။
ဧရာမအကြံ
ဟင်္သာမောင်နံှတိုင်းဒေသကြီးဘက်မှ တက်ရောက်သော ညီလာခံကိုယ်စားလှယ်တစ်ဦး၏ ဆွေးနွေးချက်မှာ လူကြိုက်များ လှသည်ဟု ဆိုရမည်။ သူက အာဏာရသွားသော ပေါ်ပြူလာပါတီ ၏ ခေါင်းဆောင်အကြောင်း ထည့်သွင်းဆွေးနွေး၏။
”အားလုံးသိတဲ့အတိုင်းပဲ ပေါ်ပြူလာခေါင်းဆောင်ကြီး ဆိုတာ တစ်နိုင်ငံလုံးက ဝိုင်းဝန်းလေးစားချစ်ခင် ကြတဲ့ အမျိုး သမီးကြီးပါ။ ရွေးကောက်ပွဲမှာ မဲတွေအားလုံး အဲဒီပါတီကို ရောက်သွားရတဲ့ အကြောင်းရင်းက မဲဆန္ဒရှင်တွေဟာ သူ့ကို ချစ် ခင်လေးစားကြလွန်းလို့ မဟုတ်ပါလားခင်ဗျာ”ဟု ဦးဟင်္သာက ဆွေးနွေးသည်။
ဦးဟင်္သာ၏ တင်ပြချက်ကြောင့် ညီလာခံတစ်ခုလုံး ငြိမ် သက်သွားသည်။ ပြိုင်ဘက်ပါတီအောင်ပွဲရသွားသည့် အဓိက အကြောင်းရင်းသည် မိမိတို့ပါတီ မရှုမလှဖြစ်ရခြင်း၏ အဓိက အကြောင်းရင်း မဟုတ်လော။ သူ့စကားကို မည်သူကမှ ကန့်ကွက် ခြင်း၊ အထွန့်တက်ခြင်း မရှိကြပေ။ ခါးသက်သော အမှန်တရား ဖြစ်သောကြောင့်တည်း။
နောက်ဆုံးတွင် ‘ပေါ်ပြူလာခေါင်းဆောင် အမျိုးသမီးကြီး သာ ငါတို့ဘက်ပြောင်းလာရင် လာမယ့် ရွေးကောက်ပွဲ ငါတို့နိုင် မှာ သေချာတယ်’ ဟု ညီလာခံကိုယ်စားတော်ကြီးများ ယူဆလာ ကြသည်အထိ သူ၏ တင်ပြချက်က အရာရောက်လှသည်။
ညီလာခံအလွန်
ညီလာခံပြီးသွားသော်လည်း ဤအယူအဆအကြောင်း ပြောဆိုသုံးသပ်မှုများကား မပြီး။ ထိုညီလာခံတွင် ပါတီခေါင်း ဆောင်သစ်တို့ကို ရွေးချယ်လေသည်။ ရွေးချယ်ခံရသူအများ အပြားမှာ နာမည်ကြီးသူများ မဟုတ်ကြပေ။ ထူးခြားချက်မှာ အသစ်ရွေးချယ်ခံရသည့် ပါတီခေါင်းဆောင်ပိုင်းက ဤအယူ အဆနှင့် ပတ်သက်၍ ဆက်လက်ညှိနှိုင်းတိုင်ပင်ကြခြင်းပင်။
ညီလာခံအလွန်တွင် ပါတီဗဟိုကော်မတီသစ်က အထူး အစည်းအဝေးကျင်းပသည်။ ဆွေးနွေးသည့် အကြောင်းအရာမှာ တစ်ခုတည်းသာ။ ဟုတ်သည်၊ ပေါ်ပြူလာခေါင်းဆောင်အမျိုး သမီးကြီးကို ပြည်သူ့ပါတီ၏ ခေါင်းဆောင်အဖြစ် တင်မြှောက်ရေး ပင်။ အမှန်တကယ်တင်မြှောက်နိုင်သည်ဆိုပါက ဤဖြစ်ရပ်သည် ဒုက္ခသီရိနိုင်ငံရေး၏ အထူးခြားဆုံးအရွေ့တစ်ခုဟု ဆိုရပေတော့မည်။
