တရားလွှတ်တော်ရှေ့နေ ဦးကိုနီလုပ်ကြံခံရခြင်းနှင့် ပတ်သက်ပြီး စုံစမ်းစစ်ဆေးမှုများပြုလုပ်နေချိန်တွင် ဖြစ်နိုင်ဖွယ်ရာများကို ခန့်မှန်းပြောဆိုကြရာ၌ ယေဘုယျအားဖြင့် အယူအဆလေးမျိုးကို တွေ့ရသည်။
ပထမအယူအဆမှာ NLD ပါတီ၏ ဥပဒေရေးရာကျွမ်းကျင်သူများထဲမှ တစ်ဦးကိုလုပ်ကြံဖယ်ရှားလိုက်ခြင်းဖြင့် တိုင်းပြည်ပြုပြင်ပြောင်းလဲရေးလုပ်နေသော NLD အစိုးရကိုအင်အားချည့်နဲ့အောင် လုပ်ဆောင်ခြင်းဖြစ်မည် ဟူ၍ဖြစ်သည်။ ဒုတိယအယူအဆကတော့ နယ်ပယ်အသီးသီးမှ လေးစားရသောအစ္စလာမ်ဘာသာဝင်တစ်ဦးအား လုပ်ကြံလိုက်ခြင်းဖြင့် မွတ်စလင်အသိုင်းအဝိုင်းကိုအသံတိတ်အောင် ရည်ရွယ်ခြင်းဖြစ်မည်ဟူ၍ ဖြစ်သည်။
တတိယအယူအဆကတော့ ဗုဒ္ဓဘာသာဝင်များနှင့် အစ္စလာမ်ဘာသာဝင်များကြား ညီညွတ်မှုပြိုကွဲကာ တစ်ကျော့ပြန် ပဋိပက္ခဖြစ်အောင် ရည်ရွယ်ချက်ဖြင့် လုပ်ကြံခြင်းဖြစ်မည်ဟူ၍ဖြစ်သည်။ ရေပန်းစားသည့် နောက်ထပ် ယူဆချက်တစ်ခုကတော့ ဦးကိုနီမှာအခြေခံဥပဒေ ပြင်ဆင်ရေးကို တစိုက်မတ်မတ်တိုက်တွန်းနေသောကြောင့် မလိုလားသော လူတစ်စုက လုပ်ကြံခိုင်းခြင်း ဖြစ်မည်ဟူ၍ဖြစ်သည်။ စင်စစ်တွင် မည်သည့်ရည်ရွယ်ချက်ကြောင့် ထိုသို့ လုပ်ကြံလိုက်ခြင်းဖြစ်သည်ကို ဆွဲထုတ်ပြရန် ခက်ခဲပါလိမ့်မည်။အထက်ပါရည်ရွယ် ချက်လေးချက်စလုံးဖြင့် တစ်ချက်ခုတ်၊ လေးချက်ပြတ်လုပ်လိုက်ခြင်းလည်း ဖြစ်ကောင်းဖြစ်နိုင်မည်ဟု ဆကြသည်များလည်း ရှိသည်။
ဦးကိုနီအား သေနတ်နှင့် ပစ်ခတ်သောသူနှင့် ၎င်းအားစေခိုင်းသူဟု သံသယရှိရသူတို့ကို ယခု အယ်ဒီတာအာဘော်ကို ရေးနေသည့်အချိန်တွင် ဖမ်းဆီးစစ်ဆေးနေပြီဖြစ်ရာ နောက်ကွယ်မှ ခိုင်းစေသူနှင့် ရည်ရွယ်ချက်ကို မကြာမီရှာဖွေဖော်ထုတ်နိုင်လိမ့်မည်ဟုမျှော်မှန်းနေကြသည်။ သို့သော် အမှုက မည်မျှနက်နဲရှုပ်ထွေးမည်ကိုမသိနိုင်ကြရာ သံသယဖြင့်သာ စောင့်မျှော်နေကြရသည့်အနေအထားတွင် ရှိပါသည်။