ဒုက္ခသီရိ နိုင်ငံရေးသမိုင်းသည် သပွတ်အူလေးငါးခု ဆက် ထားသကဲ့သို့ ရှုပ်ထွေးမှု များပြားလှ၏။ ပါတီနှစ်ခြမ်းကွဲပြီး ပြန်လည်ပေါင်းစည်း၊ ထို့နောက် ပြန်လည်နှစ်ခြမ်းကွဲပြီး ထပ်မံ ပေါင်းစည်းရန် တာစူခြင်း ဟူသော ရိုးရိုးရှင်းရှင်း ရှုပ်ထွေးမှုမှအစ ပဋိပက္ခအားကိုးသည့် ဧရာမပါတီကြီးများ ပေါ်ပေါက်လာခြင်း ဟူသော ထူးခြားဆန်းကျယ်သည့် ရှုပ်ထွေးမှုမျိုးအထိ ရှိခဲ့ဖူးသည်။
ထိုသို့ ရှုပ်ထွေးမှုကုဋေကုဋာကို ကျော်ဖြတ်ခဲ့လင့်ကစား ပြိုင်ဘက်ပါတီခေါင်းဆောင်ကို မိမိပါတီတွင် ဦးဆောင်ဦးရွက် ပြုစေခြင်းဟူသော ဖြစ်ရပ်မျိုးကတော့ ဒုက္ခသီရိတွင် မပေါ်ပေါက် သေးပေ။
ဤအရေးနှင့်ပတ်သက်၍ ပြည်သူ့ပါတီဗဟိုကော်မတီ အထူးလျှို့ဝှက်အစည်းအဝေးကို ဆယ်ရက်တိုင်တိုင်ကျင်းပပြီး အကြိတ်အနယ် ဆွေးနွေးကာ ဆုံးဖြတ်ချက်တစ်ခုကို ချမှတ် လိုက်သည်။ ထိုဆုံးဖြတ်ချက်မှာ ပေါ်ပြူလာခေါင်းဆောင်ကြီးကို ဖိတ်ခေါ်ရေးပင် ဖြစ်တော့သည်။
မည်မျှပင် လျှို့ဝှက်စေကာမူ ပြည်သူ့ပါတီ၏ဆုံးဖြတ်ချက် က ပြင်ပသို့ ချက်ချင်းပေါက်ကြားပြီး သတင်းစာ၊ ဂျာနယ် မျက် နှာဖုံးများတွင် စာလုံးမည်းကြီးများဖြင့် ဖော်ပြခံရလေသည်။
နိုင်ငံရေးသုတေသီများ၊ အကဲခတ်လေ့လာသူများ၊ ဉာဏ် ကြီးရှင်များက ဤဆုံးဖြတ်ချက်သည် ဒုက္ခသီရိ နိုင်ငံရေးသမိုင်း တွင် အမိုက်မဲဆုံးသော ဆုံးဖြတ်ချက်ဖြစ်လိမ့်မည်၊ ပေါ်ပြူလာ ခေါင်းဆောင်က ပါတီ ပြောင်းမည်မဟုတ်၊ အထူးသဖြင့် ပြိုင် ဘက်ပါတီကို ပြောင်းမည်မဟုတ်ဟု တညီတညွတ်တည်း ဆိုကြ လေသည်။
အကဲခတ်သမားတစ်ဦးကဆိုလျှင် မြောင်းထဲရောက်နေ သော ပြည်သူ့ပါတီသည် ဤဆုံးဖြတ်ချက်အမှားကြောင့် မြေကျွံ ကျမှုနှင့် ကြုံရပြီး နိုင်ငံရေးလောကမှ ပျောက်ကွယ်သွားတော့ မည်ဟု မညှာမတာသြဘာပေးလိုက်၏။
ပေါ်ပြူလာခေါင်းဆောင်၏ တုံ့ပြန်ချက်
လောကတွင် မဖြစ်နိုင်တာ မရှိ၊ မဖြစ်သေးတာဘဲ ရှိသည်ဟူသော စကားမှာ မှန်ကန်လှသည်။ ပြည်သူ့ ပါတီ၏ မဟာဆုံးဖြတ်ချက်နှင့်ပတ် သက်ပြီး သုံးသပ်သည့် ဤတစ်ကြိမ် တွင် နိုင်ငံရေး ပရောဟိတ်တို့၏ ဟော ကိန်းရာနှုန်းပြည့် မှားလေသည်။
ပေါ်ပြူလာပါတီခေါင်းဆောင်အမျိုးသမီးကြီးက ပြည်သူ့ပါတီ၏ ကမ်းလှမ်းချက်ကို လက်ခံလိုက်သည် ဆို၏။ ထိုသို့ လက်ခံလိုက်ခြင်းသည် ဒုက္ခသီရိ၏ အကဲခတ်သမားအားလုံး ဟင်ခနဲ၊ ဟာခနဲ ဖြစ်သွားစေသော နိုင်ငံရေးအရွေ့ကြီးတစ်ခု ပေါ်ပေါက် လာခြင်းပင် ဖြစ်တော့သည်။
ဘာကြောင့် လက်ခံလိုက်ရသလဲ၊ ပေါ်ပြူလာပါတီကို ဘယ်သူက ဆက် လက်ဦးဆောင်မှာလဲ၊ ပေါ်ပြူလာကို ဘာကြောင့် စွန့်ခွာရသလဲဟူသော မေးခွန်းများ ပေါ်ပေါက်လာလေပြီ။
ဒုက္ခသီရိရှိ မျက်စိကြီး၊ နားကြီး သော သတင်းရပ်ကွက်၏ အဆိုအရ ပေါ်ပြူလာပါတီတွင်း မကြာသေးမီက ပေါ်ပေါက်ခဲ့သော ရုပ်ဆိုးဆိုးဖြစ်ရပ်တစ်ခု ကြောင့် ပါတီကို စွန့်ခွာရန် ဆုံးဖြတ်လိုက်ခြင်းဖြစ်သည်ဟူ၏။
မကြာသေးမီက ပေါ်ပြူလာပါတီ ထိပ်တန်းခေါင်းဆောင်တစ်ဦးဖြစ်သည့် ဦးထိန်ဝင်းဆိုသူကို သတင်းထောက်တစ်ဦးက သွားရောက်အင်တာဗျူးရာမှ အဆိုပါ ရုပ်ဆိုးဆိုးဖြစ်ရပ်ပေါ် ပေါက်လာခြင်းပင်။ အိမ်စာလုပ်သွားခြင်းမရှိဟု နောက်ပိုင်းတွင် ဝေဖန်ခံရသော ထိုသတင်းထောက်က ဦးထိန်ဝင်းကို မေးခွန်း တချို့ မေးသည်။ ဦးထိန်ဝင်းက သူ့ကို ‘သောက်ရူး၊ သောက်ရူး’ ဟု ၉ ကြိမ်တိတိ အားပါးတရ ပြောဆိုလိုက်ပြီး သူပြောသည့် အတိုင်း ပုံနှိပ်ဖော်ပြရန်လည်း အကြံပြုလိုက်လေသည်။
ထိုသတင်းထောက်၏ စာစောင်ကလည်း ပေါ်ပြူလာပါတီ ထိပ်တန်းခေါင်းဆောင် ဦးထိန်ဝင်း အကြံပြုချက်ကို မပျက် မကွက်လိုက်နာ၏။ စာစောင်ထွက်လာသောအခါ ‘သောက်ရူး၊ သောက်ရူး’ ဟူသော စာလုံးများက မျက်နှာဖုံးတွင် ပြူးတူးပြဲတဲ ပါလာလေသည်။ နိုင်ငံရေး စိတ်ဝင်စားသူရော စိတ်မဝင်စားသူပါ မျက်လုံးပြူးသွားကြသည်အထိ အဆိုပါ မအောင်မြင်သည့် အင်တာဗျူးက ထင်ရှားကျော်ကြားသွားသည်။