လက်သည်တရားခံ မဖော်ထုတ်နိုင်သေးသည့် ငါးလောင်းပြိုင်လူသတ်မှုကဲ့သို့သော ဖြစ်ရပ်မျိုးကလည်း ရှေ့တွင် ရှိခဲ့သည်ဖြစ်ရာယခုဖြစ်စဉ်တွင်လည်း နောက်ကွယ်က ‘လက်မည်း’ကို အလင်းရောင်ထဲ ဆွဲထုတ်ပြနိုင်ပါမည်လား ဆိုသည်မှာ သံသယဖြစ်မည်ဆိုလျှင်လည်း ဖြစ်ချင်စရာပင်။
မည်သည့်ရည်ရွယ်ချက်၊ မည်သူ၏ ခိုင်းစေချက်ကြောင့် လုပ်ကြံမှုဖြစ်ပွားရသည်ကို စုံစမ်းနေသည့် ယခုလိုအချိန်မျိုးတွင် ဘာသာနှစ်ခုကြား ပဋိပက္ခ ဖန်တီးခွင့်မရအောင်လည်း သက်ဆိုင်ရာ တာဝန်ရှိသူများ၊ ဘာသာရေးခေါင်းဆောင်များနှင့် လူမှုအဖွဲ့အစည်းများက သတိဝီရိယဖြင့် စောင့်ကြည့်ထိန်းကွပ်ပေးရပါလိမ့်မည်။ ထို့ပြင် လူမှုကွန်ရက်ကိုအသုံးချပြီး အမုန်းတရားများဖြန့်ဝေမည့်သူများကို အချိန်ပြည့်စောင့်ကြည့်ပြီး လိုအပ်သလိုဟန့်တား အရေးယူနိုင်ရန်လည်း အရေးကြီးပါသည်။
လတ်တလော လူထုကြားစိုးရိမ်နေသည့်အချက်မှာ မြန်မာ့နိုင်ငံရေးလောကတွင် အမြင်မတူသည့်သူ၊ အယူဝါဒ မတူသည့်သူကိုသတ်ဖြတ်လုပ်ကြံသောနည်းဖြင့် ဖယ်ရှားသည့် အလေ့အထ ပြန်လည်ခေတ်စားလာမည့်ကိစ္စပင်ဖြစ်သည်။ ဆယ်စုနှစ်များစွာ အာဏာရှင်စနစ်အောက် ယိုယွင်းပျက်စီးခဲ့ရသော တိုင်းပြည်ကို ပြုပြင်ပြောင်းလဲရေးလုပ်နေရသည့် ယခုလိုအချိန်မျိုးတွင် အထက်ပါအလေ့အထဆိုးကြီး ပြန်လည် ခေါင်းထောင်လာမည်ဆိုပါက မြန်မာနိုင်ငံ၏နောင်ရေးမှာ ရင်လေးဖွယ်ရာသာ ဖြစ်ပါလိမ့်မည်။
အကယ်၍ နောက်ကွယ်မှ လက်မည်းကိုမဖော်ထုတ်နိုင်ပါက အခြားနိုင်ငံရေးခေါင်းဆောင်များလည်း ပစ်မှတ်ထားလုပ်ကြံခံရမည်ကို လူထုကစိုးရိမ်နေကြရာ အထက်ပါ စိုးရိမ်မှုမျိုးစုံကို ဖြေလျှော့နိုင်ရန် အမှုမှန်ကို မြန်မြန်ဆန်ဆန် ရဲရဲဝံ့ဝံ့ ဖော်ထုတ် အရေးယူရန်လိုအပ်ပါကြောင်းနှင့် ပြည်သူများထံသို့လည်း တာဝန်ရှိသူများက သတင်းအချက်လက်များ ထုတ်ပြန်ပေးရန်လိုပါကြောင်း ကျွနု်ပ်တို့မော်ကွန်းက တိုက်တွန်းအပ်ပါသည်။
၂၀၁၇-ဖေဖေါ်ဝါရီလထုတ်၊ မော်ကွန်းမဂ္ဂဇင်း အမှတ်(၄၃)မှ အယ်ဒီတာအာဘော် ဖြစ်ပါသည်။
မော်ကွန်းအယ်ဒီတာ အဖွဲ့
mawkun.chronicle@gmail.com