နိုင်ငံရေးစိတ်ဝင်စားစပြုလာ သော လူငယ်တချို့လည်း ဤ ဖြစ်ရပ် ကို ကြည့်ပြီး သံဝေဂ စောစောစီးစီး ရသွားကြကုန်၏။ နိုင်ငံရေးသည် အဆဲ ကြမ်းသူတို့၏ ပစ္စည်းဥစ္စာဖြစ်၏ဟု အနက်ဖွင့်ကြ၏။
အဆိုပါဂယက်သည် ပေါ်ပြူ လာပါတီတွင် ကြီးစွာသော ပြောင်းလဲ မှုကို ပေါ်ပေါက်စေသော အကြောင်း တရားတစ်ခု ဖြစ်လာလေသည်။ ပေါ် ပြူလာပါတီခေါင်းဆောင် အမျိုးသမီး ကြီးက လွန်စွာစိတ်သောကရောက် သွားပြီး ပါတီမှ နုတ်ထွက်ရန်အထိ စိတ်ကူးမိသည်ဟု ဆိုသည်။
ဤသို့ စိတ်ကူးမိသည့်အချိန် သည် ပြည်သူ့ပါတီက လာရောက်ဖိတ် ခေါ်သည့်အချိန်နှင့် တိုက်ဆိုင်နေသည်။ အတိုချုပ်ပြောရလျှင် အထက်တွင် ဖော်ပြခဲ့သည့်အတိုင်း ခေါင်းဆောင် အမျိုးသမီးကြီးက ပြည်သူ့ပါတီ၏ ကမ်းလှမ်းချက်ကို လက်ခံလိုက်လေ သတည်း။
ကစားကွင်း အသစ်
အမျိုးသမီးကြီးက ပြည်သူ့ပါတီ ထိပ်သီးတာဝန်ရှိသူတို့ကို မေးသည်။ ”ရှင်တို့က ကျွန်မကို ဘာကြောင့် ခေါင်းဆောင်တင် ရတာလဲ”
ပြည်သူ့ပါတီမှ အဘများ အမှန်အတိုင်း ဖြေကြရသည်။ မလိမ်ရဲ၊ မလိမ်ဝံ့။ ဤအကွက်က သူငယ်နှပ်စားပင် ရိပ်မိနိုင်သည် မဟုတ်လော။ ”လာမယ့် ရွေးကောက်ပွဲမှာ ကျွန်တော်တို့ ပြန်နိုင် ချင်လို့ပါ အစ်မကြီး” ဟု ဖြေကြ၏။
”ပွင့်ပွင့်လင်းလင်းပြောတာကိုတော့ ကြိုက်သွားပြီ။ အခု ကျွန်မက ပြည်သူ့ပါတီမှာ ခေါင်းဆောင်ဖြစ်နေ ပြီဆိုတော့ ကျွန်မ ညွှန်ကြားတဲ့အတိုင်း ရှင်တို့က လိုက်လုပ်ရမယ်”ဟု ခေါင်း ဆောင်ကြီးက ဆိုလေရာ အဘတို့လည်း အလျင်အမြန်ဆိုသလို ဟုတ်ကဲ့ခင်ဗျကြရလေသည်။
အမှန်တကယ်တော့ အဘတို့က အမျိုးသမီးကြီးကို ကာလ အတိုင်းအတာတစ်ခုအထိ အသုံးချရန် ဆုံးဖြတ်ထားပြီးဖြစ်သည်။ အမျိုးသမီးကြီး၏အရှိန်အဝါကိုယူပြီး ပါတီကို လူကြိုက်များ အောင်လုပ်မည်၊ ရွေးကောက်ပွဲနိုင်ပြီးလျှင် အမျိုးသမီးကြီးကို ဖြုတ်ချမည်၊ ပါတီတွင်း အာဏာသိမ်းမည်ဟု ဆုံးဖြတ်ထားပြီး ဖြစ်သည်။
အမျိုးသမီးကြီးကတော့ နေရာသစ်၊ ပါတီသစ်တွင် တက် ကြွစွာ လုပ်ကိုင်ရန် ဟန်ပြင်သည်။ ပါတီ ပြောင်းပြီး နောက်တစ် နေ့တွင် ဗဟိုကော်မတီအစည်းအဝေး ခေါ်ယူလေသည်။ ကော် မတီဝင်များလည်း အနာဂတ်အတွက် ဝမ်းသာအားရဖြစ်ပြီး အပြုံးတဝင့်ဝင့်ဖြင့် အစည်းအဝေး တက်ကြ၏။
”ပေါ်ပြူလာပါတီ ရွေးကောက်ပွဲမှာ အပြတ်အသတ်နိုင်ခဲ့ တာဟာ ကျွန်မကြောင့်လို့ လူအများက ထင်ကြတယ်။ ဒီအချက် က မှန်ရင်လည်း မှန်မယ်။ တကယ်တော့ ပေါ်ပြူလာပါတီကို မဲ ဆန္ဒရှင်တွေ ယုံကြည်ထောက်ခံလာကြခြင်းဟာ ပါတီကိုယ်တိုင် က အနေအထိုင်တတ်ခဲ့တာကြောင့်လို့ ကျွန်မက ဒီလိုပဲ ယူဆတယ်”
အစည်းအဝေးတက်သည့် ပြည်သူ့ပါတီ ထိပ်သီးတို့ မျက် နှာပျက်သွားသည်။ အဆိုပါစကားကို တိုက်ရိုက်ဘာသာပြန်ရ လျှင် ပြီးခဲ့သော ရွေးကောက်ပွဲမတိုင်ခင်က ၎င်းတို့ အနေအထိုင် မတတ်သဖြင့် ရှုံးခဲ့ရသည့်သဘော ဖြစ်နေသည်။
စိတ်မြန်လက်မြန်ဟန်ရှိသည့် အဘတစ်ယောက်က စား ပွဲကို လက်နှစ်ဖက်ဖြင့် ရိုက်ပုတ်လိုက်ပြီး ”ဒါဆိုရင် ကျုပ်တို့က ဘယ်လိုနေထိုင်ရမလဲ”ဟု မေးခွန်းထုတ်လိုက်သည်။
”ဒါကတော့ ကျွန်မတို့ ပြည်သူ့ပါတီသမိုင်းကြောင်းကို ပြန်လေ့လာသုံးသပ်ရမှာပဲ။ ပြည်သူကို ဘယ်လို အလုပ်အကျွေး ပြုခဲ့သလဲ။ ဘယ်လို ဒုက္ခပေးခဲ့သလဲဆိုတာ သေချာပြန်ကြည့်ရ မယ်။ ကိုယ်အမှားလုပ်ခဲ့တာတွေရှိသလား။ ရှိရင် ပြန်တောင်းပန် သင့် တောင်းပန်ရမယ်”ဟု အမျိုးသမီးကြီးက ခပ်ပြတ်ပြတ်ဆို၏။
ပွဲက ကြမ်းစပြုလာသည်။ အဘတို့ထဲမှ တချို့က သက် ပြင်းကြီးကြီးချကြသည်။ တချို့က လက်သီးကို ကျစ်ကျစ်ပါအောင် ဆုပ်လိုက်ကြသည်။ အများစု၏မျက်နှာပေါ်မှ အပြုံးရိပ်တို့ ပျောက်ကွယ်ကြကုန်၏။
အပြောင်းအလဲမြန်သော အရွေ့
ခေါင်းဆောင်တာဝန်ယူပါရစေဟု မေတ္တာရပ်ခံပြီး ဤနေ ရာသို့ ရောက်လာခြင်း မဟုတ်ကြောင်း၊ ပြည်သူ့ပါတီထိပ်သီး များက စတင်တောင်းဆို ကမ်းလှမ်းလာခြင်းကြောင့်သာ ယခုကဲ့ သို့ မျက်နှာချင်းဆိုင်နေရခြင်းဖြစ်ကြောင်း အမျိုးသမီးကြီးက ခပ်မာမာ သတိပေးသည်။
ပြည်သူ့ပါတီမှ အဘတစ်ဦးက အခြေအနေကို ဝင်ထိန်းသည်။
”ဟဲဟဲဟဲ…ကျုပ်တို့က မောင်နှမတွေပဲဗျာ။ ပွင့်ပွင့် လင်းလင်း ပြောမိဆိုမိကြတယ်ဆိုတော့လည်း နည်းနည်းပါးပါး ကတောက်ကဆတွေ ဖြစ်လာမယ်။ သို့သော်လည်း နိုင်ငံနဲ့ ပြည် သူ့အကျိုးအတွက် အကောင်း မြင်သဘော ဆွေးနွေးကြတာပေါ့ ဗျာ”ဟု သူက လေချိုသွေး၏။
သူ၏ လေနုအေးမှာ အလုပ်မဖြစ်။
ပါတီ၏ ဘဏ္ဍာရေးအခြေအနေ၊ ဇာစ်မြစ်တို့ကို ပြန်လည် စစ်ဆေးရမည်ဟု ခေါင်းဆောင်သစ်က နောက်ထပ် ခေါင်းစဉ် တစ်ခု ချပြလာသည်။
”ကျွန်မတို့ရဲ့ ရန်ပုံငွေတွေ ဘယ်လိုရှာသလဲ၊ ဘယ်လိုနည်း လမ်းနဲ့ရသလဲ၊ ဘယ်သူတွေက ထည့်ကြသလဲ၊ နည်းမှန်လမ်းမှန် ဟုတ်ရဲ့လားဆိုတာ အင်မတန်မှ အရေးကြီးတယ်။ ပြည်သူလူထုရဲ့ ငွေ၊ နိုင်ငံတော်ရဲ့ငွေတွေ မပါဘူးဆိုတဲ့ အခြေအနေဖြစ်အောင် သန့်စင်ရမယ်”
ခေါင်းဆောင်သစ်က ထိုသို့ ပြောဆိုပြီး အစည်းအဝေးခန်းမ ကို တစ်ချက်ဝေ့ကြည့်လိုက်သည်။ အားလုံး ငြိမ်သက်။
ငြိမ်သက်နေကြသည် ဆိုသော်လည်း ရင်ထဲတွင်တော့ ဗလောင်ဆူနေကြပြီ။ ပြည်သူ့ပါတီက ရန်ပုံငွေတော့ ခိုင်သည်။ သို့သော်လည်း မူလဇာစ်မြစ်ကို ပြန်လည်စစ်ဆေးမည်ဆိုပါက ဒုက္ခသီရိနိုင်ငံ၏ အခွင့်ထူးခံပါတီဖြစ်မှန်း အထုပ်ဖြေပြသလို ဖြစ် တော့မည်။ ထို့ကြောင့် သူတို့ရင်ထဲ ဗလောင်ဆူနေသည်။
”ငွေရေးကြေးရေးကိစ္စ ဖြူစင်မှ ဖြစ်မယ်။ ပြီးတော့ ပြည် သူ့ပါတီရဲ့ နိုင်ငံအနံှ့ မြို့နယ်ရုံးတွေကလည်း လေး၊ ငါးရာ ရှိနေ တယ်။ အားလုံးက ကိုယ်ပိုင်ရုံးတွေချည်းပဲ။ ဒါတွေ ဘယ်က ပိုက်ဆံနဲ့ ဝယ်ထားတာလဲ။ ဘယ်သူက ပေးထားတာလဲ။ မူလပိုင် ရှင်က ဘယ်သူလဲ။ ကိုယ့်လက်ထဲ ရောက်လာတာ ရိုးရိုးသားသား နည်းလမ်းနဲ့လားဆိုတာ ကျွန်မတို့ ပြန်စစ်ဆေးဖို့ လိုတယ်”
အစည်းအဝေးတက်ရောက်လာသူများ ပါးစပ်အဟောင်း သားဖြစ်ပြီး ခေါင်းဆောင်သစ်ကို ကြည့်နေကြသည်။ ဒီအတိုင်း လွှတ်ထားလို့ မဖြစ်တော့ဟု သူတို့တွေးလိုက်ကြသည်။
လေချိုသွေးတတ်သော ထိပ်တန်းပုဂ္ဂိုလ်တစ်ယောက်က အခြေအနေကို ဝင်ထိန်းရန် ကြိုးပမ်းသည်။
”ရုံးတွေကတော့ဗျာ၊ ပြီးခဲ့တဲ့ နိုင်ငံတော်အစိုးရတွေက စီစဉ်ပေးသွားတာတွေချည်းပါပဲ။ ပြည်သူ့ဘဏ္ဍာ၊ ပြည်သူပိုင် အဆောက်အအုံတွေကိုသုံးပြီး ကျွန်တော်တို့ပါတီ တည်ထောင် ထားတာ အားလုံးသိပါတယ်။ သိလို့လည်း ပါတီအမည်ကိုတောင် ပြည်သူ့ပါတီလို့ ပေးထားတာမဟုတ်လား။ ဒီအကြောင်းတွေ ခဏထားပြီး ရှေ့လုပ်ငန်းစဉ်တွေ ဆွေးနွေးကြပါစို့”ဟု ထိုပုဂ္ဂိုလ် က ချိုသာကြည်မြစွာ ဆိုလာ၏။
”ဟုတ်တယ်လေ။ ကျွန်မက ရှေ့လုပ်ငန်းစဉ် ဆွေးနွေးနေ တာပဲ။ ပြည်သူပိုင်အဆောက်အအုံတွေ သိမ်းထားမိတယ်ဆိုရင် ပြန်ပေးလိုက်၊ မူလပိုင်ရှင်တွေကို ပြန်အပ်လိုက်၊ မူလပိုင်ရှင် ဘယ် သူမှန်းမသိရင် အစိုးရကို ပြန်အပ်လိုက်၊ သူတို့ လိုက်ရှာပလေ့စေ။ ရိုးရိုးသားသားလုပ်ပြမှ ရွေးကောက်ပွဲမှာ မဲရတော့မှာပေါ့”ဟု ခေါင်းဆောင်သစ်က ချက်ချင်းတုံ့ပြန်၏။
ခေါင်းဆောင်သစ်၏ ပြောကြားချက်ကို နားထောင်နေ သော ပြည်သူ့ပါတီဗဟိုကော်မတီဝင်တို့ ဆက်လက်သည်းခံနိုင် စွမ်း မရှိကြတော့ပြီ။ အားလုံး ဝုန်းခနဲ မတ်တတ်ထရပ်လိုက်ကြသည်။
အစည်းအဝေး ပျက်သွားလေပြီ။
နောက်တစ်နေ့ သတင်းစာများတွင် ပြည်သူ့ပါတီက ခေါင်း ဆောင်သစ် အမျိုးသမီးကြီးကို တာဝန်မှရပ်ဆိုင်းပြီး ပါတီမှ ထုတ်ပယ်လိုက်ခြင်း ဟူသော သတင်းကို မျက်နှာဖုံးသတင်းအဖြစ် တွေ့ရလေသတည်း။ ။
၂၀၁၆-အောက်တိုဘာလထုတ်၊ မော်ကွန်းမဂ္ဂဇင်း အမှတ်(၃၉)မှ သရော်စာ ဖြစ်ပါသည်။
ရန်လိုကျွှဲ ရေးသည်။
